நேபாளப் பெருவெள்ளம்... மொத்தமாக மூடி மறைக்கும் சீனா: திபெத் ஆர்வலர்கள் ஆவேசம்

China is concealing scale of flood disaster: நேபாள - திபெத் வெள்ளப் பேரிடரை மூடி மறைக்கும் சீனா.

நேபாள வெள்ளப் பேரிடரில் திபெத்தில் மட்டும் 300 குடியிருப்புகள் மொத்தமாக அடித்துச் செல்லப்பட்ட நிலையில், சீனாவின் உத்தியோகப்பூர்வ இறப்பு எண்ணிக்கை சமூக ஆர்வலர்களுக்கு சந்தேகத்தை ஏற்படுத்தியுள்ளது.

திபெத்தில் ஏற்பட்ட திடீர் வெள்ளம் குறித்த பொது விவாதங்கள் கட்டுப்படுத்தப்பட்டுள்ளன; பேரிடர் தொடர்பான தவறான தகவல்களைப் பகிர்ந்துகொண்டதற்காக குறைந்தது 10 பேர் தண்டிக்கப்பட்டுள்ளதாக அந்நாட்டுப் பாதுகாப்பு அதிகாரிகள் ஞாயிற்றுக்கிழமை அறிவித்தனர்.

என்ன தண்டனை அளிக்கப்பட்டது என்பது தொடர்பான தகவல் வெளியிடப்படவில்லை. இந்த நிலையில், 16 பேர் மரணமடைந்தது உறுதிப்படுத்தப்பட்டுள்ளதாகவும், 261 வெளிநாட்டினர் உட்பட 546 பேர் காணாமல் போயுள்ளதாகவும் சீன அதிகாரிகள் தெரிவித்துள்ளனர்.

ஆனால், குறைந்தது 300 வீடுகள் அடித்துச்செல்லப்பட்டுள்ளதாகவும், இறப்புகளின் எண்ணிக்கை கணிசமாக அதிகமாக இருக்கும் என்றும் தங்களது தரப்பு நம்புவதாக திபெத்துக்கான சர்வதேச ஆர்வலர்கள் அமைப்பு தெரிவிக்கிறது.

நேபாளத்தில் காணக்கூடிய காட்சிகள், திபெத்தில் மறைக்கப்பட்டுள்ள உண்மைகளை வெளிச்சம் போட்டுக் காட்டுவதாக அந்த அமைப்பின் தலைவர் தெரிவித்துள்ளார்.

கூட்டு விருத்தசேதனச் சடங்கில் பலியான 43 சிறுவர்கள்: நாடொன்றில் அதிரவைத்த சம்பவம்

திபெத்தில் சேல் (Sale), செர்சுங் (Serchung), லாபி (Labi) மற்றும் ரிசி (Rizi) ஆகிய நான்கு கிராமங்கள் மிகக் கடுமையாகப் பாதிக்கப்பட்டுள்ளன; அங்கு சுமார் 300 வீடுகள் மொத்தமாக சேதமடைந்திருப்பதாகவும், பலர் இன்னும் காணாமல் போயிருப்பதாகவும் தகவல்கள் தெரிவிக்கின்றன.

மேலும், திபெத்தில் பாதிக்கப்பட்டவர்களின் எண்ணிக்கை சீன அதிகாரிகள் தெரிவித்ததை விட மிக அதிகமாக இருக்கலாம் என்றே திபெத்துக்கான சர்வதேச ஆர்வலர்கள் அமைப்பின் தலைவர் தெரிவித்துள்ளார்.

ஆகஸ்ட் 26 அன்று, நேபாள-திபெத் எல்லையில் பனிப்பாறை ஒன்று சரிந்து விழுந்ததால் ஏற்பட்ட பெரும் வெள்ளம் முழு கிராமங்களையும் அழித்து உயிரிழப்புகளையும் ஏற்படுத்தியது.

நேபாளப் பகுதியில் இறந்தவர்களின் எண்ணிக்கை 900-ஐக் கடந்துள்ளது; மேலும் 4,000-க்கும் மேற்பட்டோரைக் காணவில்லை. மலையேற்றப் பயணிகளுக்கும் யாத்ரீகர்களுக்கும் புகழ்பெற்ற இப்பகுதிகளில், இந்தியா, அமெரிக்கா, பிரித்தானியா, அவுஸ்திரேலியா மற்றும் கனடா உள்ளிட்ட நாடுகளைச் சேர்ந்த சுற்றுலாப் பயணிகளின் நிலை குறித்த தகவல் ஏதும் இதுவரை கிடைக்கவில்லை.

இதனிடையே, எல்லையின் இருபுறமும் வழங்கப்பட்ட தகவல்களின் அளவில் பெரும் வித்தியாசம் காணப்படுவதாக திபெத் ஆதரவு அமைப்புகள் கூறுகின்றன.

வெளிநாட்டுப் பத்திரிகையாளர்கள் கடுமையான கட்டுப்பாடுகளை எதிர்கொள்ளும் திபெத்தில், சுயாதீனமான சரிபார்ப்பு மிகவும் கடினமானது. சீனாவுக்கு வெளியே உள்ள பத்திரிகையாளர்கள் மற்றும் ஆதரவு அமைப்புகளுடன் தகவல்களைப் பகிர்ந்துகொள்வதற்காகத் திபெத்தியர்கள் சிறைத்தண்டனையை எதிர்கொள்ள நேரிடலாம்.

அரசு நடத்தும் Tibet Daily நாளிதழில் ஆகஸ்ட் 27 அன்று வெளியான ஒரு செய்தியின்படி, எல்லைக்கு அருகே 1,000-க்கும் மேற்பட்டோர் அடித்துச் செல்லப்பட்டதாக வதந்திகளைப் பரப்பியதற்காக இரண்டு திபெத்தியர்கள் விசாரணைக்காக கைது செய்யப்பட்டனர்.

வெள்ளப் பேரிடர் நேபாளத்தில் மட்டுமே நடந்ததாகவும், திபெத்தில் அதனால் எந்த பாதிப்பும் இல்லை என்றும் சீன அரசாங்கம் சித்தரிக்கிறது என திபெத்துக்கான சர்வதேச ஆர்வலர்கள் அமைப்பின் தலைவர் தெரிவித்துள்ளார்.