சூரிய கிரகணம் தொடர்பில் பிரித்தானிய சாரதிகளுக்கு ஒரு எச்சரிக்கை
2024ஆம் ஆண்டின் முதல் முழுமையான சூரிய கிரகணம் என்னும் அரிய நிகழ்வு இன்று நடைபெறும் நிலையில், பிரித்தானிய சாரதிகளுக்கு அது தொடர்பில் முக்கிய எச்சரிக்கை ஒன்று விடுக்கப்பட்டுள்ளது.
பிரித்தானிய சாரதிகளுக்கு ஒரு எச்சரிக்கை
பிரித்தானியாவைப் பொருத்தவரை, உள்ளூர் நேரப்படி இன்று மாலை 7.52 மணிக்கு சூரிய கிரகணம் துவங்க உள்ளது. வடமேற்கு இங்கிலாந்து, வேல்ஸ், வட அயர்லாந்து மற்றும் அயர்லாந்துக் குடியரசு முதலான சில பகுதிகளில், பகுதி சூரிய கிரகணத்தைப் பார்க்கமுடியும்.
ஆக, வாகனங்களை செலுத்திக்கொண்டிருபவர்கள், சாலை மீது கவனம் செலுத்துவதை விட்டுவிட்டு சூரிய கிரகணத்தைப் பார்ப்பதில் கவனம் செலுத்தத் துவங்கிவிடவேண்டாம் என்கிறார்கள் அதிகாரிகள்.
அதேபோல, வாகனம் ஓட்டிக்கொண்டிருக்கும்போதே சூரிய கிரகணத்தை புகைப்படம் எடுக்க முயலவேண்டாம் என்றும் வாகன ஓட்டிகள் எச்சரிக்கப்படுகிறார்கள்.
அபராதம் விதிக்கப்படும்
மேலும், வாகனம் ஓட்டும்போது யாராவது மொபைல் போன் பயன்படுத்துவது தெரியவந்தால், அவர்களுக்கு 200 பவுண்டுகள் அபராதம் விதிக்கப்படும். அத்துடன், அவர்களுடைய ஓட்டுநர் உரிமத்தில் ஆறு அபராதப்புள்ளிகள் சேர்க்கப்படும்.
வழக்கு நீதிமன்றம் வரை கொண்டு செல்லப்படும் பட்சத்தில், அபராதம் 1,000 பவுண்டுகள் வரை அதிகரிக்கலாம்.
சில ஆலோசனைகள்
பிரித்தானியாவைப் பொருத்தவரை, சூரிய கிரகணம் மாலை நேரத்தில் காணப்பட உள்ளது. ஆகவே, வாகன ஓட்டிகளுக்கு சில ஆலோசனைகளை வழங்கியுள்ளார்கள் சில நிபுணர்கள்.
Photo by Mark Tegethoff on Unsplash
சூரிய கிரகணத்தின்போது சூரியனை நேரடியாக பார்க்கவேண்டாம். பாதுகாப்பான பகுதி ஒன்றிற்குச் சென்று உங்கள் வாகனத்தை நிறுத்திவிட்டு சூரியனைப் பார்க்க முற்பட்டால்கூட, கண்களை பாதுகாக்கும், அனுமதிக்கப்பட்ட, பாதுகாப்பான கண்ணாடி அணிந்து மட்டுமே சூரியனைப் பார்க்கலாம்.
சூரிய கிரகணத்தால் ஒளி மங்கும்போது, வாகனத்தின் வேகத்தைக் குறைக்கவும்.
உங்களுக்கு முன்னால் செல்லும் வாகனம் சூரிய கிரகணம் காரணமாக ஏற்படும் ஒளி வித்தியாசங்கள் காரணமாக திடீரென வேகத்தைக் குறைக்கக்கூடும். ஆகவே, முன் செல்லும் வாகனங்களிலிருந்து போதுமான இடைவெளிவிட்டு வாகனங்களை செலுத்தவும்.
மொத்தத்தில், சூரிய கிரகணத்தின்போது, உங்களையும், உங்கள் வாகனத்தையும், கூடவே மற்றவர்களையும் பாதுகாக்கும் வகையில் வாகனத்தைச் செலுத்தும்படி ஆலோசனை கூறியுள்ளார்கள் நிபுணர்கள்.
உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள். |