புகலிடக்கோரிக்கையாளர்களையே குற்றவாளிகளாக்கும் சட்டம்: அகதிகள் ஆதரவு தொண்டு நிறுவனங்கள் குற்றச்சாட்டு

பிரித்தானியா கொண்டுவர இருக்கும் சட்டம், நூற்றுக்கணக்கான புகலிடக்கோரிக்கையாளர்களை குற்றவாளிகளாக்கும் அபாயம் உள்ளது என அகதிகள் ஆதரவு தொண்டு நிறுவனங்கள் குற்றச்சாட்டு முன்வைத்துள்ளன.

பிரித்தானியா கொண்டுவர இருக்கும் சட்டம்

பிரித்தானிய அரசு, சட்டவிரோத புலம்பெயர்தலைக் கட்டுப்படுத்தும் நடவடிக்கைகளில் ஒன்றாக, ஆட்கடத்தல் கும்பல்கள் தொடர்பில் ஒரு சட்டத்தைக் கொண்டுவர உள்ளது.

அது தொடர்பான மசோதா நேற்று வியாழக்கிழமை நாடாளுமன்றத்தில் அறிமுகம் செய்யப்பட்டுள்ளது.

தங்கள் சொந்த நாட்டில் தங்கள் உயிருக்கு ஆபத்து என்பதால்தான் மக்கள் இன்னொரு நாட்டில் புகலிடம் கோருகிறார்கள்.

ஆனால், பிரித்தானியா அறிமுகம் கொண்டு வர இருக்கும் புகலிடம் மற்றும் புலம்பெயர்தல் தொடர்பான சட்டம், அப்படி புகலிடம் கோருபவர்களை குற்றவாளிகள் என கருதப்படும் நிலையை உருவாக்கக்கூடும் என அகதிகள் ஆதரவு தொண்டு நிறுவனங்கள் கூறுகின்றன.

அந்த சட்டம், சட்டப்படி பிரித்தானியாவில் புகலிடம் கோருவோரின் எண்ணிக்கைக்கு கட்டுப்பாடு விதிக்க உள்ளது.

ஆக, அப்படி முறையாக புகலிடம் கோருவோருக்கு கட்டுப்பாடுகள் விதிக்கப்படும் பட்சத்தில், அவர்களால் தங்கள் நாட்டுக்குத் திரும்பிச் செல்ல முடியாத நிலை உள்ளதால், வேறு வழியின்றி அவர்கள், சட்டவிரோதமாக ஆட்கடத்தல் செய்யும் கும்பல்களை நாடும் அபாயம் உள்ளது.

சிறு படகுகளில் பிரித்தானியாவுக்குள் நுழைவதற்காக, குழந்தைகளுடன் வரும் பெற்றோரை தண்டிக்க அந்த சட்டம் வழிவகை செய்கிறது. அப்படி பெற்றோர் கைது செய்யப்பட்டால் அவர்களுடைய பிள்ளைகள் தங்கள் பெற்றோரை பிரியும் அபாயம் உள்ளது.

சிறுபடகுகள் மூலம் பிரித்தானியாவுக்குள் நுழைவதற்காக ஆங்கிலக்கால்வாயில் பயணிப்பவர்களை பிரெஞ்சு அதிகாரிகள் தடுக்க முயலும்போது, தாங்கள் எப்படியாவது பிரித்தானியாவுக்குள் சென்றுவிடவேண்டும் என்பதற்காக, சிலர், பிரெஞ்சு அதிகாரிகளை தங்கள் படகுகளில் ஏற, அல்லது தங்களை கைது செய்ய அனுமதிக்க மறுக்கிறார்களாம்.

இனி, அப்படி பிரெஞ்சு அதிகாரிகளை தடுப்பவர்களுக்கும் ஐந்து ஆண்டுகள் வரை சிறைத்தண்டனை விதிக்கப்பட இருக்கிறதாம்.

தங்கள் நாட்டில் பிரச்சினை என்பதற்காக உயிர் தப்ப ஓடிவரும் ஆண்கள், பெண்கள் மற்றும் பிள்ளைகளை குற்றவாளிகள் ஆக்குவதால் ஆட்கடத்தல்காரர்களின் நடவடிக்கைகளை நிறுத்த முடியாது என்கின்றன தொண்டு நிறுவனங்கள்.

அகதி ஒருவர் படகில் ஏறும்போது, ஆயுதத்துடன் நிற்கும் ஒரு கடத்தல்காரரைக் கண்டு அவர் பயந்துபோயிருக்கும் நிலையில், அவர் தனது உயிருக்கு பயப்படுவாரா, அல்லது பிரித்தானியாவின் சட்டங்களைக் குறித்து யோசித்துக்கொண்டிருப்பாரா என கேள்வி எழுப்புகிறார் Refugee Council என்னும் தொண்டு நிறுவனத்தின் செயல் அதிகாரியான Enver Solomon என்பவர்.

ஆக, எல்லைகளைக் கடந்து வரும் அகதிகளால் ஏற்படும் சவால்களை பிரித்தானிய அரசு தீர்க்கவேண்டுமானால், அந்த அகதிகள் தங்கள் நாட்டில் எந்த பிரச்சினைக்காக பயந்து ஓடிவந்தார்களோ, அந்த பிரச்சினைகளைத் தீர்க்கத்தான் முதலில் நடவடிக்கை எடுக்கவேண்டும் என்கிறார் Enver Solomon.