பலத்த மழை, பெருவெள்ளம், நிலச்சரிவு அபாயம்... மில்லியன் மக்களை வெளியேற்றிய சீனா

China evacuates one million: ஷாங்காய் உள்ளிட்ட கிழக்குச் சீனப் பகுதிகளைச் சேர்ந்த மில்லியனுக்கும் அதிகமான மக்கள் குடியிருப்புகளிலிருந்து வெளியேற்றப்பட்டுள்ளனர்.

ஞாயிற்றுக்கிழமை மாலை 'டால்பின்' புயல் கரையைக் கடந்ததைத் தொடர்ந்து, ஷாங்காய் உள்ளிட்ட கிழக்குச் சீனப் பகுதிகளைச் சேர்ந்த 1 மில்லியனுக்கும் அதிகமான மக்கள் தங்கள் குடியிருப்புகளிலிருந்து வெளியேற்றப்பட்டுள்ளனர்.

சிவப்பு எச்சரிக்கை

வானிலை ஆய்வு மையத்தின் தகவலின்படி, முதலில் ஜெஜியாங் மாகாணத்தின் யுஹுவான் (Yuhuan) பகுதியில் மாலை 5:30 மணிக்கு, மணிக்கு 94 மைல் வரையிலான அதிகபட்ச காற்று வேகத்துடன் கரையைக் கடந்துள்ளது; அதன்பிறகு சுமார் ஒரு மணி நேரம் கழித்து வென்ஜோ (Wenzhou) நகரத்தில் இரண்டாவது முறையாகக் கரையைக் கடந்துள்ளது.

அந்தப் புயல் இப்பகுதி முழுவதும் போக்குவரத்தை முடக்கியதுடன், ஷாங்காயில் மட்டும் 1,500 விமானங்கள் ரத்து செய்யப்படும் நிலை ஏற்பட்டது.

சீன அதிகாரிகள் முன்னதாக 'டால்பின்' புயல் குறித்து சிவப்பு எச்சரிக்கையை விடுத்திருந்தனர்; ஆனால் திங்கட்கிழமை காலை அதனை வெப்பமண்டலப் புயலாகக் குறைத்து அறிவித்துள்ளனர்.

ஈரான் போரால் பின்னடைவு... ட்ரம்ப் அணியில் இருந்து ஆயுத நிறுவனங்களுக்குப் பறந்த ஆணை

புயல் தொடர்ந்து நிலப்பகுதியை நோக்கி நகர்ந்து வருகிறது; புதன்கிழமை வரை பலத்த மழை, கடுமையான வெள்ளம் மற்றும் நிலச்சரிவு அபாயம் குறித்து அதிகாரிகள் தொடர்ந்து எச்சரித்து வருகின்றனர்.

இந்த நிலையில், ஷான்டாங், ஹெனான், ஹூபே, அன்ஹுய், ஜியாங்சு, ஜெஜியாங் ஆகிய மாகாணங்களிலும் ஷாங்காய் நகரத்திலும் திங்களன்று பலத்த மழை பெய்யும் என்று முன்னறிவிக்கப்பட்டுள்ளது.

290 கப்பல்கள்

உள்ளூர் நிர்வாகங்கள் மக்களை வெளிப்புற நடவடிக்கைகளைத் தவிர்க்குமாறு வலியுறுத்தியுள்ளன; அதேவேளையில், டிஸ்னிலேண்ட் மற்றும் லெகோலேண்ட் ஆகியவற்றின் சில பகுதிகள் மற்றும் ஷாங்காயின் 'பண்ட்' (Bund) பகுதியில் உள்ள பல பார்வையாளர் தளங்கள் உட்பட முக்கிய சுற்றுலாத் தலங்கள் பலவும் மூடப்பட்டுள்ளன.

இதனிடையே, கடலோரப் பயணிகள் படகுச் சேவையின் 55 வழித்தடங்கள் இடைநிறுத்தப்பட்டதாகவும், கடற்பகுதியில் நடைபெற்று வந்த 115 கட்டுமானத் திட்டங்கள் அனைத்தும் நிறுத்தப்பட்டதாகவும், கட்டுமானப் பணிகளில் ஈடுபடும் 290 கப்பல்கள் பாதுகாப்பான நீர்நிலைகளுக்கு மாற்றப்பட்டதாகவும் ஃபுஜியான் கடல்சார் அதிகாரிகள் தெரிவித்துள்ளனர்.

ஜெஜியாங் மாகாணத்தின் சில பகுதிகளில் புவியியல் சார்ந்த பேரிடர்கள் ஏற்பட அதிக வாய்ப்புள்ளதாக அதிகாரிகள் எச்சரித்துள்ளனர்; அதேவேளையில், மலைப்பகுதி வெள்ளப்பெருக்குக்கான 'சிவப்பு' எச்சரிக்கை விடுக்கப்பட்ட பகுதிகளில் வசிப்பவர்கள், உள்ளூர் நிர்வாகத்தின் வெளியேற்ற உத்தரவுகளைப் பின்பற்றுமாறு அறிவுறுத்தப்பட்டுள்ளனர்.