இணங்க மறுக்கும் ஈரான்... பாதுகாப்பு ஆலோசகர்களுடன் அவசர ஆலோசனை நடத்தும் ட்ரம்ப்

ஈரான் போர் தொடர்பாக அமெரிக்க ஜனாதிபதி டோனல்ட் ட்ரம்ப், தனது உயர்மட்ட பாதுகாப்பு ஆலோசகர்களுடன் பேச்சுவார்த்தை நடத்தவுள்ளார் என்ற தகவல் வெளியாகியுள்ளது.

அடுத்தகட்ட நடவடிக்கை

ஈரானுடனான பேச்சுவார்த்தைகள் ஒரு முட்டுக்கட்டையை எட்டியது போல் தோன்றிய நிலையிலேயே ட்ரம்ப் இந்த முடிவுக்கு வந்துள்ளார்.

இதனிடையே, இந்த மாதம் பாகிஸ்தானில் நடைபெற்ற பேச்சுவார்த்தைகள் தோல்வியடைந்ததற்கு, அமெரிக்காவே காரணம் என்று ஈரானின் உயர்மட்ட அதிகாரி ஒருவர் திங்களன்று குற்றம் சாட்டியுள்ளார்.

மத்திய கிழக்கைப் பீடித்து, உலகப் பொருளாதாரத்தை முடக்கியுள்ள மோதலுக்கு முற்றுப்புள்ளி வைப்பதற்கான ஒரு உடன்பாட்டை எட்டுவதற்கான முயற்சியில் நடைபெறும் முதல் மற்றும் ஒரே சுற்றுப் பேச்சுவார்த்தை அதுவாகும்.

ஈரானின் எண்ணெய் குழாய்கள் வெடித்துச் சிதறும்... இன்னும் சில நாட்களில்: ட்ரம்ப் மர்மப் பேச்சு

ஆனால், இஸ்ரேலின் அழுத்தம் காரணமாக வலுக்கட்டாயமாக போரைத் தொடங்கிய ட்ரம்ப் நிர்வாகம், இஸ்ரேலின் திட்டங்களை ஈரான் மீது திணிக்க முயல்வதாலையே அந்த நாடு இணங்க மறுப்பதாகவும் தகவல் கசிந்துள்ளது.

இந்த நிலையில், அடுத்தகட்ட நடவடிக்கைகள் குறித்து விவாதிப்பதற்காக, ட்ரம்ப் திங்கட்கிழமை அன்று தனது உயர்மட்ட தேசிய பாதுகாப்பு மற்றும் வெளிவிவகாரக் கொள்கைக் குழுவுடன் ஒரு சந்திப்பை நடத்துவார் என எதிர்பார்க்கப்படுகிறது.

ட்ரம்ப் எதிர்பார்க்கவில்லை

மட்டுமின்றி, ஈரான் தொடர்பான தனது முக்கிய பாதுகாப்பு ஆலோசகர்களையும் ட்ரம்ப் சந்திக்கவிருக்கிறார். மேலும், மோதலை முடிவுக்கு கொண்டுவர ஈரான் முன்வைத்துள்ள புதிய ஒப்பந்தம், அமெரிக்காவின் நிபந்தனைகளுக்கு இணங்கவில்லை என்றே கூறப்படுகிறது.

அந்த ஒப்பந்தம், ஹார்முஸ் நீரிணையை மீண்டும் திறப்பதையும், அந்த முக்கிய நீர்வழிப்பாதையின் மீதான அமெரிக்க கடற்படை முற்றுகையை முடிவுக்குக் கொண்டுவருவதையும் மையமாகக் கொண்டிருந்ததுடன், அணுசக்தி தொடர்பான பேச்சுவார்த்தைகள் பிற்கட்டத்திற்கு ஒத்திவைக்கப்பட வேண்டும் என்றும் கோருகிறது.

இரண்டாவது சுற்று பேச்சுவார்த்தைகள் முடங்கும் என்பதை ட்ரம்ப் எதிர்பார்க்கவில்லை என்ற தகவல் கசிந்துள்ள நிலையில், ஈரான் எப்போது வேண்டுமானாலும் தங்களைத் தொடர்புகொள்ளலாம், அது நேரிடையாக வேண்டும் என்பதில் கட்டாயமில்லை, மாறாக தொலைபேசியில் தொடர்புகொண்டாலும் போதுமானது என ட்ரம்ப் ஃபாக்ஸ் நியூஸிடம் கூறியிருந்தார்.