ரஷ்யக் கொலைக்களத்தில் சிக்கிய உக்ரேனிய வீரரின் 491 நாட்கள்: பதைபதைக்க வைக்கும் சம்பவம்

He spent 491 days stranded in the kill zone: அவர் ஆபத்தான பகுதியில் 491 நாட்கள் சிக்கியிருந்தார்.

491 நாட்களை மரணப் பகுதியில் கழித்து, கடும் குளிரால் இடது காலை இழந்த நிலையில், மழுங்கிய கத்தியைக் கொண்டு தனது வலது காலையும் நீக்க வேண்டிய கட்டாயத்திற்கு ஆளான உக்ரேனிய வீரரின் பதைபதைக்க வைக்கும் சம்பவம் வெளியாகியுள்ளது.

தனித்து விடப்பட்டிருந்தார்

போர்க்களத்திற்கு அனுப்பப்பட்டதன் பின்னர், 231 நாட்களாக, அந்த உக்ரேனிய வீரர் தனித்து விடப்பட்டிருந்தார்; கைவிடப்பட்ட பள்ளி ஒன்றில் இருந்த வார்ப்பிரும்பு உலையினுள் அவர் பதுங்கியிருந்தார்.

அவருடன் இருந்த ஒரே தோழரான, பாஸ்கி (Baski) என்ற குறியீட்டுப் பெயர் கொண்ட வீரர் கொல்லப்பட்ட பிறகு, அவர் இவ்வாறு தனித்து விடப்பட்டிருந்தார்.

கடந்த குளிர்காலத்தில், அவர்கள் தங்கள் முதல் எட்டு மாதங்களைக் கழித்த இடமான, இடுக்கமான நிலத்தடி கான்கிரீட் வடிகால் குழாயில் ஏற்பட்ட வெள்ளப்பெருக்கின் காரணமாகத் தப்பி ஓட வேண்டிய கட்டாயம் ஏற்பட்டதால், அவரும் பாஸ்கியும் இந்தப் பள்ளியில் தஞ்சம் புகுந்தனர்.

ஆனால், கிழக்கு உக்ரைனின் கார்கிவ் பிராந்தியத்தில் உள்ள இந்த நிலையைச் சுற்றி ஏராளமான எதிரி விமானங்கள் பறந்ததால், அவர்களை வெளியேற்றுவது சாத்தியமற்றதாகியது.

ஈரான் அரசாங்கத்தைக் கவிழ்ப்பதே ஒரே வழி... அச்சுறுத்தல் குறித்து நெதன்யாகு

இந்த நிலையிலேயே, ஒரு ரஷ்ய ட்ரோன் அவர்களின் இருப்பிடத்தைக் கண்டறிந்து, பாஸ்கி என்ற குறியீட்டுப் பெயர் கொண்ட வீரரை அவரது 50-வது பிறந்தநாளில் கொன்றது.

அத்துடன், கோஸ்டியான்டின் வ்லாசென்கோ படுகாயமடைந்த நிலையில் தனித்து விடப்பட்டார். அக்டோபர் 4 அன்று, உக்ரைனின் 92-வது தனித்த தாக்குதல் படைப்பிரிவு, பெட்ரோபாவ்லிவ்காவில் இருந்த வ்லாசென்கோ என்பவரின் மறைவிடத்திற்கு, பெருமளவில் மாற்றியமைக்கப்பட்ட ஒரு குண்டுவீச்சு ட்ரோனை அனுப்பி, இராணுவ வரலாற்றிலேயே முதன்முறையாக ட்ரோன் மூலம் காயமடைந்த வீரர் ஒருவரை அங்கிருந்து வெளியேற்றி மீட்டது.

தற்போது மருத்துவமனையில் சிகிச்சையில் இருக்கும் வ்லாசென்கோ தனது வெளியேற்ற நடவடிக்கைக்குப் பின்னால் இருந்த அசாதாரணமான கதையை வெளிப்படுத்தியுள்ளார்.

எட்டு மாதங்கள்

உக்ரைன் ஜனாதிபதி ஜெலென்ஸ்கியின் சொந்த ஊரான Kryvyi Rih-ஐ சேர்ந்தவர் கோஸ்டியான்டின் வ்லாசென்கோ. லொறி சாரதியான இவருக்கு போர் காரணமாக உக்ரைனின் 30-வது இயந்திரமயமாக்கப்பட்ட படைப்பிரிவின் 2-வது பட்டாலியனில் ஒரு பதவி வழங்கப்பட்டது.

கடந்த ஆண்டு ஜூன் 2 அன்று, காயமடைந்த வீரர் ஒருவரை வெளியேற்றுமாறு வ்லாசென்கோவுக்கு உத்தரவிடப்பட்டது. அங்கே அவர் பாஸ்கியை சந்தித்ததுடன், ஒரு கான்கிரீட் வடிகால் குழாயில் இருவரும் ரஷ்ய நடமாட்டத்தைக் கண்காணித்து வந்தனர்.

வ்லாசென்கோவும் பாஸ்கியும் மாறி மாறி அந்த பாதுகாப்பிடத்தில் ஒளிந்துகொள்வார்கள்; அதே வேளையில் மற்றவர் மேலே இருந்த குழாயில் காவல் காப்பார். அவர்கள் இரண்டு மாதங்களுக்குப் பிறகு தங்கள் பணியிடங்களிலிருந்து மாற்றப்பட்டிருக்க வேண்டும், ஆனால் விரைவில் ரஷ்யாவின் 'மாவிக்' (Mavic) ட்ரோன்கள் வானத்தை ஆக்கிரமித்துக்கொண்டதால், அங்கிருந்து வெளியேற முடியாத சூழல் ஏற்பட்டது.

அந்த கான்கிரீட் வடிகால் குழாயில் எட்டு மாதங்கள் கழித்த நிலையில், இந்த ஆண்டு பிப்ரவரி 14 அன்று வெள்ளம் ஏற்பட, அங்கிருந்து இருவரும் வெளியேறி, சிதைந்த பள்ளி ஒன்றில் தஞ்சம் புகுந்தனர்.

கடுமையானப் பசியால் ஒரு நாள் இரவு மறைவிடத்தில் இருந்து வெளியே வந்த பாஸ்கியை ரஷ்ய ட்ரோன் அடையாளம் கண்டு தாக்கியது. வ்லாசென்கோவால் அவரை காப்பாற்ற முடியாமல் போக, அவரது 50வது பிறந்தநாள் அன்று மரணமடைந்துள்ளார்.

பிப்ரவரி 16 ஆம் திகதி ரஷ்ய வீரர்கள் வ்லாசென்கோ மறைந்திருக்கும் இடத்தையும் அடையாளம் கண்டு, சரணடைய வேண்டும் என உத்தரவிட்டுள்ளனர். ஆனால் அவர் அதற்கு மறுத்துள்ளார்.

ரஷ்ய ட்ரோன்களிடம் இருந்து தப்பிய அவருக்கு, மார்ச் மாதத்தில் தனது வலது காலை இழக்க வேண்டிய சூழல் ஏற்பட்டது. இருப்பினும், ரஷ்யர்களின் கண்களில் மண்ணைத் தூவி உக்ரைன் தரப்பு அவருக்கு ட்ரோன் மூலம் சாக்லேட்டுகள், இனிப்புகள், தேநீர் மற்றும் சிகரெட்டுகளை அனுப்பி வந்துள்ளது.

இறுதியில் ஒரு நாள், உக்ரைன் இராணுவத்தில் இருந்து அவருக்கு தகவல் கிடைத்துள்ளது, அவரை மீட்கும் நடவடிக்கை முன்னெடுக்கப்பட்டு வருகிறது என்று. 491 நாட்களுக்குப் பிறகு கோஸ்டியான்டின் வ்லாசென்கோ உக்ரைன் வீரர்களால் ட்ரோன் மூலம் மீட்கப்பட்டார். வரலாற்றில் வான்வழி ட்ரோன் மூலம் போர்க்களத்தில் இருந்து வெளியேற்றப்பட்ட முதல் வீரர் இவரே.