மீண்டும் மீண்டும் பூஸ்டர் டோஸ் சாத்தியமில்லை: ஐரோப்பிய ஒன்றியம்

கொரோனாவுக்கு எதிராக மீண்டும் மீண்டும் பூஸ்டர் தடுப்பூசிகளை செலுத்துவது சாத்தியமான உத்தி அல்ல என்று ஐரோப்பிய ஒன்றியம் கூறுகிறது.

COVID-19 தொற்றுநோய்க்கான நீண்டகால பிரதிபலிப்பாக குறுகிய இடைவெளியில் மீண்டும் மீண்டும் பூஸ்டர் டோஸ்களை வழங்குவதற்கான உத்தி சாத்தியமில்லை என்று ஐரோப்பிய ஒன்றியத்தின் மருந்து ஒழுங்குமுறை ஆணையம் (EMA) தெரிவித்துள்ளது.

ஏற்கனவே இஸ்ரேலில் 60 வயதுக்கு மேற்பட்டவர்களுக்கு Pfizer-BioNTech கொரோனா தடுப்பூசியின் நான்காவது டோஸ் கொடுக்கப்பட்டு வருகிறது.

நோயெதிர்ப்பு குறைபாடுள்ள நோயாளிகள் மற்றும் சுகாதாரப் பணியாளர்களுக்கு Omicron வகை வைரஸிலிருந்து அவர்களைப் பாதுகாக்க கூடுதல் டோஸ்கள் வழங்கப்படுகின்றன.

ஆனால் ஒரு செய்தி மாநாட்டில் பேசிய EMA-ன் தடுப்பூசிகள் வியூகத்தின் தலைவர் மார்கோ காவலேரி (Marco Cavaleri), இரண்டாவது பூஸ்டர் ஒரு தற்செயல் நடவடிக்கையாக இருக்கலாம், குறிப்பாக மிகவும் பாதிக்கப்படக்கூடியவர்களுக்கு இது தற்காலிக பாதுகாப்பாக இருக்கலாம், ஆனால் மீண்டும் மீண்டும் அடிக்கடி தடுப்பூசி போடுவது நீண்ட காலத்திற்கு சாத்தியமில்லை என்று கூறினார்.

"நாம் நோய் எதிர்ப்புத்திறன் உருவாக்கத்தில் (immune response) சிக்கல்களைச் சந்திக்க நேரிடும், மேலும் நோய் எதிர்ப்புத்திறன் உருவாக்கம் நாம் விரும்புவது போல் சிறப்பாக இருக்காது," என்று அவர் கூறினார்.

"அதேபோல், தொடர்ச்சியாக பூஸ்டர் போடப்பட்டால் அது மக்களை நிச்சயமாக சோர்வடையச் செய்யும் ஆபத்து உள்ளது," என்று அவர் ஒரு செய்தி மாநாட்டில் கூறினார்.

கோவிட் தடுப்பூசியின் நான்காவது டோஸ் டென்மார்க்கிலும் "மிகவும் பாதிக்கப்படக்கூடிய குடிமக்களுக்கு" வழங்கப்படுகிறது.

கோவிட்-19 வைரஸின் பரவலுக்கு எதிரான போராட்டத்தில் இந்த நடவடிக்கை ஒரு "புதிய அத்தியாயத்தை" குறிக்கிறது என்று டென்மார்க் சுகாதார அமைச்சர் மேக்னஸ் ஹியூனிக் (Magnus Heunicke) கூறினார்.