இலங்கைத் தமிழர்களை பிரித்தானியா இந்தியப் பெருங்கடல் தீவில் அடைத்துவைத்தது சட்டவிரோதம்: நீதிபதி

இந்தியப் பெருங்கடல் தீவொன்றில் இலங்கைத் தமிழர்களை பிரித்தானியா சட்டவிரோதமாக அடைத்துவைத்ததாக நீதிபதி ஒருவர் தெரிவித்துள்ளார்.

தீவொன்றில் மூன்று ஆண்டுகளாக சிக்கித் தவித்த இலங்கைத் தமிழர்கள்

2021ஆம் ஆண்டு, அக்டோபர் மாதம் 3ஆம் திகதி, கனடாவுக்குச் செல்லும் நோக்கில் புறப்பட்ட இலங்கைத் தமிழர்கள் பயணித்த படகொன்று நடுக்கடலில் சிக்கித் தவிக்க, பிரித்தானிய கடற்படை அவர்களை மீட்டுள்ளது.

ஆனால், அவர்கள் பிரித்தானியாவுக்குக் கொண்டு செல்லப்படாமல், பிரித்தானியாவின் கடல் கடந்த பிரதேசமான, Diego Garcia என்னும் தீவுக்குக் கொண்டு செல்லப்பட்டார்கள்.

சுமார் மூன்று ஆண்டுகளாக அவர்கள் அனைவரும் அந்த தீவிலேயே அடைக்கப்பட்டார்கள்.

இலங்கையில் சந்தித்த துன்புறுத்தல்களுக்குத் தப்பத்தான் அவர்கள் படகில் புறப்பட்டார்கள். ஆனால், இலங்கையிலிருந்து வெளியேறியும் துன்புறுத்தல்களிலிருந்து அவர்கள் தப்பமுடியவில்லை.

குறைவான இடத்தில், ஒரே கூடாரத்துக்குள் பலர் தங்க வைக்கப்பட்டிருக்க, ஆண்கள் சிலர் தாக்குதல்களுக்கும், பெண்கள் உடல் ரீதியான வன்முறைகளுக்கும் ஆளானார்கள்.

சிறு பிள்ளைகளுக்கு சரியான பாதுகாப்பின்றி, அவர்களும், அவர்களைக் குறித்து அவர்கள் பெற்றோரும் அச்சத்துடனேயே வாழ்ந்துவந்தார்கள்.

ஒரு நல்ல செய்தி

இந்நிலையில், Diego Garcia தீவில் மூன்று ஆண்டுகளாக சிக்கித் தவித்த இலங்கைத் தமிழர்களில் பெரும்பாலானோர் சமீபத்தில் பிரித்தானியாவுக்கு அழைத்துவரப்பட்டுள்ளார்கள்.

ஆறு மாதங்களுக்கு அவர்கள் பிரித்தானியாவில் தங்க அனுமதியளிக்கப்பட்டுள்ளதுடன், அவர்களுக்கு பிரித்தானிய உள்துறை அலுவலகம் நிதி உதவியும் செய்ய உள்ளதாக பிபிசி ஊடகம் தெரிவித்துள்ளது.

BBC

இலங்கைத் தமிழர்களை அடைத்துவைத்தது சட்டவிரோதம்

இந்நிலையில், பிரித்தானியா அவர்களை Diego Garcia தீவில், மூன்று ஆண்டுகளுக்கும் மேலாக, சட்டவிரோதமாக அடைத்துவைத்ததாக தெரிவித்துள்ளார் Margaret Obi என்னும் நீதிபதி.

இந்த Margaret Obi என்னும் நீதிபதி, BIOT என்னும் British Indian Ocean Territory, அதாவது பிரித்தானிய இந்தியப் பெருங்கடல் பிரதேசத்தின் உச்ச நீதிமன்றத்தின் நீதிபதியாக செயல்படுபவர் ஆவார்.