தலிபான்களிடம் கைமாறிய ஆட்சி... ஆப்கனிற்கு மீண்டும் திரும்பிய முக்கிய அல்-கொய்தா தலைவர்! செல்பி எடுத்து வரவேற்ற மக்களின் வீடியோ

ஆப்கானிஸ்தானில் ஆட்சி அதிகாரம் தலிபான்களிடம் கைமாறிய நிலையில் முக்கிய அல்-கொய்தா தலைவர் ஆப்கனில் உள்ள தனது  சொந்த மாகாணத்திற்குத் திரும்பியுள்ளதாக இணையத்தில் வீடியோ ஒன்று வெளியாகியுள்ளது.

அமெரிக்காவின் நியூயார்க் நகரில் இருந்த உலக வர்த்தக மையமான இரட்டை கோபுரம் கட்டிடத்தை அல்-கொய்தா தீவிரவாதிகள் கடந்த 2001-ம் ஆண்டு செப்டம்பர் 11-ம் தேதி விமானங்களை மோதி தகர்த்தனர்.

அதன் பிறகு அல்-கொய்தா தீவிரவாதிகளுக்கு தலிபான்கள் அடைக்கலம் கொடுத்ததன் காரணமாக ஆப்கானிஸ்தான் விவகாரத்தில் அமெரிக்கா தலையிட்டது.

அங்கு தனது படைகளை நிறுத்தி தீவிரவாதிகளையும், தலிபான்களையும் அமெரிக்கா ஒடுக்கியது.

20 வருடங்களுக்கு பிறகு ஆப்கானிஸ்தானில் உள்ள தங்கள் படைகளை திரும்ப பெறுவதாக அறிவித்த அமெரிக்க, வெளியேற்றும் பணிகளை தொடங்கியது.

ஆப்கானிஸ்தானில் உள்ள அமெரிக்க, நேட்டோ படைகள் வெளியேறிதை தொடர்ந்து தலிபான்கள் நாட்டை ஆக்ரமிக்கும் பணிகளை தொடங்கினர்.

ஆகஸ்ட் 15ம் திகதி தலிபான் படைகள் தலைநகர் காபூலை சுற்றி வளைத்ததை தொடர்ந்து ஜனாதிபதி அஷ்ரப் கனி நாட்டை விட்டு தப்பியோடினார்.

இதனையடுத்து, தலிபான்கள் ஆப்கானிஸ்தானை தங்கள் கட்டுப்பாட்டில் கொண்டு வந்தனர்.

20 வருடங்களுக்கு பின் மீண்டும் ஆப்கானிஸ்தானை தங்கள் கட்டுப்பாட்டில் கொண்டு வந்துள்ள தலிபான்கள், இனி எந்தவொரு தீவிரவாத அமைப்புக்கும் நாட்டில் அடைக்கலம் தரமாட்டோம் என அமெரிக்காவுடன் ஒப்பந்தம் செய்துள்ளதாக தகவல்கள் வெளியானது.

இந்நிலைியல், ஆப்கானிஸ்தான் தலிபான்கள் கட்டுப்பாட்டில் வந்ததை தொடர்ந்து ஆப்கானிஸ்தானின் முக்கிய அல்-காய்தா தலைவர் டாக்டர் அமீன்-உல்-ஹக், அவர் தனது சொந்த மாகாணமான நாங்கர்ஹார் மாகாணத்திற்குத் திரும்பியுள்ளதாக வீடியோ ஒன்று வெளியாகியுள்ளது.

அமீன்-உல்-ஹக், டோரா போராவில் ஒசாமா பின்லேடனின் பாதுகாப்புப் பொறுப்பாளரான இருந்தவர். டாக்டர் அமீன், 1980 களில் மக்தபா அகித்மத்தில் பணிபுரிந்தபோது அப்துல்லா அஸ்ஸாமுடன் ஒசாமா பின்லேடனுடன் நெருக்கமானார்.

வீடியோவில், சோதனை சாவடி ஒன்றை கடந்து வெள்ளை நிற காரில் அமீன் வருகிறார். அங்கிருக்கும் ஆயுதமேந்திய தலிபான்கள் கார் செல்ல வழி விடும் வகையில் மக்களை ஓரமாக அனுப்புகின்றனர்.

இதனையடுத்து, அமீன் கார் அருகே கூட்டமாக சென்ற சிலர் அவரின் கையை தழுவி வரவேற்கின்றனர். சிலர் செல்பி எடுக்கின்றனர்.

Dr. Amin-ul-Haq, a major al-Qaeda player in Afghanistan, Osama Bin Laden security in charge in Tora Bora, returns to his native Nangarhar province after it fell to the Taliban. Dr. Amin became close to OBL in the 80s when he worked with Abdullah Azzam in Maktaba Akhidmat. pic.twitter.com/IXbZeJ0nZE

— BILAL SARWARY (@bsarwary) August 30, 2021

முன்னும் பின்னும் ஆயுதமேந்திய போராளிகள் வாகன பாதுகாப்புடன் அமீன் அங்கிருந்து காரில் செல்வதை வீடியோ காட்டுகிறது.