நெருக்கடி கால நிதி... மத்திய கிழக்கு மோதலால் உலக வங்கியை நாடிய 27 நாடுகள்

ஈரான் போர் தொடங்கியதிலிருந்து, இருபத்தேழு நாடுகள், ஏற்கனவே உள்ள உலக வங்கித் திட்டங்களிலிருந்து விரைவாக நிதியுதவியைப் பெறக்கூடிய நெருக்கடி கால வழிமுறைகளை நடைமுறைப்படுத்த நடவடிக்கை எடுத்துள்ளன.

நெருக்கடிகளைச் சமாளிக்க

உலக வங்கியின் ஆவணங்களில், கோரப்படக்கூடிய நாடுகளின் பெயரோ அல்லது மொத்த நிதித் தொகையோ குறிப்பிடப்படவில்லை. பிப்ரவரி 28 அன்று மத்திய கிழக்கு மோதல் தொடங்கியதிலிருந்து,

மூன்று நாடுகள் புதிய ஆவணங்களுக்கு ஒப்புதல் அளித்துள்ளதாகவும், மற்ற நாடுகள் இன்னும் அந்தச் செயல்முறையை நிறைவு செய்துகொண்டிருப்பதாகவும் அந்த ஆவணத்தில் இருந்து தெரிய வருகிறது.

போரும், அதன் விளைவாக உலகளாவிய எரிசக்திச் சந்தைகளில் ஏற்பட்ட சீர்குலைவும், உலகளாவிய விநியோகத் தொடர்புகளைப் பாதித்துள்ளதோடு, இன்றியமையாத உர ஏற்றுமதிகள் வளரும் நாடுகளைச் சென்றடைவதையும் தடுத்துள்ளன.

ஒரே வாரத்தில் மூன்று மடங்கான பாதிப்பு எண்ணிக்கை... எச்சரிக்கும் உலக சுகாதார முகமை

இந்த நிலையில், போரின் பின்விளைவுகளான, ஆப்பிரிக்க நாடான கென்யாவில் கடுமையாக உயர்ந்துள்ள எரிபொருள் விலைகள் முதல், ஈராக்கின் எண்ணெய் வருவாயில் ஏற்பட்டுள்ள பெரும் வீழ்ச்சி வரை, பல்வேறு நெருக்கடிகளைச் சமாளிக்க, உலக வங்கியிடமிருந்து விரைவான நிதியுதவியை நாடி வருவதாக கென்யா மற்றும் ஈராக் அதிகாரிகள் உறுதிப்படுத்தியுள்ளனர்.

நெருக்கடியான சூழலில் பயன்படுத்திக்கொள்ளக்கூடிய, முன்னரே ஏற்பாடு செய்யப்பட்ட ஏதேனும் ஒரு வகையான நிதியளிப்பு வழிமுறையை அணுகும் வசதி பெற்றிருந்த 101 நாடுகளில், இந்த 27 நாடுகளும் அடங்கும்;

இதில், நாடுகள் தங்களுக்கு இன்னும் விடுவிக்கப்படாத நிதியில் 10 சதவீதம் வரை பயன்படுத்திக்கொள்ள அனுமதிக்கும் விரைவுப் பதிலளிப்புத் தெரிவு (Rapid Response Option) திட்டத்தில் இணைந்த 54 நாடுகளும் அடங்கும்.

சுமார் 100 பில்லியன் டொலர்

உலக வங்கியின் நெருக்கடித் தீர்வுத் தொகுப்பானது, நாடுகளை முன் ஏற்பாடு செய்யப்பட்ட அவசரக்கால நிதியுதவி, தற்போதுள்ள திட்ட இருப்புத் தொகைகள் மற்றும் விரைவாக விநியோகிக்கக்கூடிய நிதிக் கருவிகளைப் பயன்படுத்திக்கொள்ள அனுமதிக்கும் என்றும்; இதன் மூலம் சுமார் 20 பில்லியன் முதல் 25 பில்லியன் டொலர் வரையிலான நிதியை அணுக முடியும் என்றும் உலக வங்கியின் தலைவர் அஜய் பங்கா கடந்த மாதம் தெரிவித்திருந்தார்.

மட்டுமின்றி, ஆறு மாத காலத்தில் மொத்தத் தொகையை 60 பில்லியன் டொலராக உயர்த்தும் வகையில், வங்கியானது தனது முதலீட்டுத் தொகுப்பின் சில பகுதிகளை மறுசீரமைக்க முடியும் என்றும்; மேலும், மொத்தத் தொகையை சுமார் 100 பில்லியன் டொலர் அளவிற்கு உயர்த்தும் வகையிலான நீண்டகால மாற்றங்களும் சாத்தியம் என்றும் அவர் கூறியுள்ளார்.

இதனிடையே, சுமார் பன்னிரண்டு நாடுகள் இந்த உலகளாவிய கடன் வழங்கும் அமைப்பிடம் இருந்து, குறுகிய கால உதவியாக 20 பில்லியன் முதல் 50 பில்லியன் டொலர் வரை கோரும் எனத் தான் எதிர்பார்ப்பதாக சர்வதேச நாணய நிதியத்தின் தலைவர் கிறிஸ்டலினா ஜார்ஜீவா தெரிவித்துள்ளார்.