வாழ்க உதயநிதி ஸ்டாலின்! தமிழக எம்பிக்கள் பதவியேற்கும் போது முழக்கம்

மக்களவையில் தமிழ்நாட்டு எம்பி-க்கள் இன்று பதவியேற்கும்போது சில எம்பிக்கள் அண்ணா, பெரியார், கலைஞர், மு.க.ஸ்டாலின், உதயநிதி ஸ்டாலின் வாழ்க என்று முழக்கமிட்டனர்.

இந்தியாவில் நடந்து முடிந்த மக்களவை தேர்தலில் பாஜக தலைமையிலான தேசிய ஜனநாயக கூட்டணி 293 இடங்களை பெற்று ஆட்சி அமைத்தது.

இதையடுத்து, கடந்த 9-ம் திகதி பிரதமர் மோடி தலைமையிலான புதிய கூட்டணி அரசு பதவி ஏற்றது. அவருடன் 72 புதிய அமைச்சர்களும் பதவியேற்றனர்.

41 -வது முறையாக செந்தில் பாலாஜியின் நீதிமன்ற காவல் நீட்டிப்பு: நீதிமன்றம் உத்தரவு

இந்நிலையில் 18-வது நாடாளுமன்றம் நேற்று காலை கூடியது. நாடாளுமன்றத்தில் புதிதாக தேர்ந்தெடுக்கப்பட்ட 543 எம்.பி.க்களுக்கும் பதவிப்பிரமாணம் செய்து வைக்கும் நிகழ்ச்சி நடைபெறுகிறது.

இதில், புதிய உறுப்பினர்களை பதவிப்பிரமாணம் செய்து வைக்க தற்காலிக சபாநாயகராக பாஜகவை சேர்ந்த பர்த்ருஹரி மஹ்தாபுக்கு, குடியரசுத்தலைவர் திரவுபதி முர்மு பதவிப்பிரமாணம் செய்து வைத்தார்.

இதையடுத்து, பிரதமர் நரேந்திர மோடி, உள் துறை அமைச்சர் அமித் ஷா, மத்திய அமைச்சர்கள் எம்பி-யாக பதவியேற்றனர்.

தமிழக எம்பிக்கள் பதவியேற்பு

இந்நிலையில் தமிழகம் மற்றும் புதுச்சேரி எம்பிக்கள் இன்று பதவியேற்றுக் கொண்டனர். அப்போது சில தமிழக எம்பி-க்கள் கையடக்க அரசியல் சாசன புத்தகத்தை கைகளில் வைத்து உறுதி மொழி கூறி பதவியேற்றுக் கொண்டனர்.

சில எம்பிக்கள் வாழ்க தமிழ்! வாழ்க பெரியார்! வாழ்க அண்ணா! வாழ்க கலைஞர்! வாழ்க முத்துவேல் கருணாநிதி ஸ்டாலின்! வாழ்க உதயநிதி ஸ்டாலின், வேண்டாம் நீட்! BAN நீட் என்று முழக்கமிட்டனர்.

அதில் திருவள்ளூர் காங்கிரஸ் எம்பி சசிகாந்த் செந்தில், "தலித்துகள், சிறுபான்மையினர் மீதான தாக்குதலை நிறுத்துக" எனக் கூறி பதவியேற்றார்.

இதனால் அவையில் இருந்த சில பாஜக எம்பி-க்கள் சிலர் எதிர் குரல் எழுப்பியதால் சிறிது நேரம் சலசலப்பாக இருந்தது. இதையடுத்து ஒருவர் பின் ஒருவராக வந்து தமிழக எம்பிக்கள் பதவியேற்றுக் கொண்டனர்.