பிரான்ஸின் அந்த நடவடிக்கை... ஐரோப்பிய நாடுகளுக்கு கடும் எச்சரிக்கை விடுத்த ரஷ்யா

பிரான்சின் அணு ஆயுதங்களைச் சுமந்து செல்லும் திறன் கொண்ட குண்டுவீச்சு விமானங்களை நிலைநிறுத்துவதை ஏற்கும் எந்தவொரு ஐரோப்பிய நாடுகளுக்கும் ரஷ்யா எச்சரிக்கை விடுத்துள்ளது.

அச்சுறுத்தலை ஏற்படுத்துகிறது

ஒரு மோதல் ஏற்பட்டால், ரஷ்யா படைகளின் தாக்குதலுக்கு இந்த நாடுகள் இலக்காக மாறும் என்றும் ரஷ்யா குறிப்பிட்டுள்ளது. பிரெஞ்சு ஜனாதிபதி இமானுவல் மேக்ரான், நாட்டின் அணு ஆயுத வலுவை விரிவுபடுத்தும் திட்டங்களை மார்ச் மாதம் அறிவித்தார்.

அத்துடன், அணு ஆயுதங்களைச் சுமந்து செல்லும் திறன் கொண்ட தங்களது விமானங்களைத் தற்காலிகமாக நிறுத்துவதற்கு ஐரோப்பியக் கூட்டாளிகளை பிரான்ஸ் அனுமதிக்கக்கூடும் என்றும் அவர் தெரிவித்திருந்தார்.

இந்த நிலையில், வியாழக்கிழமை வெளியான ஒரு பேட்டியில், ரஷ்ய வெளிவிவகார துணை அமைச்சர் அலெக்சாண்டர் குருஷ்கோ, இது நேட்டோவின் அணுசக்தித் திறனை கட்டுப்பாடற்ற முறையில் அதிகரிப்பதன் ஒரு பகுதி என்றும், இது ரஷ்யாவிற்கு ஒரு உத்திசார் அச்சுறுத்தலை ஏற்படுத்துகிறது என்றும் கூறினார்.

இணையத்தில் தகவல்கள்... ஐரோப்பாவில் ரயில் பயணிகளின் கடவுச்சீட்டுகளை ரத்து செய்ய கோரிக்கை

மட்டுமின்றி, மற்ற ஐரோப்பிய நாடுகளில் பிரான்ஸ் அணு ஆயுதங்களை நிலைநிறுத்தக்கூடும் என்பது குறித்த ரஷ்யாவின் கவலையையும் அவர் வலியுறுத்தினார்.

சொந்தப் பாதுகாப்பிற்கு

இதனிடையே, பிரித்தானியா, ஜேர்மனி, போலந்து, நெதர்லாந்து, பெல்ஜியம், கிரீஸ், ஸ்வீடன் மற்றும் டென்மார்க் ஆகிய நாடுகளுடன் இதுபோன்ற ஏற்பாடுகள் குறித்து பிரான்ஸ் நிர்வாகம் விவாதித்து வருவதாக ஜனாதிபதி மேக்ரான் தெரிவித்துள்ளார்.

நேட்டோவின் ஐரோப்பிய உறுப்பு நாடுகள் தங்களது சொந்தப் பாதுகாப்பிற்கு அதிகப் பொறுப்பேற்கும் முயற்சியின் ஒரு பகுதியாகவே மேக்ரானின் இந்த முன்னெடுப்பு அமைந்துள்ளது.

மேலும், அமெரிக்க ஜனாதிபதி டொனால்ட் ட்ரம்ப் நேட்டோ கூட்டமைப்பை அடிக்கடி விமர்சித்ததைத் தொடர்ந்தும், நேட்டோ உறுப்பு நாடான டென்மார்க்கிடமிருந்து கிரீன்லாந்தின் கட்டுப்பாட்டைக் கைப்பற்றுவதாக அவர் விடுத்த அச்சுறுத்தல்களின் பின்னணியிலும் இந்த நகர்வு முன்னெடுக்கப்பட்டுள்ளது.

இந்த நிலையில், அணு ஆயுதங்கள் குறித்த எதிர்காலப் பேச்சுவார்த்தையானது, பிரெஞ்சு மற்றும் பிரித்தானிய ஆயுத பலம் மற்றும் அமெரிக்காவின் ஆயுத பலம் உள்ளிட்ட நேட்டோவின் ஒருங்கிணைந்த திறன்களைக் கணக்கில் எடுத்துக்கொள்ள வேண்டும் என்று குருஷ்கோ கூறியுள்ளார்.

இந்த வாரம் நேட்டோ, ரஷ்யா மற்றும் சீனாவின் அணு ஆயுதக் கொள்கைகளை விமர்சித்ததோடு, அதிக நிலைத்தன்மையை ஏற்படுத்துவதற்காக அமெரிக்காவுடன் இணைந்து செயல்படுமாறு அந்த நாடுகளை வலியுறுத்தியது.