ஆயுதங்களைக் கைவிட ஹமாஸ் படைகள் ஒப்புதல்: ட்ரம்ப் அளித்த வாக்குறுதி

காஸாவில் தங்கள் ஆயுதங்களைக் கைவிடுவதற்கான திட்டத்தை முன்னெடுக்கும் ஆவணம் ஒன்றை ஹமாஸ் மற்றும் பிற பாலஸ்தீனக் குழுக்கள் ஏற்றுக்கொண்டுள்ளன.

மகத்தான முன்னெடுப்பு

ஹமாஸ் படைகளின் இந்த முடிவை அமெரிக்க ஜனாதிபதி டொனால்ட் ட்ரம்ப், அமைதி மற்றும் பாதுகாப்பை நோக்கிய ஒரு மகத்தான முன்னெடுப்பு என்று குறிப்பிட்டுள்ளார்.

ஆயுதங்களைக் கைவிடுவதற்கான துல்லியமான செயல்வடிவத்தை 14 நாட்களுக்குள் தயாரிக்க வேண்டும் என்றும், சர்வதேச சரிபார்ப்பு அமைப்பின் ஒப்புதல் மற்றும் அனைத்துத் தரப்பினரின் உடன்பாட்டுக்கு உட்பட்டு அதற்கான கால அவகாசத்தை நீட்டிக்க வாய்ப்புள்ளது என்றும் அந்த ஒப்பந்தத்தில் குறிப்பிடப்பட்டுள்ளது.

இதனிடையே ஹமாஸ் தரப்பில் பேச்சுவார்த்தைகளில் ஈடுபட்ட காஸி ஹமாத் தெரிவிக்கையில், இந்தப் பேச்சுவார்த்தைகள் கடினமாகவும் சவாலாகவும் இருந்ததாகவும், சாத்தியமான சிறந்த தீர்வை எட்டுவதற்கு முயன்றதாகவும் குறிப்பிட்டுள்ளார்.

இருப்பினும், இஸ்ரேலியப் படைகள் தங்களது கடமைகளை நிறைவேற்றத் தவறினால், ஒப்பந்தத்தின் எந்தப் பகுதியையும் ஹமாஸ் படைகள் செயல்படுத்தாது என்றும் ஹமாத் கூறியுள்ளார்.

செங்கடல் முற்றுகையை எதிர்த்து புதிய கடற்படைக் கூட்டணி: அமெரிக்காவை நம்பாத வளைகுடா நாடுகள்

மேலும், ஆயுதங்களைக் கைவிடுவது என்பது காஸாவிலிருந்து இஸ்ரேல் படைகள் வெளியேறுவதையும், பாலஸ்தீனப் பகுதியில் ஜனாதிபதி ட்ரம்ப் உறுதி அளித்துள்ள மறுசீரமைப்புப் பணிகளில் ஏற்படும் முன்னேற்றத்தையும் பொறுத்தே அமையும் என்றும் ஹமாத் விளக்கமளித்துள்ளார்.

ஆனால், இந்த விவகாரத்தில் இதுவரை இஸ்ரேல் தரப்பில் இருந்து எவ்விதக் கருத்தும் வெளியாகவில்லை. இந்த நிலையில் ட்ரம்ப் தனது ட்ரூத் சமூக ஊடகத்தில் குறிப்பிடுகையில்,

பாலஸ்தீன மக்களுக்கு உதவ 'அமைதிக்கான வாரியத்துடன்' (Board of Peace) நெருக்கமாக இணைந்து செயல்படவுள்ள புதிய பாலஸ்தீன அரசாங்கத்தின் கீழ் காஸா நிர்வகிக்கப்படுவதை நோக்கிய ஒரு முக்கியமான படியாக இந்த ஒப்பந்தம் அமைந்துள்ளது என்றார்.

அதே வேளை, காஸா இனி பயங்கரவாதத் தாக்குதல்களுக்கான தளமாகப் பயன்படுத்தப்படாத நிலையில், இஸ்ரேல் தனக்குரிய பாதுகாப்பைப் பெறும் எனவும் ட்ரம்ப் குறிப்பிட்டுள்ளார்.

காஸாவிற்கு ஒரு தேசியக் குழு மற்றும் சர்வதேச நிலைப்படுத்தல் படை ஆகியவை நுழைவதோடு ஆயுதங்களைக் கைவிடும் நடவடிக்கை தொடங்கும்.

அதன்பின்னர், சர்வதேச சரிபார்ப்புக் குழுவின் கண்காணிப்பிலும் பாலஸ்தீனக் குழுக்களின் பங்கேற்புடனும், பட்டியலிடுதல் மற்றும் சேமித்து வைத்தல் செயல்முறையைத் தேசியக் குழு மேற்பார்வையிடும்.

இஸ்ரேலியப் படைகள்

ஆயுதங்களைக் கைவிடும் செயல்முறையானது, காஸாவிலிருந்து இஸ்ரேலியப் படைகள் படிப்படியாக விலக்கிக்கொள்ளப்படுவதோடும் தொடர்புடையது.

மேலும், இஸ்ரேலிடமோ அல்லது பாலஸ்தீனியர் அல்லாத எந்தவொரு அமைப்பிற்கோ ஆயுதங்கள் எதுவும் ஒப்படைக்கப்படக் கூடாது என்றும், காஸாவில் ஆயுதங்களை வைத்திருக்கும் ஒரே அமைப்பாக 'தேசியக் குழு' (National Committee) மட்டுமே இருக்க வேண்டும் என்றும் அந்த ஒப்பந்தத்தில் குறிப்பிடப்பட்டுள்ளது.

காஸா காவல்துறையினரிடம் உள்ள ஆயுதங்கள் முதலில் ஒப்படைக்கப்படும் என்றும், அதைத் தொடர்ந்து கனரக ஆயுதங்கள் பயன்பாட்டிலிருந்து நீக்கப்படும் என்றும் அதிகாரி ஒருவர் தெரிவித்துள்ளார்.

இத்திட்டத்தின் கீழ் காஸாவில் அனைத்து ராணுவ நடவடிக்கைகளும் நிறுத்தப்பட வேண்டும்; இருப்பினும், இந்தச் செயல்முறையைச் செயல்படுத்தக் கால அவகாசம் தேவைப்படும் என்றும் அந்த அதிகாரி குறிப்பிட்டார்.

கடந்த அக்டோபர் மாதம் ட்ரம்பின் மத்தியஸ்தத்தில் போர்நிறுத்தம் அமுலுக்கு வந்தாலும், இஸ்ரேல் போர்நிறுத்த ஒப்பந்தத்தை தொடர்ச்சியாக மீறியுள்ளது; அந்த ஒப்பந்தம் நடைமுறைக்கு வந்ததிலிருந்து 1,200-க்கும் மேற்பட்ட பாலஸ்தீனியர்களை இஸ்ரேல் படைகள் கொன்றுள்ளது,

மேலும் நிலப்பரப்புகளைக் கைப்பற்றி வருவதுடன், காஸாவிற்குள் மற்றும் அங்கிருந்து வெளியே மக்கள் மற்றும் சரக்குகள் செல்வதற்கான கட்டுப்பாடுகளையும் தொடர்ந்து விதித்து வருகிறது.

இந்த நிலையில், ஆயுதங்களைக் கைவிடுவது முழுமையடைந்ததும், இஸ்ரேல் காஸாவிலிருந்து வெளியேறும் என்றும், அதற்குப் பதிலாக ஒரு புதிய பாலஸ்தீனக் காவல் படையுடன் இணைந்து செயல்படும் சர்வதேச நிலைப்படுத்தல் படை அங்கு அமர்த்தப்படும் என்றும் ட்ரம்ப் கூறியுள்ளார்.