சட்டப்படி ஆப்கானிஸ்தானுக்கு நானே அதிபர் - துணை அதிபர் அம்ருல்லா போட்ட ட்வீட்

ஆப்கானிஸ்தான் நாட்டின் அரசியலமைப்புச் சட்டப்படி தற்போதைய நிலையில் தானே அதிபர் என துணை அதிபர் அம்ருல்லா சாலே ட்விட்டரில் பதிவிட்டுள்ளார்.

ஆப்கானிஸ்தானில் இருந்து அமெரிக்க படைகள் வெளியேறத் தொடங்கியதையடுத்து, அந்நாட்டில் தாலிபான்கள் அதிகாரத்தை கைப்பற்றியுள்ளனர். தலைநகர் காபூல் உட்பட பல முக்கிய நகரங்களை தாலிபான்கள் அடுத்தடுத்து தங்கள் கட்டுப்பாட்டுக்குள் கொண்டு வந்துள்ளனர்.

கடந்த ஞாயிற்றுக்கிழமை தாலிபான்களால் தலைநகர் காபூல் சுற்றி வளைக்கப்பட்டதால் ஆப்கானிஸ்தானின் அதிபர் அஷ்ரப் கனி விமானம் மூலம் அந்நாட்டிலிருந்து வெளியேறினார். அவர் தஜிகிஸ்தான் நாட்டிற்கு தப்பிச் செள்ள முயன்று, பிறகு ஓமன் நாட்டிற்கு சென்றதாக சர்வதேச ஊடங்கள் செய்தி வெளியிட்டுள்ளன. தொடர்ந்து அவர் அமெரிக்காவிற்கு செல்ல திட்டமிட்டிருப்பதாக தகவல்கள் தெரிவிக்கின்றன.

இந்த நிலையில் ஆப்கானிஸ்தான் துணை அதிபர் அம்ருல்லா சாலே தனது ட்விட்டர் பக்கத்தில், தற்போதைய நிலையில் தானே ஆப்கானிஸ்தானின் அடுத்த அதிபர் என துணை அதிபர் அம்ருல்லா சாலே தெரிவித்துள்ளார்.

ட்விட்டரில் அவர் வெளியிட்டுள்ள பதிவில், “ஆப்கானிஸ்தான் நாட்டு அரசியலமைப்புச் சட்டத்தின்படி, நாட்டின் அதிபர் நாட்டை விட்டு வெளியேறினாலோ, தப்பிச் சென்றாலோ, உயிரிழந்தாலோ அல்லது பதவியை ராஜினாமா செய்தாலோ துணை அதிபர் நாட்டின் அதிபராக பொறுப்பு வகிக்க வேண்டும்"

அதிபர் அஷ்ரப் கனி நாட்டை விட்டு சென்றாலும், "தற்போது நாட்டில் நான் இருக்கிறேன், அதனால் நானே நாட்டின் அதிபர் பொறுப்பை ஏற்க வேண்டும். அனைத்து தலைவர்களும் தங்கள் ஆதரவை தர வேண்டும் என கேட்டுக் கொள்கிறேன்” என்று பதிவிட்டுள்ளார்.

Clarity: As per d constitution of Afg, in absence, escape, resignation or death of the President the FVP becomes the caretaker President. I am currently inside my country & am the legitimate care taker President. Am reaching out to all leaders to secure their support & consensus.

— Amrullah Saleh (@AmrullahSaleh2) August 17, 2021