லங்காசிறி FM
கடைசி 4 டெஸ்டுகளிலும் தோல்வி: நெருக்கடியில் விராட் கோஹ்லி
Balakumar
in கிரிக்கெட்
விராட் கோஹ்லி தலைமையில் இந்திய அணி விளையாடிய நான்கு டெஸ்டுகளில் தொடர்ந்து தோல்வியடைந்துள்ளது ஒரு அணித்தலைவராக அவரை நெருக்கடியில் தள்ளியுள்ளதாக கூறப்படுகிறது.
இங்கிலாந்து கிரிக்கெட் அணி, இந்தியாவில் சுற்றுப்பயணம் செய்து 4 ஆட்டங்கள் கொண்ட டெஸ்ட் தொடரில் விளையாடுகிறது.
இதில் முதல் டெஸ்ட் சென்னை சேப்பாக்கம் எம்.ஏ. சிதம்பரம் மைதானத்தில் நடைபெற்றது. இந்த டெஸ்டில் இங்கிலாந்து அணி மிகச்சிறப்பாக விளையாடி 227 ஓட்டங்கள் வித்தியாசத்தில் வென்றுள்ளது.
அவுஸ்திரேலியாவுக்குச் சுற்றுப்பயணம் மேற்கொண்ட இந்திய அணி, ஒருநாள் தொடரை 1-2 எனத் தோற்றது எனினும் டி20 தொடரை 2-1 என வென்றது.
டெஸ்ட் தொடர் 1-1 என சமனில் இருந்த நிலையில் 4-வது டெஸ்ட் பிரிஸ்பேனில் நடைபெற்றது. இதில் கடைசி நாளன்று கடினமான இலக்கை விரட்டி டெஸ்ட் தொடரை வென்றது இந்திய அணி.
முதல் டெஸ்டில் 36 ஓட்டங்களுக்கு ஆட்டமிழந்து மோசமாகத் தோற்றது கோஹ்லி தலைமையிலான இந்திய அணி.
அதன்பிறகு ரஹானே தலைமையில் விளையாடிய இந்திய அணி, மெல்போர்ன் டெஸ்டை வென்றது.
சிட்னியில் நடைபெற்ற 3-வது டெஸ்டைக் கடுமையாகப் போராடி டிரா செய்தது. 4-வது டெஸ்டில் கடினமான இலக்கை 5-ம் நாளில் விரட்டி பிரிஸ்பேன் டெஸ்டை வென்று டெஸ்ட் தொடரையும் பார்டர் கவாஸ்கர் கிண்ணத்தையும் கைப்பற்றியது.
அவுஸ்திரேலியாவில் கோஹ்லி தலைமையிலான இந்திய அணி, முதல் டெஸ்டில் தோற்றது. இதன்பிறகு மீதமுள்ள மூன்று டெஸ்டுகளுக்கும் தலைமை தாங்கி 2-1 எனத் தொடரை வென்று கொடுத்தார் ரஹானே.
இதனால் இந்திய டெஸ்ட் அணிக்கு ரஹானே கேப்டனாக இருக்க வேண்டும் எனப் பலரும் விருப்பம் தெரிவித்தார்கள்.
இந்நிலையில் சென்னை டெஸ்டிலும் கோஹ்லி தலைமையிலான இந்திய அணி தோற்றுள்ளது. கோஹ்லி தலைமையில் கடைசியாக விளையாடிய 4 டெஸ்டுகளிலும் இந்திய அணி தோல்வி அடைந்துள்ளதால் கோஹ்லிக்குப் புதிய நெருக்கடி ஏற்பட்டுள்ளது.
கடந்த வருடம் பிப்ரவரியில் நியூசிலாந்துடன் விளையாடிய 2 டெஸ்டுகளிலும் இந்திய அணி தோற்றது.
வெலிங்டன் டெஸ்டை 10 விக்கெட் வித்தியாசத்திலும் கிறைஸ்ட்சர்ச் டெஸ்டை 7 விக்கெட் வித்தியாசத்திலும் வென்றது நியூசிலாந்து அணி.
இதன்பிறகு அவுஸ்திரேலியாவில் அடிலெய்ட் டெஸ்டில் 36 ஓட்டங்களுக்கு ஆட்டமிழந்தது இந்திய அணி.
இதனால் அந்த டெஸ்டை 8 விக்கெட் வித்தியாசத்தில் அவுஸ்திரேலியா வென்றது. தற்போது சென்னை டெஸ்டை 227 ஓட்டங்கள் வித்தியாசத்தில் வென்றுள்ளது இங்கிலாந்து அணி.
ஆனால், ரஹானே தலைமையேற்ற 5 டெஸ்டுகளில் ஒருமுறை கூட இந்திய அணி தோல்வியடையவில்லை என்பது குறிப்பிடத்தக்கது.
கொடிகாமம், Recklinghausen, Germany, Harrow, United Kingdom
14 Jul, 2025
யாழ்ப்பாணம், முகத்தான்குளம், செட்டிக்குளம், Liverpool, United Kingdom
20 Jun, 2025
