ஈரான் அணு ஆயுத விவகாரம்: ஆதரவு அளிக்கும் புடின்..,புதிய நெருக்கடியில் டிரம்ப்

ஈரானின் அணு ஆயுத முயற்சிக்கு ரஷ்ய அதிபர் விளாடிமிர் புதின் ஆதரவு தெரிவித்துள்ளதாக தகவல்கள் வெளியாகியுள்ளது.

ஈரான் அணு ஆயுத விவகாரம்

ஈரான் அணு ஆயுதம் தயாரிக்க முனைப்பு காட்டுவதாகவும், இதற்கு அமெரிக்கா கடும் எதிர்ப்பு தெரிவித்துள்ளதாகவும் தகவல்கள் வெளியாகியுள்ளன.

இது தொடர்பாக பேச்சுவார்த்தைக்கு வருமாறு ஈரானை அமெரிக்க ஜனாதிபதி டொனால்ட் டிரம்ப் அழைப்பு விடுத்த நிலையில், ஈரான் அதற்கு மறுப்பு தெரிவித்துள்ளது.

இந்நிலையில், ஈரானின் அணு ஆயுத முயற்சிக்கு ரஷ்ய ஜனாதிபதி விளாடிமிர் புதின் ஆதரவு தெரிவித்துள்ளதாக தகவல்கள் வெளியாகியுள்ளது.

இது அமெரிக்க ஜனாதிபதி டொனால்ட் டிரம்புக்கு புதிய சிக்கலை ஏற்படுத்தியுள்ளது.

அமெரிக்கா - ஈரான் மோதல் பின்னணி

அமெரிக்காவுக்கும் ஈரானுக்கும் நீண்ட காலமாக மோதல் நிலவி வருகிறது.

குறிப்பாக டொனால்ட் டிரம்ப் அமெரிக்க அதிபராக முதன் முறையாக பதவியேற்ற போது ஈரானை கடுமையாக எதிர்த்தார். மேலும், ஈரான் மீது பொருளாதாரத் தடைகளை விதித்ததுடன், ஈரான்-அமெரிக்கா இடையிலான அணுசக்தி திட்ட ஒப்பந்தத்தையும் ரத்து செய்தார்.

இருப்பினும், ஈரான் தொடர்ந்து அணுசக்தி திட்டத்தை செயல்படுத்தும் முயற்சியில் ஈடுபட்டு வருகிறது.

ஸ்தம்பித்த ஹீத்ரோ... சிக்கித் தவிக்கும் 300,000 பயணிகள்: வெளிவரும் புதிய பின்னணி

இதற்கு முக்கிய காரணம் அமெரிக்கா மற்றும் இஸ்ரேல் ஆகிய நாடுகளுடன் ஈரானுக்கு நீண்ட காலமாக மோதல் நிலவி வருவதுதான்.

அமெரிக்காவின் எச்சரிக்கை மற்றும் ஈரானின் எதிர்வினை

அணுசக்தி திட்டம் தொடர்பான புதிய ஒப்பந்தம் குறித்த பேச்சுவார்த்தைக்கு வருமாறு டொனால்ட் டிரம்ப் ஈரான் ஜனாதிபதிக்கு கடிதம் அனுப்பியுள்ளார்.

அந்த கடிதத்தில், "அணுசக்தி திட்டம் தொடர்பான புதிய ஒப்பந்தத்திற்கு உடன்பட வேண்டும். இந்த பேச்சுவார்த்தையில் இணையவில்லை என்றால், ஈரான் அணு ஆயுதங்கள் தயாரிப்பதை அமெரிக்கா தடுக்கும்" என்று எச்சரிக்கை விடுத்திருந்தார்.

இதற்கு பதிலளித்த ஈரான் ஜனாதிபதி மசூத் பெஷேஷ்கியன், "அமெரிக்காவின் மிரட்டலை நாங்கள் ஒருபோதும் ஏற்றுக்கொள்ள மாட்டோம். அமெரிக்காவுடன் பேச்சுவார்த்தை நடத்தவும் மாட்டோம். அமெரிக்கா விரும்பியதை செய்யலாம்" என்று பதிலடி கொடுத்தார்.

 ரஷ்யாவின் நிலைப்பாடு

ஈரானின் அணு ஆயுத திட்டத்திற்கு ரஷ்ய ஜனாதிபதி விளாடிமிர் புதின் ஆதரவு தெரிவித்துள்ளார்.

கடந்த 18ஆம் திகதி அமெரிக்க ஜனாதிபதி டொனால்ட் டிரம்ப், ரஷ்ய ஜனாதிபதி விளாடிமிர் புதினை தொலைபேசியில் தொடர்பு கொண்டு பேசினார்.

அப்போது, உக்ரைன் மீதான ரஷ்யாவின் போரை நிறுத்த வேண்டும் என்று டிரம்ப் வலியுறுத்தினார். மேலும், ஈரான் விவகாரம் குறித்தும் இருவரும் பேசினர்.

டொனால்ட் டிரம்ப் மற்றும் விளாடிமிர் புதின் இடையே நடந்த பேச்சுவார்த்தையின்போது, இஸ்ரேலை அழிக்கும் முடிவை ஈரான் எடுக்கக் கூடாது என்று டிரம்ப் கூறினார். இதற்கு விளாடிமிர் புதினும் ஒப்புக்கொண்டார்.

"ஈரானின் அணுசக்தி திட்டம் தொடர்பான உள்கட்டமைப்பு மீது அமெரிக்கா அல்லது இஸ்ரேல் தாக்குதல் நடத்தினால் ரஷ்யாவின் பதில் என்னவாக இருக்கும்?" என்ற கேள்விக்கு பதிலளித்த ரஷ்ய செய்தி தொடர்பாளர் டிமிட்ரி பெஸ்கோவ், "ஈரானின் அணுசக்தி திட்டம் அமைதியான அரசியல் மற்றும் ராஜதந்திரம் மூலம் மட்டுமே தீர்க்கப்பட வேண்டும் என்பதில் நாங்கள் உறுதியாக இருக்கிறோம். மற்ற நாடுகளைப் போலவே, அமைதியான அணுசக்தி துறையை வளர்க்க ஈரானுக்கும் உரிமை உள்ளது. இந்த நடவடிக்கை சர்வதேச சட்டத்தின் அடிப்படையில் இருக்கும்" என்று தெரிவித்தார்.