ரூ.5.8 கோடி செலவு செய்து மகனின் அழகை விளம்பரப்படுத்திய தந்தை: எதிர்வினையாற்றிய மகன்!

டோக்கியோ முழுவதும் மகன் புகைப்படங்களை பகிர்ந்து ஜப்பானிய தந்தை தனது பாசத்தை உலகிற்கு வெளிகாட்டியுள்ளார்.

ஜப்பானிய தந்தையின் ஆச்சரியமூட்டும் செயல்

ஜப்பானியத் தந்தை ஒருவர் தனது மகனின் "அழகான" குழந்தைப் புகைப்படங்களை டோக்கியோ நகரம் முழுவதும் விளம்பரப்படுத்த சுமார் $700,000 (இந்திய மதிப்பில் சுமார் 5.8 கோடி ரூபாய்) செலவழித்து உலகையே திகைக்க வைத்துள்ளார் என சவுத் சைனா மார்னிங் போஸ்ட் (SCMP) தெரிவித்துள்ளது.

ரியல் எஸ்டேட் நிறுவன உரிமையாளரான இந்தத் தந்தை, பல ஆண்டுகளாக தனது மகனின் குழந்தைப் பருவப் படங்களை விளம்பரங்களில் வெளியிட்டு வருகிறார்.

யு-குன் என்று அழைக்கப்படும் இந்தச் சிறுவன், "தி லேண்ட்மார்க் கிட்" எனப் பிரபலமாகியுள்ளார்.

பாலம் விளம்பரப் பதாகைகள் முதல் நகரப் பேருந்துகள், பார்க்கிங் பலகைகள் வரை எங்கு பார்த்தாலும் இவனது குழந்தைப் பருவப் புகைப்படங்கள் நிறைந்துள்ளன.

தன் மகன் "அழகு" என்றும், இந்த அழகை டோக்கியோ நகரம் முழுவதும் உள்ளவர்கள் பார்க்க வேண்டும் என்றும் கருதியே, இத்தகைய விளம்பரங்களை அவர் செய்து வருகிறார்.

இந்த விளம்பரப் பிரச்சாரங்களில் யு-குன் பல வேடிக்கையான முகபாவனைகளைச் செய்யும் படங்கள் இடம்பெற்றுள்ளன. ஒரு படத்தில் தெருவில் ஒரு நிகழ்ச்சியைக் கண்டு அழுதுகொண்டிருக்கும் அவனது படமும் உள்ளது.

யு-குன்னின் எதிர்வினை

தற்போது 16 வயதாகும் யு-குன்னுக்கு, நகரம் முழுவதும் தனது குழந்தைப் பருவப் புகைப்படங்கள் ஒட்டப்பட்டிருப்பது அவ்வளவாக பிடிக்கவில்லை."எனக்கு இது பிடிக்கவில்லை. உண்மையில் பிடிக்கவில்லை," என்று அவன் வெளிப்படையாகக் கூறியுள்ளான். "நான் மிகவும் அழகாக இருக்கிறேன் என்று நீங்கள் நினைத்தால், அந்த 100 மில்லியன் யெனை என் வங்கிக் கணக்கில் மாற்றலாமே?" என்றும் கேட்டுள்ளான்.

"மக்கள் என் குழந்தைப் படங்களை அடையாளம் காணாமல் இருக்கலாம், ஆனால் இப்போது நான் வளர்ந்துவிட்டதால், இது வெட்கமாக இருக்கிறது," என்றும் அவன் மேலும் தெரிவித்துள்ளான்.