டெஸ்ட் சாம்பியன்ஷிப் இறுதிப்போட்டி: இரண்டாவது இன்னிங்சில் தடுமாறும் இந்திய அணி
உலக டெஸ்ட் சாம்பியன்ஷிப் இறுதிப்போட்டியின் முதல் இன்னிங்சில் நியூசிலாந்து அணி அனைத்து விக்கெட்டுகளையும் இழந்து 249 ஓட்டங்கள் சேர்த்துள்ளது.
இந்தியா - நியூசிலாந்து அணிகள் இடையிலான உலக டெஸ்ட் கிரிக்கெட் சாம்பியன்ஷிப்பின் இறுதிப்போட்டி இங்கிலாந்தின் சவுத்தம்டனில் நடந்து வருகிறது.
இதில் முதல் நாள் ஆட்டம் மழையால் ஒரு பந்து கூட வீசப்படாமல் கைவிடப்பட்டது. 2-வது நாளான கடந்த 19-ம் திகதி நாணய சுழற்சியில் வென்ற நியூசிலாந்து அணி முதலில் இந்தியாவை துடுப்பாட்டம் செய்ய அழைத்தது.
இதன்படி, இந்திய அணி முதல் இன்னிங்சில் 217 ஓட்டங்களுக்கு ஆட்டமிழந்தது. பின்னர் நியூசிலாந்து அணி தனது முதல் இன்னிங்சை ஆடியது.
தொடக்க ஆட்டக்காரர்கள் இருவரும் அவசரமின்றி மிக பொறுமையாக ஆடினர். 3-வது நாள் முடிவில் நியூசிலாந்து அணி 49 ஓவர்களில் 2 விக்கெட்டுக்கு 101 ஓட்டங்கள் எடுத்தது.
ஆனால், 4-வது நாள் ஆட்டம் மழை காரணமாக ஒரு பந்துகள் கூட வீசப்படாமல் ரத்து செய்யப்பட்டது. இந்நிலையில், போட்டியின் 5-வது நாள் ஆட்டம் இன்று நடைபெற்றது.
மழை காரணமாக ஆட்டம் சுமார் 1 மணி நேரம் கால தாமதமாக தொடங்கியது. ஆட்டம் தொடங்கியது முதலே இந்திய பந்து வீச்சாளர்களின் ஆதிக்கம் அதிக அளவில் இருந்தது.
நியூசிலாந்து வீரர்களை ரன் எடுக்க விடாமல் இந்திய வீரர்கள் சிறப்பாக பந்து வீசினர். பொறுப்புடன் ஆடிய நியூசிலாந்து அணியின் கேப்டன் 49 ஓட்டங்கள் எடுத்தார்.
இறுதியில் நியூசிலாந்து அணி அனைத்து விக்கெட்டுகளையும் இழந்து 249 ஓட்டங்கள் எடுத்தது. இதன் மூலம் முதல் இன்னிங்சில் நியூசிலாந்து அணி இந்தியாவை விட 32 ஓட்டங்கள் முன்னிலையில் உள்ளது.
இந்திய அணியில் முகமது ஷமி அதிகபட்சமாக 4 விக்கெட்டுகளையும், இஷாந்த் ஷர்மா 3 விக்கெட்டுகளையும், அஷ்வின் 2 விக்கெட்டுகளையும், ஜடேஜா 1 விக்கெட்டை வீழ்த்தினர்.
32 ஓட்டங்கள் பின்தங்கிய நிலையில் இந்தியா இரண்டாவது இன்னிங்சை தொடங்கியது. தொடக்க ஆட்டக்காரர்களாக ரோகித் சர்மாவும், சுப்மான் கில்லும் களமிறங்கினர்.
சுப்மான் கில் 8 ஓட்டங்களில் சவுத்தியிடம் அவுட்டாகி வெளியேறினார். நிதானமாக ஆடி வந்த ரோகித் சர்மா 30 ஓட்டங்களில் சவுத்தியிடம் வீழ்ந்தார்.
புஜாராவும், அடுத்து களமிறங்கிய அணித் தலைவர் விராட் கோஹ்லியும் மேற்கொண்டு விக்கெட் விழாமல் பார்த்துக் கொண்டனர்.
ஐந்தாம் நாள் ஆட்ட முடிவில் இந்தியா 2 விக்கெட் இழப்புக்கு 64 ஓட்டங்கள் எடுத்துள்ளது. புஜாரா 12 ஓட்டங்களுடனும், கோஹ்லி 8 ஓட்டங்களுடனும் ஆட்டமிழக்காமல் உள்ளனர்.
நியூசிலாந்து சார்பில் சவுத்தி 2 விக்கெட் வீழ்த்தினார்.