ஈரானைத் தனிமைப்படுத்த ட்ரம்பின் திட்டம்... சீனா மற்றும் ரஷ்யாவால் முடக்கக்கூடும்

China and Russia could hobble Trump’s plans: ஈரானைத் தனிமைப்படுத்துவதற்கான ட்ரம்ப்பின் திட்டங்களுக்குச் சீனா மற்றும் ரஷ்யா முட்டுக்கட்டை போடக்கூடும்.

ஈரானுக்குப் பொருளாதார ரீதியாக உதவியை வழங்கும் எந்தவொரு நாட்டின் மீதும் நிதி ரீதியான தண்டனை நடவடிக்கைகளை மேற்கொள்ளப்போவதாக அமெரிக்க ஜனாதிபதி டொனால்ட் ட்ரம்ப் மிரட்டல் விடுத்துள்ளார்.

சீனா மற்றும் ரஷ்யா

இஸ்ரேல் காரணமாக ஈரானுடனான அமெரிக்காவின் அதிக செலவுமிக்க போர் தொடங்கி ஆறு மாதங்கள் கடந்துள்ள நிலையில், இந்த அச்சுறுத்தல் விடுக்கப்பட்டுள்ளது.

தனது பதவிக்காலத்தின் முற்பகுதியில் பல பாதிப்புகளை ஏற்படுத்திய வர்த்தகப் போர்களுக்குப் பிறகு, தனது வெளிவிவகாரக் கொள்கை இலக்குகளை அடைய அமெரிக்காவின் பொருளாதார வலிமையைப் பயன்படுத்திக்கொள்ள ட்ரம்ப் மேற்கொள்ளும் மிகச் சமீபத்திய முயற்சி இதுவாகும்.

ஆனால், ஈரானின் முதன்மையான வர்த்தகப் பங்காளிகளான சீனா மற்றும் ரஷ்யா மீது ட்ரம்பிற்கு உள்ள செல்வாக்கு அல்லது அழுத்தம் செலுத்தும் திறன் குறைவானதே என்று ஆய்வாளர்கள் கூறுகின்றனர்.

ரஷ்யா ஏற்கனவே அமெரிக்காவின் பரவலான பொருளாதாரத் தடைகளுக்கு உட்பட்டுள்ளதுடன், அமெரிக்கத் தலைமையிலான பொருளாதாரக் கட்டமைப்பிற்கு வெளியிலேயே பெரும்பாலும் செயல்பட்டு வருகிறது.

அதேவேளை, தனது சொந்தப் பொருளாதார நலன்களுக்கு உகந்ததாக இருக்கும்போது அமெரிக்காவின் பொருளாதாரத் தடைகளைப் புறக்கணிக்கத் தயாராக இருப்பதை சீனா பலமுறை வெளிப்படுத்தியுள்ளது.

ட்ரம்ப் எடுத்துள்ள இந்த முடிவும் தோல்வியில் முடியும் என்றே ஆய்வாளர் ஒருவரின் கருத்தாக உள்ளது. பாரம்பரியமாகப் பலதரப்பு ஒருங்கிணைப்பின் மூலம் செயல்படுத்தப்படும் ஒருவகை ஒருங்கிணைந்த தடைகளை, ட்ரம்ப் ஒருதலைப்பட்சமாக அமுல்படுத்த முயற்சிக்கிறார்.

தோட்டக் குழாய் பயன்பாட்டுத் தடை... பிரித்தானியாவின் மிகப்பெரிய நீர் விநியோக நிறுவனம் எச்சரிக்கை

அதாவது, சீனா, ரஷ்யா, ஐ.நா. பாதுகாப்பு சபையின் ஐந்து நிரந்தர உறுப்பு நாடுகள் ஆகியவற்றை இதில் இணைத்துக்கொள்வது அவசியமாகும். ஆனால் அதற்கான நகர்வுகளை அமெரிக்கா முன்னெடுக்காமல், முடிவுகளை அறிவித்துள்ளது.

ஈரான் மீதான இந்த நகர்வுகளை ட்ரம்ப் எடுத்த அதே நாளில், முக்கியமான இறக்குமதிகள் மற்றும் வணிகச் சந்தைகளுக்கான அணுகல் ஆகியவற்றிற்கு நீண்டகாலமாக ஈரானைச் சார்ந்திருந்த ஐக்கிய அரபு அமீரகம்,

தனது நாட்டின் மீது ஈரான் ராணுவம் இரண்டு ஏவுகணைகளை ஏவியதாகக் குற்றம் சாட்டியதைத் தொடர்ந்து, ஈரான் மீது காலவரையறையற்ற வர்த்தகத் தடையை அறிவித்தது.

இதன் பின்னணியில் அமெரிக்காவின் அழுத்தம் இருக்கலாம் என்றே பிராண்டீஸ் பல்கலைக்கழகத்தின் மத்திய கிழக்கு நாடுகளின் பொருளாதாரம் குறித்த பேராசிரியரான நாடர் ஹபிபி குறிப்பிடுகிறார்.

ஆனால், சீனா-ஈரான் இடையிலான வர்த்தகத்திற்கு இடையூறு விளைவிக்கும் அமெரிக்காவின் எந்தவொரு திட்டமும் குறிப்பிடத்தக்க தடைகளைச் சந்திக்கக்கூடும் என்றே ஆய்வாளர்களின் கருத்தாக உள்ளது.

பகுப்பாய்வு நிறுவனமான Kpler-இன் தரவுகளின்படி, 2025-ஆம் ஆண்டில் ஈரான் ஏற்றுமதி செய்த எண்ணெயில் 80 சதவீதத்தை சீனா வாங்கியுள்ளது.

இதனால், சீனாவின் எண்ணெய் சுத்திகரிப்பு நிலையங்களை இலக்கு வைப்பது பெரும்பாலும் சவாலான ஒன்றாகும்; ஏனெனில், அவற்றில் பெரும்பாலானவை அமெரிக்க நிதி அமைப்பைச் சார்ந்திருக்காமல் சுதந்திரமாகச் செயல்படுபவை.

பிரச்சினையைத் தீர்க்க உதவாது

மேலும், அமெரிக்க நிதியமைச்சகம் அச்சுறுத்தியுள்ளபடி, ஈரானிய நிதிகளைக் கையாளும் முக்கிய சீன வங்கிகள் மீது பொருளாதாரத் தடைகளை விதிப்பது பாதிப்பை ஏற்படுத்தினாலும், அது ஒரு முக்கியமான கட்டத்தில் சீனாவைத் திருப்பித் தாக்கத் தூண்டவும் கூடும்.

இதனிடையே, ட்ரம்பின் பொருளாதார அழுத்த நடவடிக்கைக்குப் பதிலளித்துள்ள சீன வெளிவிவகார அமைச்சக செய்தித் தொடர்பாளர் லின் ஜியான், கூடுதல் தடைகள் பிரச்சினையைத் தீர்க்க உதவாது என்று கூறியுள்ளார்.

அடுத்த மாதம் அமெரிக்காவுக்குச் செல்லவிருக்கும் சீன ஜனாதிபதி ஜி ஜின்பிங்கின் பயணத்திற்கு முன்னதாக, சீனாவுடனான பதற்றத்தைக் கட்டுக்குள் வைத்திருக்கவே அமெரிக்கா முயன்று வருகிறது.

ஈரானைப் பொறுத்தவரை சீனாவை விட ரஷ்யா ஒரு சிறிய வர்த்தகப் பங்காளியாக இருந்தாலும், மேற்கத்திய நாடுகளின் தலையீடு அல்லது கட்டுப்பாடுகளைத் தவிர்க்கும் வகையிலான முக்கிய வர்த்தக மற்றும் இராணுவ உறவுகளைக் கட்டியெழுப்புவதில் மாஸ்கோவும் தெஹ்ரானும் பல ஆண்டுகளாக ஈடுபட்டு வந்துள்ளன.

கடுமையான பொருளாதாரத் தடைகளுக்கு உள்ளாகியுள்ள இந்த இரு நாடுகளும் ஜனவரி 2025-இல் 20 ஆண்டுகாலக் கூட்டாண்மை ஒப்பந்தத்தில் கையெழுத்திட்டன; ரஷ்ய எரிசக்தித் துறை அமைச்சர் செர்ஜி சிவிலேவின் கூற்றுப்படி, இந்த ஒப்பந்தம் 2025-ஆம் ஆண்டின் முதல் 11 மாதங்களில் அவற்றின் வர்த்தக அளவை 4.8 பில்லியன் டொலராக உயர்த்த உதவியது.

தடை விதிக்கப்பட்ட எண்ணெய் வர்த்தகத்தைத் தாண்டி, ரஷ்யாவும் ஈரானும் காஸ்பியன் கடல் வழியாக ஆயுதங்கள் மற்றும் ராணுவ உபகரணங்களையும் பரிமாறிக்கொண்டதாகத் தகவல்கள் தெரிவிக்கின்றன.

இந்த நிலையில், ஈரானின் வெளிவிவகார அமைச்சர் புதன்கிழமையன்று, ஈரானுக்கு எதிராக ட்ரம்ப் முன்னெடுத்துள்ள பொருளாதார நடவடிக்கைகளை கடுமையாகச் சாடினார்; இது அமெரிக்காவின் தோல்வியடைந்த கொள்கைகளின் தொடர்ச்சி என்றும், இது ட்ரம்ப் நிர்வாகத்திற்கு மேலும் பல தோல்விகளுக்கு வழிவகுக்கும் என்றும் அவர் கூறியுள்ளார்.