பிரித்தானியாவில் கிட்டத்தட்ட முக்கால் வாசி மக்களுக்கு இது குறித்து தெரியாது! புதிய பிரச்சாரத்தை தொடங்கிய அரசாங்கம்

பிரித்தானிய அரசாங்கம் நாடு முழுவதும் 'Stop COVID-19 hanging around' என்ற புதிய பிரச்சாரத்தைத் தொடங்கியுள்ளது.

இந்த குளிர்காலத்தில் COVID-19 வைரஸால் பாதிக்கப்படுவதால் ஏற்படும் அபாயங்களைக் குறைக்க எளிய காற்றோட்ட நுட்பங்களின் முக்கியத்துவத்தை வலியுறுத்துவதற்காக, டிஜிட்டல் சேனல்கள், வானொலி நிலையங்கள் மற்றும் செய்தித்தாள்கள் முழுவதும் பிரித்தானிய அரசாங்கம் வெள்ளிக்கிழமை முதல் ஒரு புதிய பிரச்சாரத்தைத் தொடங்கியது.

கேம்பிரிட்ஜ் மற்றும் லீட்ஸ் பல்கலைக்கழகங்களின் விஞ்ஞானிகளால் அரசாங்கத்துடன் இணைந்து ஒரு விளக்கப்படம் வெளியிடப்பட்டுள்ளது.

அதில், மற்றவர்களுடன் பழகும்போது ஒவ்வொரு மணி நேரத்திற்கும் 10 நிமிடங்களுக்கு ஒரு சாளரத்தைத் திறப்பதன் மூலம் வீட்டிற்குள் COVID-19 தொற்றை குறைக்க உதவும் என நிரூபிக்கப்பட்டுள்ளதாக தெரிவிக்கப்பட்டுள்ளது.

COVID-19 தொடர்பாக வீட்டிற்குள் இருக்கும் போது காற்றோட்டம் மற்றும் காற்றில் உள்ள துகள் இயக்கம் ஆகியவற்றில் உள்ள வித்தியாசத்தை அரசாங்கத்தின் இந்த புதிய விளம்பரப் படம் காட்டுகிறது.

“சிறிய ஆனால் முக்கியமான செயல்கள் கோவிட்-19க்கு எதிராக நம்மைப் பாதுகாக்க உதவும். தடுப்பூசிகளைப் பெறுவது, அடைக்கப்பட்ட இடங்களில் குகைக்கவசம் அணிவது மற்றும் வழக்கமான கோவிட்-19 சோதனைகளை மேற்கொள்வது ஆகியவை ஒரு முக்கியமான மாற்றத்தை ஏற்படுத்துகின்றன, ஆனால் காற்றோட்டத்தின் மதிப்பை நாம் கவனிப்பதும் மிகவும் முக்கியம்” என்று பிரித்தானியாவின் துணைத் தலைமை மருத்துவ அதிகாரி தாமஸ் வெயிட் (Thomas Waite) கூறினார்.

“COVID-19 உள்ளவர்கள் அவர்கள் பேசும்போதோ, சுவாசிக்கும்போதோ அல்லது இருமும்போதெல்லாம் வைரஸ் துகள்களை காற்றில் வெளியிடுகிறார்கள், மேலும் இவை காற்றோட்டமற்ற அமைப்புகளில் நீடிக்கலாம். குளிர்காலம் நெருங்கி வருவதாலும், மக்கள் வீட்டிற்குள் அதிக நேரம் செலவிடுவதாலும், காற்றோட்டத்தை பயன்படுத்துவதன் முக்கியத்துவத்தை அனைவரும் புரிந்துகொள்வது இன்றியமையாதது, அதாவது சன்னல்களை தவறாமல் சில நிமிடங்கள் திறப்பது கூட காற்றை நகர்த்தவும், தொற்றுநோய்களைத் தடுக்கவும் உதவும்" என்று அவர் கூறினார்.

இந்த புதிய பிரச்சார படம், வீட்டு சூழலில், வைரஸால் பாதிக்கப்பட்ட ஒருவர் மற்றொரு நபருடன் பேசுவதும், ஊடாடுவதும் எப்படி காற்றில் கோவிட்-19 துகள்களை உருவாக்குகிறது என்பதை விளக்குகிறது.

இந்த துகள்கள் புகை போல காற்றோட்டமில்லாத அறையில் நீடிக்கின்றன. இதனால், COVID-19 தொற்று ஏற்படும் ஆபத்து கணிசமாக அதிகரிக்கிறது. இருப்பினும், குறுகிய காலத்திற்கு நல்ல காற்றோட்டம் ஏற்படும்போது, ​COVID-19 துகள்கள் விரைவாக சிதறிவிடும்.

வீட்டில் COVID-19 பரவுவதைக் குறைக்க காற்றோட்டம் ஒரு சிறந்த வழி என்று பிரித்தானிய மக்களில் கிட்டத்தட்ட மூன்றில் இரண்டு பங்கு (64 சதவீதம்) பேருக்குத் தெரியாது என்று புதிய ஆராய்ச்சி வெளிப்படுத்தியதால் இந்த புதிய பிரச்சாரத்தை அரசு முன்னெடுத்துள்ளது.

யாருக்காவது வைரஸ் இருக்கிறதா என்பதைக் கண்டறிய, அவர்கள் எந்த அறிகுறிகளையும் காட்டாவிட்டாலும், அடிக்கடி சோதனை செய்வது என்பது விரைவான மற்றும் எளிதான வழியாக இருக்கும் என்று DHSC தெரிவித்துள்ளது.

இதற்கிடையில், பிரித்தானியாவின் தினசரி கொரோனா வைரஸ் வழக்குகள் சமீபத்திய நாட்களில் சிறிதளவு வீழ்ச்சியைக் காட்டினாலும், பாதிப்பு எண்ணிக்கை என்பது இன்னும் அதிகமாகவே உள்ளன. இந்த வியாழக்கிழமை மட்டும் 37,269 பாதிப்புகள் மற்றும் 214 இறப்புகள் பதிவாகியுள்ளன.