நேபாள-திபெத் பெருவெள்ளம்... சீனா விடுத்த 72 மணி நேர எச்சரிக்கை

China Warns Barrier Lake Breach: திபெத்-நேபாள எல்லையில் உள்ள தடுப்பு ஏரி உடையலாம் என சீனா எச்சரிக்கை.

இமயமலை எல்லைக் கடக்கும் இடத்திற்கு மேலே உள்ள ஒரு தடுப்பு ஏரியால் மீட்புப் பணிகளைச் சிக்கலாக்கக்கூடிய அபாயம் இருப்பதாக சீன அதிகாரிகள் கண்டறிந்துள்ளதாக சிசிடிவி செய்தி வெளியிட்டுள்ளது.

நிரம்பிய தடுப்பு ஏரி

சீன அரசு செய்தி நிறுவனம் வெளியிட்டுள்ள தகவலின் அடிப்படையில், பேரிடர் நிகழ்ந்த இடத்தின் வடகிழக்கில், சோசென் கோலா மற்றும் புரேபு சாங்போ ஆறுகள் சங்கமிக்கும் இடத்தில் அமைந்துள்ள அந்த ஏரியின் கண்காணிப்பு மற்றும் மதிப்பீட்டை சீனாவின் நீர்வள அமைச்சகம் அதிகரித்துள்ளது.

மேலும், மீட்பு நடவடிக்கைகளுக்கு உதவவும், இரண்டாம் நிலை சம்பவங்களைத் தடுக்கவும் இந்த நடவடிக்கை எடுக்கப்பட்டுள்ளதாகத் தெரிவிக்கப்பட்டுள்ளது.

வியாழக்கிழமை நிலவரப்படி 2 மில்லியன் கன மீற்றர் நீர் கொள்ளளவு கொண்டதாக மதிப்பிடப்பட்டுள்ள அந்தத் தடுப்பு ஏரி, ஏற்கனவே நிரம்பி வழிகிறது.

அடுத்த மூன்று நாட்களில் ஏரிக்குள் மேலும் 3 மில்லியன் கன மீற்றர் தண்ணீர் வந்து சேரும் என்று சீன மத்திய தொலைக்காட்சி செய்தி வெளியிட்டுள்ளது.

இதற்கிடையில், மீட்புப் பணிகளில் உள்ளூர் காவல்துறை மற்றும் ஆயுதப் படைகளுக்கு உதவ, பெய்ஜிங் மற்றும் செங்டுவிலிருந்து தீயணைப்பு மற்றும் மீட்புக் குழுக்களை சீனா அனுப்பியுள்ளது.

நேட்டோ உறுப்பினர்களைத் தாக்கக்கூடாது... ரஷ்யாவை எச்சரித்த சிஐஏ இயக்குனர்

கிரிசாங் (Gyirong) நகரின் மைய நகர்ப்புறப் பகுதிகளில் மின்சாரம் மற்றும் தகவல் தொடர்பு சேவைகள் மீண்டும் தொடங்கப்பட்டாலும், துறைமுகத்துடன் தொடர்புடைய பகுதிகளில் அவை துண்டிக்கப்பட்டதாக தகவல் தெரிவிக்கப்பட்டுள்ளது.

நேபாளம் மற்றும் திபெத்தில் ஏற்பட்டுள்ள பேரிடர் ஒரு தனித்த நிகழ்வு அல்ல. நிலையற்றதாகி வரும் இமயமலைப் பனி மண்டலமானது, உலகின் மிக அதிக மக்கள் தொகை கொண்ட பகுதிகளில் ஒன்றில் உள்ள சமூகங்கள், உள்கட்டமைப்பு மற்றும் நீர் விநியோகம் ஆகியவற்றிற்கு அச்சுறுத்தலாக அமைந்துள்ளது.

புதன்கிழமையன்று நேபாளம் மற்றும் திபெத்தில் ஏற்பட்ட பேரழிவுகரமான திடீர் வெள்ளப்பெருக்கு, பள்ளத்தாக்குகள் வழியாக இரைச்சலுடன் பாய்ந்து வந்து முழு கிராமங்களையும் அழித்ததில், குறைந்தது 389 பேர் உயிரிழந்தனர்; மேலும் 1,300-க்கும் மேற்பட்டோரைக் காணவில்லை.

மலையேற்றப் பயணிகளுக்கும் யாத்ரீகர்களுக்கும் மிகவும் பிரபலமான மலைப்பகுதியில், டசின் கணக்கான பாலங்களும் 25 மைல் நீளமுள்ள சாலைகளும் சேதமடைந்துள்ளதால், இந்தியா, அமெரிக்கா, பிரித்தானியா, அவுஸ்திரேலியா மற்றும் கனடா ஆகிய நாடுகளைச் சேர்ந்த நூற்றுக்கணக்கான சுற்றுலாப் பயணிகள் உட்பட, காணாமல் போனவர்களைக் கண்டறியும் முயற்சிகள் சிக்கலுக்குள்ளாகியுள்ளன.

டசின் கணக்கானோர்

இதனிடையே, திபெத்திய எல்லைக்கு அருகிலுள்ள நேபாளத்தின் சித்வான் மாவட்டத்தில், பேரிடர் பகுதியிலிருந்து பல மைல்கள் தொலைவில் ஆற்றின் கீழ்ப்பகுதியில் நூற்றுக்கணக்கான சடலங்களை மீட்புக் குழுவினர் கண்டெடுத்ததாகத் தெரிவிக்கப்பட்டுள்ளது.

காயமடைந்த டசின் கணக்கானோர் மேம்பட்ட மருத்துவ சிகிச்சைக்காக காத்மாண்டுவுக்குக் கொண்டு செல்லப்பட்டனர். மேலும், 100-க்கும் மேற்பட்டோர் நேபாள இராணுவத்தினரால் ஹெலிகொப்டர்கள் மூலம் மீட்கப்பட்டனர்.

அசுர வேகத்தில் வந்த பெருவெள்ளத்தினால் நேபாளத்தில் லொறிகள் கவிழ்ந்தன; குடியிருப்புகள், சாலைகள் மற்றும் மின் நிலையங்கள் அடித்துச் செல்லப்பட்டன.

அதேவேளையில், எல்லைக் கடப்புப் பகுதி ஒன்றில் ஏற்பட்ட நிலச்சரிவைத் தொடர்ந்து, பெருமளவிலான உயிரிழப்புகள் ஏற்பட்டிருக்கலாம் என்றும் திபெத் அதிகாரிகள் அச்சம் தெரிவித்துள்ளனர்.