ஐரோப்பாவை வாட்டியெடுத்த வெப்ப அலை... 7 நாட்களில் 16,000 கடந்த இறப்பு எண்ணிக்கை

About 16,000 more people died: ஐரோப்பாவில் ஒரு வாரம் நீடித்த கடும் வெப்ப அலை உயிரிழப்புகளை 16,000-ஆக அதிகரித்தது.

ஜூன் மாதத்தில் ஒரு வார கால கடுமையான வெப்ப அலைக்குப் பிறகு ஐரோப்பாவில் இறப்புகள் வரலாறு காணாத வகையில் அதிகரித்தன.

இந்த இறப்புகளில் பெரும்பாலானவை, இதுபோன்ற அதிக வெப்பநிலைக்குப் பழக்கமில்லாத வடக்கு ஐரோப்பிய நாடுகளான பிரான்ஸ், பெல்ஜியம் மற்றும் ஜேர்மனியில் நிகழ்ந்துள்ளன.

வடமேற்கு நாடுகள்

ஐரோப்பாவில் வெப்ப அலை காரணமாக, வழக்கத்தை விட சுமார் 16,000 பேர் கூடுதலாக மரணமடைந்ததாக ஐரோப்பிய இறப்பு கண்காணிப்பு கூட்டமைப்பு ஒன்று பகுப்பாய்வில் தெரிவித்துள்ளது.

நியூயார்க் டைம்ஸ் வெளியிட்டுள்ள செய்தியில், ஐரோப்பா முழுவதும் வெப்பநிலை 37 டிகிரி செல்சியஸைத் தாண்டியபோது, ​​வடமேற்கு நாடுகளில் மட்டுமே இறப்புகள் அதிகரித்தன; ஏனெனில், அந்த நாடுகள் கடும் வெப்பத்தைச் சமாளிக்கத் தயாராக இருக்கவில்லை.

பிரித்தானியாவில் மில்லியன் கணக்கானோருக்கு அனுப்பப்பட்ட காட்டுத்தீ எச்சரிக்கை

வடக்குப் பகுதிகளில் குளிர்சாதன வசதியின் பயன்பாடு குறைவாக இருப்பது ஒரு அரசியல் விவகாரமாகவும் மாறியுள்ளது. இதற்கிடையில், தெற்கு ஐரோப்பிய நாடுகள் பல நூற்றாண்டுகளாக அதிக வெப்பத்தை எதிர்கொண்டு வருவதால், அந்த வெப்பத்தைச் சமாளிப்பதற்கான வழிகளை அவை கொண்டுள்ளன.

இதனிடையே, வைரஸ் சார்ந்த சுவாச நோய்கள் பரவலாகக் காணப்படும் குளிர்காலத்தை விட, ஜூன் மாதத்தில் வெப்ப அலை காரணமாக அதிக இறப்புகள் ஏற்பட்டன.

பொதுவாக ஐரோப்பாவில் வெப்ப அலைகள் ஏற்படுவது அரிது, கடைசியாக 2003-ஆம் ஆண்டில் ஏற்பட்ட வெப்ப அலை, பல்லாயிரக்கணக்கானோரின் உயிரைப் பறித்தது. 2022-ஆம் ஆண்டின் ஜூலை மாதத்தில் ஏற்பட்ட வெப்ப அலையின் காரணமாக 16,000-க்கும் மேற்பட்டோர் மரணமடைந்தனர்.

அக்காலகட்டத்தில் ஸ்பெயினில் வெப்பநிலை 46 டிகிரி செல்சியஸுக்கும் அதிகமாக உயர்ந்திருந்தது. பதிவு செய்யப்பட்டதிலேயே ஜூன் மாதத்தில்தான் வெப்பநிலை மிக அதிகமாக இருந்தபோதிலும், பருவநிலை மாற்றம் இன்னும் பல விளைவுகளைக் கொண்டுவரக்கூடும் என்று விஞ்ஞானிகள் எச்சரித்துள்ளனர்.

ஐந்தாவது வெப்ப அலை

மேலும், ஆறுகளில் வரலாறு காணாத அளவுக்கு நீர்மட்டம் குறைந்து, வரலாறு காணாத காட்டுத்தீயை மூட்டி, ஆயிரக்கணக்கான இறப்புகளுக்கும் காரணமாக அமைந்த சுட்டெரிக்கும் கடும் வெப்பத்தைத் தொடர்ந்து, ஐரோப்பாவின் பெரும்பாலான பகுதிகள் மற்றொரு வெப்ப அலைக்குத் தயாராகி வருகின்றன.

இந்த வாரம் பிரித்தானியா மற்றும் பிரான்சின் சில பகுதிகளில், வெப்பநிலை சுமார் 30 டிகிரி செல்சியஸாக இருக்கும் என்ற முன்னறிவிப்புகளுடன், கடுமையான வெப்ப எச்சரிக்கை ஏற்கனவே விடுக்கப்பட்டிருந்தது.

மிதமான மற்றும் குளிர்ந்த காலநிலைக்கு ஏற்றவாறு உள்கட்டமைப்பு வசதிகள் அமைக்கப்பட்டுள்ள பிரித்தானியாவில், இந்த கோடைக்காலத்தின் ஐந்தாவது வெப்ப அலை தாக்கத் தொடங்கவுள்ளதாக அந்நாட்டின் வானிலை ஆய்வு மையம் வார இறுதியில் எச்சரித்தது.

இதனிடையே, பிரான்ஸின் தேசிய வானிலை ஆய்வு மையமான Meteo-France திங்களன்று விடுத்துள்ள எச்சரிக்கை ஒன்றில், நாட்டின் தென்கிழக்குப் பகுதிகளில் வெப்பநிலை 35 டிகிரி செல்சியஸ் வரை உயரக்கூடும் என்றும், வாரத்தின் அடுத்தடுத்த நாட்களில் இந்த நிலை பரவலாகக் காணப்படும் என்றும் தெரிவிக்கப்பட்டுள்ளது.