கொரோனாவிலிருந்து குணமடைவோரில் எட்டில் ஒருவர் 140 நாட்களுக்குள் உயிரிழக்கிறார்: அதிரவைக்கும் ஆய்வு முடிவுகள்

Corona Death Survivors 140days Hospitalized patients

By Balakumar Jan 19, 2021 09:41 AM GMT

Balakumar

in ஐக்கிய இராச்சியம்

Report

கொரோனாவிலிருந்து குணமடைவோரில் எட்டில் ஒருவர் 140 நாட்களுக்குள் உயிரிழக்கிறார் என்னும் அதிரவைக்கும் தகவல் ஒன்று வெளியாகியுள்ளது.

மருத்துவமனையில் அனுமதிக்கப்பட்டு சிகிச்சைக்குப்பின் குணமடைந்து வீடு திரும்பும் கொரோனா நோயாளிகளில் கிட்டத்தட்ட மூன்றில் ஒரு பகுதியினர் ஐந்து மாதங்களுக்குள் மீண்டும் மருத்துவமனையில் அனுமதிக்கப்படுவதாகவும், எட்டில் ஒருவர் கொரோனா தொடர்பான பிரச்சினைகளால் உயிரிழப்பதாகவும் ஆய்வு ஒன்றின் முடிவுகள் தெரிவித்துள்ள தகவல் அதிர்ச்சியளிப்பதாக உள்ளது.

Leicester பல்கலைக்கழகமும் தேசிய புள்ளிவிவரங்கள் அலுவலகமும் இணைந்து மேற்கொண்ட ஆய்வு ஒன்றில், கொரோனாவின் முதல் அலையின்போது மருத்துவமனையிலிருந்து குணமடைந்து வீடு திரும்பிய 47,780 பேரில் 29.4 சதவிகிதத்தினர் 140 நாட்களுக்குள் மீண்டும் உடல் நல பிரச்சினைகள் ஏற்பட்டு மருத்துவமனைகளில் அனுமதிக்கப்பட்டதும், அவர்களில் 12.3 சதவிகிதத்தினர் உயிரிழந்துள்ளதும் தெரியவந்துள்ளது.

கொரோனா தொற்றால் ஏற்பட்ட நீண்ட கால விளைவுகளால், கொரோனாவிலிருந்து குணமடைந்தவர்களில் பலருக்கு இதய பிரச்சினைகளும், நீரிழிவு மற்றும் நீண்ட கால கல்லீரல் பிரச்சினைகளும், சிறுநீரக பிரச்சினைகளும் ஏற்பட்டுள்ளன.

இந்த முடிவுகள் அதிர்ச்சியளிக்கும் வகையில் அமைந்துள்ளன என்றாலும், இந்த ஆய்வு ஆரம்ப கட்ட முடிவுகளின் அடிப்படையிலானது மட்டுமே என்றும், மேலும் இந்த முடிவுகள் தொடர்பில் ஆய்வுகள் மேற்கொள்ளப்படவேண்டியுள்ளன என்பதும் இவ்விடத்தில் குறிப்பிடத்தக்கது.