ட்ரம்பால் முடியாததை... சாதித்த மெலானியா: உக்ரேனிய நகரமொன்றில் முழு போர்நிறுத்தம்

Melania Trump secured ceasefire in Ukrainian city: உக்ரேனிய நகரமொன்றில் போர்நிறுத்தத்தை மெலானியா ட்ரம்ப் பெற்றுத் தந்தார்.

அமெரிக்காவின் முதன்மைக் குடிமகளான மெலானியா ட்ரம்ப், உக்ரைனின் தெற்கு நகரமான ஒலேஷ்கியில் ரஷ்யாவிற்கும் உக்ரைனிற்கும் இடையே போர் நிறுத்தத்தை ஏற்படுத்த உதவியுள்ளார்.

அக்டோபர் 27 முதல்

குறித்த நகரமானது கடந்த 2022 பிப்ரவரி முதல் ரஷ்யாவின் ஆக்கிரமிப்பில் உள்ளது. வெள்ளிக்கிழமை வெளியான அறிவிப்பைத் தொடர்ந்து, ஒலேஷ்கியில் போர் நிறுத்தம் அக்டோபர் 27-ஆம் திகதி முதல் அமுலுக்கு வரும் என்று உக்ரைனிய உயர் அதிகாரி ஒருவர் தெரிவித்துள்ளார்.

இதற்கான நேரத்தை ஒருங்கிணைக்கும் பணியில் ராணுவம் ஈடுபட்டுள்ளதாக ரஷ்ய ஜனாதிபதி மாளிகையின் செய்தித் தொடர்பாளர் ஒருவர் கூறியுள்ளார்.

ரஷ்யாவால் முன்னெடுக்கப்பட்டு வரும் இந்தப் போரை முடிவுக்குக் கொண்டுவரும் நோக்கில் அமெரிக்க ஜனாதிபதி டொனால்ட் ட்ரம்பின் நிர்வாகம் தூதரக நடவடிக்கைகளைப் புதுப்பித்துள்ள நிலையில் இந்தத் தகவல் வெளியாகியுள்ளது.

ட்ரம்பின் புதிய அணுகுமுறையில், போரால் மிக மோசமாகப் பாதிக்கப்பட்டுள்ள உக்ரைன் மீதான அழுத்தத்தை அதிகரிப்பதும், ரஷ்யாவிற்கு சமீபத்தில் வழங்கப்பட்ட பல சலுகைகளும் அடங்கும்.

அமீரகம், சவுதியுடன் ட்ரம்பின் மருமகனுக்கு இரகசியத் தொடர்புகள்: அலைபேசியால் அம்பலம்

இதனிடையே, ஒலேஷ்கியில் நிலைமை மிகவும் மோசமாக உள்ளது. ஒலேஷ்கி பேரழிவின் விளிம்பில் உள்ள ஒரு போர்க்களம் என்றும் வெள்ளை மாளிகை வெளியிட்ட அறிக்கையில் மெலானியா ட்ரம்ப் குறிப்பிட்டுள்ளார்.

மேலும், ஒலேஷ்கி நகர மக்கள் மின்சார வசதி இன்றி, கண்ணிவெடிகள் புதைக்கப்பட்ட சாலைகளுக்கு இடையே வாழ்ந்து வருகின்றனர்; மட்டுமின்றி, அவர்கள் தொடர்ந்து ராணுவத் தாக்குதல்களுக்கும் உள்ளாகிறார்கள்.

தனது தலையீடு இல்லையென்றால், அந்த நகரத்திற்கு மனிதாபிமான உதவிகளைக் கொண்டு செல்வதும், முதியவர்களை அங்கிருந்து வெளியேற்றுவதும் முற்றிலும் சாத்தியமற்றதாகிவிடும் என்பது தெளிவாகத் தெரிந்தது என்றும் மெலானியா கூறியுள்ளார்.

மேலும், உள்ளூர் அளவிலான போர்நிறுத்தத்தின் விதிமுறைகளை வரையறுப்பதற்காகத் தனது பிரதிநிதிகள் குழு ரஷ்ய மற்றும் உக்ரேனியத் தலைமைகளுடன் நேரடியாகப் பணியாற்றியதாகவும்,

நகரில் உள்ள பொதுமக்களுக்கு மனிதாபிமான உதவிகளை வழங்குவதற்கு இரு நாடுகளின் சிவில் தலைவர்களும் இணைந்து செயல்படுவார்கள் என்றும் மெலானியா தமது அறிக்கையில் குறிப்பிட்டுள்ளார்.

விரும்பும் இடத்திற்கு

போருக்கு முன்பு 24,000 மக்கள் தொகையைக் கொண்டிருந்த ஒலேஷ்கி நகரம், மோதலின் தென்கிழக்கு முனையில் அமைந்துள்ளது. பிப்ரவரி 2022-ல் நடந்த முழு அளவிலான படையெடுப்பின் முதல் நாளிலேயே இந்நகரம் ரஷ்யாவால் கைப்பற்றப்பட்டதுடன், கடுமையான குண்டுவீச்சையும் எதிர்கொண்டது.

பெரும்பாலான குடியிருப்பாளர்கள் வெளியேறியிருந்தாலும், எஞ்சியிருப்பவர்கள் கடுமையான உணவு மற்றும் மருத்துவ பற்றாக்குறையை எதிர்கொண்டனர்.

அத்துடன், இரு தரப்பினரும், அத்தியாவசியப் பொருட்கள் விநியோகத்தைத் தடுத்ததாக ஒருவரை ஒருவர் குற்றம் சாட்டியுள்ளனர். மெலானியா ட்ரம்ப் தனது அறிக்கையில், இந்த போர்நிறுத்தத்தின் மூலம், வெளியேற விரும்பும் எஞ்சிய சுமார் 2,000 குடியிருப்பாளர்களை, அவர்கள் விரும்பும் இடத்திற்கு, ரஷ்யாவிற்கோ அல்லது உக்ரைனிற்கோ, அழைத்துச் செல்ல முடியும் என்று தெரிவித்துள்ளார்.

அத்துடன், அமெரிக்காவின் ஒரு நடுநிலையான ஊடக அமைப்பு, களத்தில் ரஷ்ய மற்றும் உக்ரேனியக் குழுக்களுடன் இணைந்து பயணிக்கும் என்றும் மெலானியா தமது அறிக்கையில் குறிப்பிட்டுள்ளார். ஆனால் அந்த நடுநிலையான ஊடக அமைப்பின் பெயரை அவர் குறிப்பிடவில்லை.

போரின் போது ரஷ்யாவால் கடத்தப்பட்ட உக்ரேனிய குழந்தைகளை மீட்டு மீண்டும் அவர்களின் குடும்பத்தினருடன் ஒன்றிணைக்கும் பணியில் மெலானியா ட்ரம்ப் முன்பு முழு வீச்சில் ஈடுபட்டிருந்தார்.

சமீபத்தில் ரஷ்யாவுடன் டீசல் ஒப்பந்தம் ஒன்றை ஏற்படுத்திக்கொண்ட டொனால்ட் ட்ரம்ப், குறுகியகால போர்நிறுத்தத்திற்கு விளாடிமிர் புடின் ஒப்புக்கொண்டதாகவும், அது அமுலுக்கு வந்துள்ளதாகவும் அறிவித்தார்.

ஆனால், ட்ரம்ப் குறிப்பிட்ட அதே நாள் இரவு தொடங்கி ரஷ்ய தரப்பில் இருந்து கடும் தாக்குதல் முன்னெடுக்கப்பட்டது. ட்ரம்பிடம் இருந்து எவ்வித கண்டனமும் வெளியாகவில்லை.

ஸ்டார்லிங்க் சேவையை முடக்கி, உக்ரைனை நெருக்கடிக்கு தள்ளியதுடன், அது தொடர்பில் விவாதிக்கத் தேவையில்லை என்றும் தெரிவித்தார். இந்த நிலையிலேயே, மெலானியாவின் அதிகாரிகள் குழு தலையிட்டு, ஒலேஷ்கி நகரில் போர்நிறுத்தமொன்றை சாதித்துள்ளது.