அமெரிக்க வேலைவாய்ப்புகள் வெளிநாட்டு மோசடிக்காரர்களுக்கானவை அல்ல... ஜேடி வேன்ஸ் எச்சரிக்கை

அமெரிக்க வேலைவாய்ப்புகளைப் பாதிக்கும் வகையில் H-1B மற்றும் PERM பணி விசா திட்டங்களைத் தவறாகப் பயன்படுத்தியதாகக் குற்றம் சாட்டப்பட்டவர்களுக்கு அமெரிக்கத் துணை ஜனாதிபதி ஜேடி வேன்ஸ் எச்சரிக்கையை விடுத்துள்ளார்.

மோசடிக்காரர்கள்

H-1B மற்றும் PERM பணி விசா திட்டங்கள் தொடர்பான மோசடிக் குற்றச்சாட்டுகள் குறித்து அமெரிக்கத் தொழிலாளர் துறை ஒரு முக்கிய விசாரணையைத் தொடங்கியுள்ள நிலையிலேயே துணை ஜனாதிபதியின் எச்சரிக்கை வெளியாகியுள்ளது.

புதன்கிழமையன்று மில்வாக்கியில் உள்ள விஸ்கான்சின் ஏர் நேஷனல் கார்டின் (Wisconsin Air National Guard) 128-வது வான்வழி எரிபொருள் நிரப்பும் பிரிவு தளத்திற்குச் சென்றிருந்தபோது, ​​

விசா முறையைத் தவறாகப் பயன்படுத்தும் வெளிநாட்டு மோசடிக்காரர்கள் என்று தான் குறிப்பிட்டவர்கள் மீது விசாரணை நடத்தவும், அதற்கான சம்மன்களை (subpoenas) அனுப்பவும் தொழிலாளர் துறை ஏற்கனவே நடவடிக்கைகளைத் தொடங்கிவிட்டதாக வேன்ஸ் அங்கு கூடியிருந்தவர்களிடம் கூறினார்.

நம்மிடம் H-1B விசா திட்டம் என்ற ஒன்று உள்ளது. மோசடி தடுப்புப் பணிக்குழு எவ்வளவு விரிவானது என்பதை இது காட்டுகிறது; நாங்கள் உங்கள் வரிப்பணத்திற்காகப் போராடுகிறோம், ஆனால் அதே நேரத்தில் மோசடிக்காரர்கள் இந்த விசா திட்டங்களைத் தவறாகப் பயன்படுத்தாமல் இருப்பதையும் உறுதிசெய்கிறோம் என்றார்.

எம்பாப்பே, டெம்பலே அதிரடி... மொராக்கோவை ஊதித் தள்ளி அரையிறுதிக்கு நுழைந்த பிரான்ஸ்

தொழிலாளர் நலத்துறையின் தலைமை ஆய்வாளர் அலுவலகம் (OIG) இந்த விசாரணையை நடத்தி வருகிறது. மோசடியான விசா விண்ணப்பங்கள், வெளிநாட்டுத் தொழிலாளர்களைச் சுரண்டுதல் மற்றும் அமெரிக்கத் தொழிலாளர்களின் வருமானத்தைக் குறைத்திருக்கக்கூடிய நடைமுறைகள் ஆகியவை அடங்கிய திட்டங்களைக் கண்டறிந்துள்ளதாக அந்த அலுவலகம் தெரிவித்துள்ளது.

மேலும், அமெரிக்க துணை ஜனாதிபதி ஜேடி வேன்ஸ் தலைமையிலான, மோசடியை ஒழிப்பதற்கான பணிக்குழுவின் ஒரு பகுதியாக இந்த விசாரணை நடைபெறுகிறது என ஃபாக்ஸ் பிசினஸ் செய்தி நிறுவனம் தெரிவித்துள்ளது.

தொழிலாளர் கடத்தல் மற்றும் பிற மோசடியான தொழிலாளர் நடைமுறைகளுடன், இந்த வேலைவாய்ப்பு விசாவின் தவறான பயன்பாடு குறித்த குற்றச்சாட்டுகள் தொடர்பாக அமெரிக்க தொழிலாளர் துறை ஒரு விசாரணையைத் தொடங்கியுள்ள நிலையில், ட்ரம்ப் நிர்வாகம் எச்-1பி விசாக்கள் தொடர்பான கவலைகளை மீண்டும் எழுப்பியுள்ளது.

காக்னிசன்ட்

அதிகாரிகள் இந்த விசாரணையை அறிவித்தபோது, ​​ஆய்வுக்கு உட்படுத்தப்படும் நிறுவனங்களின் பட்டியலில், அமெரிக்காவைத் தலைமையிடமாகக் கொண்டதும் தனது ஊழியர்களில் பெரும்பகுதியினரை இந்தியாவில் கொண்டிருப்பதுமான தகவல் தொழில்நுட்பச் சேவை நிறுவனமான 'காக்னிசன்ட்' (Cognizant)-உம் குறிப்பிடப்பட்டது.

இந்த நிலையில், அமெரிக்கத் தொலைக்காட்சி நேர்காணல் ஒன்றில் பேசிய அமெரிக்கத் தொழிலாளர் துறையின் ஆய்வாளர் ஜெனரல் அந்தோனி டி’எஸ்போசிட்டோ, H-1B திட்டத்தைத் தவறாகப் பயன்படுத்தும் அல்லது முறைகேடு செய்யும் பல நிறுவனங்களுக்கு அரசு தகவல் அனுப்பியுள்ளதாகத் தெரிவித்தார்.

நாங்கள் ஏற்கனவே டசின் கணக்கான சம்மன்களை அனுப்பியுள்ளோம்; மேலும் இது தொடர்பான ஒவ்வொரு தரவுகளையும் தொடர்ந்து விசாரிப்போம் என்று அவர் கூறியுள்ளார்.

மேலும், முன்னணி தகவல் தொழில்நுட்ப நிறுவனமான 'காக்னிசன்ட்' உள்ளிட்ட நிறுவனங்கள் குறித்த உளவுத் தகவல்கள் அரசுக்குக் கிடைத்துள்ளதாகவும் எஸ்போசிட்டோ குறிப்பிட்டார்.