புலம்பெயர்ந்தோரின் மரணங்களைப் புறக்கணிக்கும் தலைவர்களை வரலாறு கண்டிக்கும்: போப் லியோ

புலம்பெயர்ந்தோரை மேலும் மனிதாபிமானத்துடன் நடத்த வேண்டும் என்று போப் லியோ வியாழக்கிழமை உலகத் தலைவர்களுக்கு வேண்டுகோள் விடுத்தார்.

வரலாறு கண்டிக்கும்

ஐரோப்பாவில் குடியேற்ற விவகாரங்கள் தொடர்பான முக்கிய மையங்களில் ஒன்றான ஸ்பெயினின் கேனரி தீவுகளுக்கு மேற்கொண்ட பயணத்தின்போது, ​​போர் அல்லது வறுமையின் காரணமாக வெளியேறுபவர்கள் துன்புற அனுமதிப்பவர்களை வரலாறு கண்டிக்கும் என்று எச்சரிக்கை விடுத்தார்.

ஐரோப்பிய அரசியல்வாதிகள் மற்றும் சர்வதேச சமூகத்தின் மனசாட்சிக்கு விடுக்கும் வேண்டுகோள் என்று அவர் குறிப்பிட்ட உரையில், மனித கண்ணியத்திற்கு கடவுச்சீட்டு எதுவும் இல்லை என்றும், எல்லைகளைக் கடக்கும்போது அது தனது மதிப்பை இழப்பதில்லை என்றும் போப் லியோ கூறியுள்ளார்.

இறந்தவர்களை எண்ணுவதற்கு நாம் பழகிவிட முடியாது என்று கிரான் கனாரியாவின் ஆர்குயினெகுயின் துறைமுகத்தில் போப் பேசியுள்ளார்.

கடலில் தொலைந்துபோன புலம்பெயர்ந்தோருக்கான நினைவிடம் அருகே கூடியிருந்த ஆயிரக்கணக்கானோரிடம் பேசிய அவர், துன்பப்படுபவர்களின் வேதனையை நமது கடற்கரைகளில் ஒரு சர்வ சாதாரணமான காட்சியாக மாற்றிவிட்டோம் என்று வரலாறு நம்மீது குற்றம் சாட்டிவிடக் கூடாது என வலியுறுத்தினார்.

ட்ரம்ப் கூறிய ஒப்பந்தம்... ஒப்புதல் அளிக்கவில்லை என மறுக்கும் ஈரான்

மேலும், நாம் உயிரைப் பாதுகாத்தோமா அல்லது அலட்சியத்திற்கு அடிபணிந்தோமா என்பது காலப்போக்கில் தெரியவரும். ஸ்பெயினில் மேற்கொள்ளும் ஒரு வார கால சுற்றுப்பயணத்தின் முக்கிய பகுதியாக, ஆப்பிரிக்காவின் மேற்குக் கடற்கரைக்கு அப்பால் உள்ள தீவுக்கூட்டத்திற்கு போப் பயணம் மேற்கொண்டுள்ளார்.

இந்தப் பயணத்தின் ஒரு பகுதியாக, அவர் வெள்ளிக்கிழமை அன்று சுமார் 1,000 புலம்பெயர்ந்தோரைச் சந்திப்பார். புதன்கிழமையன்று துறைமுகத்தில் புலம்பெயர்ந்தோருக்கு உதவும் அரசு சாரா மற்றும் தொண்டு நிறுவனங்களுடன் நடைபெற்ற கூட்டத்தில்,

தன்னார்வலர்கள் மற்றும் பிறரின் கருத்துகளைப் போப் கேட்டறிந்தார்; இவர்களில் மீட்புப் படகு கேப்டன் ஒருவரும் அடங்குவார், அவர் கடந்த 18 ஆண்டுகளில் தானும் தனது சகாக்களும் சுமார் 20,000 புலம்பெயர்ந்தோரை மீட்டதாகத் தெரிவித்தார்.

ஸ்பானிய நாடாளுமன்றத்தில்

ஸ்பெயின் நிலப்பகுதியிலிருந்து 1,000 கிலோமீற்றருக்கும் அதிகமான தொலைவில் அமைந்துள்ள கேனரி தீவுகள், 2015-ல் 1,000-க்கும் குறைவான எண்ணிக்கையில் இருந்த நிலையில், 2024-ல் சாதனை அளவாக 46,843 முறைசாரா குடியேறிகளைப் பெற்றுள்ளதாக அதிகாரப்பூர்வ தரவுகள் தெரிவிக்கின்றன.

காமினாண்டோ ஃப்ரோன்டெராஸ் என்ற தன்னார்வ தொண்டு நிறுவனத்தின்படி, 2025-ஆம் ஆண்டில் தீவுகளை அடைய முயன்றதில் 3,000-க்கும் மேற்பட்டோர் மரணமடைந்தனர்.

உலகெங்கிலும் உள்ள புலம்பெயர்ந்தோருக்கு உதவிகள் கிடைக்காத நிலை, சர்வதேச ஒழுங்கமைப்பின் அறநெறி அடிப்படையையே சவாலுக்கு உட்படுத்துவதாக லியோ திங்களன்று ஸ்பானிய நாடாளுமன்றத்தில் தெரிவித்தார்.

புலம்பெயர்ந்தோர் தங்கள் வீடுகளை விட்டு வெளியேறக் காரணமான வறுமை, போர்கள் மற்றும் ஊழல் ஆகியவற்றை ஒழிப்பதற்கு உலகம் இன்னும் கூடுதலான நடவடிக்கைகளை மேற்கொள்ள வேண்டும் என்றும் அவர் கூறியுள்ளார்.