பெருவெள்ளத்தில் தத்தளிக்கும் ஆசிய நாடொன்று... 300 கடந்த இறப்பு எண்ணிக்கை

இந்தோனேசியாவின் சுமத்ரா தீவில் சூறாவளி மழையைத் தொடர்ந்து ஏற்பட்ட வெள்ளம் மற்றும் நிலச்சரிவில் சிக்கி மரணமடைந்தவர்களின் எண்ணிக்கை 300 கடந்துள்ளதாக தகவல் வெளியாகியுள்ளது.

அடைமழை

இந்தோனேசியா, மலேசியா மற்றும் தாய்லாந்தின் பெரும்பகுதிகள் ஒரு வாரமாக சூறாவளியால் தூண்டப்பட்ட அடைமழையால் பாதிக்கப்பட்டுள்ளன, மலாக்கா ஜலசந்தியில் ஒரு அரிய வெப்பமண்டல புயல் உருவாகியுள்ளதாகவும் தெரிவிக்கப்பட்டுள்ளது.

சுமத்ரா தீவின் மூன்று மாகாணங்களில் சுமார் 80,000 பேர் வெளியேற்றப்பட்டும், நூற்றுக்கணக்கானோர் இன்னும் சிக்கித் தவித்து வரும் நிலையில், குறைந்தது 279 பேர் இன்னும் காணாமல் போயுள்ளதாக நாட்டின் பேரிடர் தணிப்பு முகமை தெரிவித்துள்ளது.

நிலச்சரிவுகளால் சாலைகள் துண்டிக்கப்பட்டு, தகவல் தொடர்பு உள்கட்டமைப்புகள் சேதமடைந்துள்ளதால் மிகவும் பாதிக்கப்பட்ட தீவின் வடக்குப் பகுதியில், மீட்புப் பணியாளர்கள் உதவி வழங்கவும், தளவாடப் பணிகளுக்காகவும் ஹெலிகொப்டர்களைப் பயன்படுத்தியுள்ளனர்.

நெருப்பு கோளமான இரண்டு ரஷ்ய எண்ணெய் கப்பல்கள்: மீட்புப் பணிகள் தீவிரம்

நிலச்சரிவால் சாலைகள் சேதமடைந்துள்ள நிலையில் மக்கள் சாலையின் ஒரு பகுதியில் சிக்கிக் கொண்டதாகவும் தெரிவிக்கின்றனர். தாய்லாந்தின் மலாக்கா ஜலசந்தியின் குறுக்கே, நாட்டின் தெற்குப் பகுதியில் ஏற்பட்ட வெள்ளத்தில் மரணமடைந்தவர்களின் எண்ணிக்கை 162 ஆக உயர்ந்துள்ளது.

இந்த நிலையில், இலங்கையில் Ditwah புயலால் ஏற்பட்ட நிலச்சரிவுகள் மற்றும் வெள்ளத்தில் சிக்கி குறைந்தது 153 பேர் மரணமடைந்துள்ளதாக அதிகாரிகள் தரப்பு உறுதி செய்துள்ளனர்.

மேலும் 191 பேர் காணாமல் போயுள்ளதாக கூறப்படும் நிலையில், நாடு முழுவதும் அரை மில்லியனுக்கும் அதிகமானோர் பாதிக்கப்பட்டுள்ளதாகவும் தகவல் வெளியாகியுள்ளது.

நீரில் மூழ்கடித்து

78,000 க்கும் மேற்பட்ட மக்கள் கிட்டத்தட்ட 800 நிவாரண முகாம்களுக்கு மாற்றப்பட்டுள்ளனர், பெரும்பாலும் இந்த முகாம்கள் பள்ளிகளில் அமைக்கப்பட்டுள்ளன என்று பேரிடர் மேலாண்மை மையம் தெரிவித்துள்ளது.

ஆயிரக்கணக்கான காவல்துறையினர், கடற்படையினர் மற்றும் ராணுவ வீரர்கள் உணவு விநியோகித்தும், சாலைகளை சுத்தம் செய்தும், சிக்கித் தவிக்கும் குடும்பங்களை பாதுகாப்பான இடங்களுக்கு மாற்றியும் வருகின்றனர்.

மல்வானை மற்றும் கொழும்புக்கு அருகிலுள்ள பிற தாழ்வான பகுதிகளில் ஏற்பட்ட வெள்ளப்பெருக்கு பெரும்பாலான வீடுகளை நீரில் மூழ்கடித்துள்ளதுடன், மின்சாரம் துண்டிக்கப்பட்டுள்ளதாக அதிகாரிகள் தெரிவித்தனர்.

வார இறுதியில் தொடர்ந்து மழை பெய்யும் என்று வானிலை அதிகாரிகள் கணித்துள்ளனர், ஏற்கனவே நீரில் மூழ்கிய பகுதிகளில் மேலும் வெள்ளப்பெருக்கு ஏற்படும் என்ற அபாயம் ஏற்பட்டுள்ளது.