லங்காசிறி FM
ஹிட்லரை எதிர்த்து தேர்தலில் போட்டியிடும் ஜெலன்ஸ்கி: ஒரு வைரல் செய்தி
பிரான்சில் மேயர் தேர்தல்கள் நடைபெற்றுவரும் நிலையில், ஹிட்லரை எதிர்த்து ஜெலன்ஸ்கி போட்டியிடுவதாக கூறும் ஒரு செய்தி வைரலாகிவருகிறது.
ஹிட்லரை எதிர்த்து போட்டியிடும் ஜெலன்ஸ்கி
ஆம், பிரான்சிலுள்ள Arcis-sur-Aube நகரில் மேயர் தேர்தலில் போட்டியிடுபவர்களில் ஒருவரது பெயர் சார்லஸ் ஹிட்லர் (Charles Hittler).
வேடிக்கை என்னவென்றால், அவரை எதிர்த்து போட்டியிடும் ஒருவருடைய பெயர், ஜெலின்ஸ்கி (Antoine Renault-Zielinski, 28).
ஆக, ஜேர்மன் சர்வாதிகாரியான ஹிட்லரை எதிர்த்து, உக்ரைன் ஜனாதிபதியான ஜெலன்ஸ்கி போட்டியிடுகிறார் என இணையத்தில் வேடிக்கையாக செய்தி வெளியிட்டுவருகிறார்கள் பலர்.
என் பெயரால் எங்கள் ஊரே பிரபலமாகிவிட்டது. ஆனால், என் மனைவிதான் எனக்குக் கிடைத்த இந்த திடீர் ’புகழால்’ கண்ணீர் விட்டுக்கொண்டிருக்கிறார் என்கிறார் சார்லஸ்.
சார்லசின் தந்தை பெயர் ஹிட்லர். உன் பெயர் சர்வாதிகாரி ஹிட்லரின் பெயரைப் போல இருக்கிறது. அதை மாற்றிக்கொள் என அவரது உறவினர்கள் பலர் கூறினார்களாம்.
ஆனால், அந்த காலகட்டத்தில், அதாவது, 1949இல், பெயர் மாற்றுவது அவ்வளவு எளிதில்லையாம், அத்துடன், அதற்கு எக்கச்சக்கமான பணமும் செலவாகுமாம். ஆகவே, அவர் தன் பெயரை மாற்றாமல் அப்படியே விட்டுவிட்டார் என்கிறார் சார்லஸ்.
ஆக, அப்பா பெயர் மகனுக்கு வர, சார்லஸ், ஹிட்லராகிவிட்டார். விடயம் என்னவென்றால், சார்லசுடைய ஒரு மகள் மற்றும் மருமகள் பெயரும் ஹிட்லர் என முடிகிறதாம். அவர்களும் மேயர் தேர்தலில் போட்டியிடுகிறார்கள் என்பது குறிப்பிடத்தக்கது.
| உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள். |
