சீனாவிடம் விளக்கம் கோரும் திபெத்தில் காணாமல் போன யாத்ரீகர்களின் குடும்பத்தினர்

Families of missing pilgrims in Tibet demand answers from China: திபெத்தில் காணாமல் போன யாத்ரீகர்களின் குடும்பத்தினர் சீனாவிடம் விளக்கம் கோருகின்றனர்.

பேரழிவு ஏற்பட்டு 10 நாட்களுக்குப் பிறகும் இந்தியாவில் பிறந்த பின்லாந்து குடிமகள் உட்பட, திபெத்தில் 261 வெளிநாட்டினர் இன்னும் காணாமல் போயுள்ளனர்.

மொத்தம் 531 பேர்

இந்த விவகாரத்தில் சீன ஆரசாங்கத்தின் பதில்கள் கடும் விரக்தியை ஏற்படுத்துவதாகவே உறவினர்கள் பலர் தெரிவிக்கின்றனர். காணாமல் போயுள்ள உறவினர்கள் விவகாரத்தில், சீனாவுக்கு சென்று முறையிட முடியாத நிலை இருப்பதாகவும் குறிப்பிடுகின்றனர்.

பாதிப்புக்குள்ளானப் பகுதியில் என்ன நடக்கிறது அல்லது அங்குள்ள சூழல் என்ன என்பது குறித்து சீனாவிலிருந்து எந்தத் தகவலும் இல்லை என்றே கூறுகின்றனர்.

கடந்த வாரம் திபெத்-நேபாள எல்லையில் ஏற்பட்ட பெருவெள்ளம் மற்றும் நிலச்சரிவு 1,300-க்கும் மேற்பட்டோரின் உயிரைப் பறித்ததுடன், எல்லைப் பகுதியின் இருபுறமும் 5,600-க்கும் மேற்பட்டோரைக் காணவில்லை.

திபெத்தில் குறைந்தது 31 பேர் மரணமடைந்தது உறுதிப்படுத்தப்பட்டுள்ளதாகவும், மொத்தம் 531 பேர் காணாமல் போயுள்ளதாகவும் அரசு செய்தி நிறுவனமான சின்ஹுவா வெள்ளிக்கிழமை தெரிவித்தது.

டன் கணக்கிலானத் தங்கத்தை அமெரிக்காவிலிருந்து வெளியேற்றும் ஐரோப்பிய நாடுகள்: என்ன காரணம்

ஆனால், காணாமல் போனவர்களின் பல குடும்பங்கள் சீனாவில் இருந்து வெளியாகும் தகவல் மறைக்கப்படுவதாகக் குற்றம் சாட்டுகின்றன; இது அவர்களின் துயரத்தை மேலும் தீவிரமாக்குகிறது.

இதனிடையே, சீன அதிகாரிகளிடம் சமர்ப்பிப்பதற்காக, திபெத்தில் மாயமாகியுள்ள பிரியங்கா சௌத்ரி என்பவரின் மகளிடமிருந்து டிஎன்ஏ (DNA) மாதிரியைப் பெறுவதற்கு, சில நாட்களுக்கு முன்பு இங்கிலாந்து காவல்துறையினர் அவரது வீட்டிற்குச் சென்றுள்ளனர்.

இந்த நிலையில், குற்றச்சாட்டுகள், பாதிக்கப்பட்டவர்களை அடையாளம் காண்பதற்கான காலக்கெடு, அல்லது திபெத்திய தரப்பில் பயன்படுத்தப்படும் டிஎன்ஏ சேகரிப்பு நெறிமுறைகள் ஆகியவை குறித்து கருத்து தெரிவிக்குமாறு விடுக்கப்பட்ட கோரிக்கைகளுக்கு சீனாவின் வெளிவிவகார அமைச்சகம் உடனடியாகப் பதிலளிக்கவில்லை.

ஆனால், 23 நாடுகளைப் பிரதிநிதித்துவப்படுத்தும் தூதரகங்களுக்குத் தாங்கள் விளக்கங்களை அளித்து வருவதாகவும்; அத்துடன், வெள்ளம் குறித்த தகவல்களை வெளியிட்ட விதம் வெளிப்படையானதாகவும் உரிய நேரத்தில் அமைந்ததாகவும் திங்களன்று சீனாவின் வெளிவிவகார அமைச்சகம் தெரிவித்துள்ளது.

டிஎன்ஏ (DNA) பரிசோதனை

மேலும், உயிரிழந்தவர்களை அடையாளம் காண்பதற்காக மற்ற நாடுகள் மற்றும் அமைப்புகளுடன் இணைந்து பணியாற்றத் தயாராக இருப்பதாகவும் சீனா தெரிவித்துள்ளது.

பேரழிவின் பெரும் பாதிப்புக்குள்ளான நேபாளத்திற்கு, டிஎன்ஏ (DNA) மூலம் அடையாளம் காணும் நிபுணர்கள் அடங்கிய குழு ஒன்றையும் அனுப்பியுள்ளது.

நேபாளத்தில், காணாமல் போனவர்கள் மற்றும் உயிரிழந்தவர்கள் குறித்த தகவல்களைக் காவல்துறை உள்ளிட்ட அதிகாரிகள் சமூக ஊடகங்களில் தொடர்ந்து பகிர்ந்து வருகின்றனர்; அதேவேளையில், தேடுதல் பணிகளுடன் இணைந்து தீவிர டிஎன்ஏ (DNA) பரிசோதனைகளும் மேற்கொள்ளப்பட்டு வருகின்றன.

நேபாளத்தில் காணாமல் போனதாகத் தெரிவிக்கப்பட்டுள்ள குடிமக்களைக் கொண்ட நாடுகளின் தூதரக அதிகாரிகளை, கடந்த வாரம் பெய்ஜிங்கில் நடைபெற்ற விளக்கக் கூட்டத்திற்கு சீனா அழைத்திருந்தது.

இதில் கலந்துகொண்ட தூதரக அதிகாரிகள், பாதிக்கப்பட்டவர்களை டிஎன்ஏ (DNA) மூலம் அடையாளம் காணும் பணியை எவ்வாறு மேற்கொள்ளத் திட்டமிட்டுள்ளது என்பது குறித்த எந்த விவரங்களையும் பெய்ஜிங் பகிர்ந்துகொள்ளவில்லை என்று தெரிவித்தனர்.

மேலும், உயிரிழந்தவர்களை அடையாளம் காணவோ அல்லது அவர்களது குடும்பத்தினருடன் பகிர்ந்துகொள்ளவோ ​​உதவக்கூடிய, முகத்தை அடையாளம் காணும் படங்கள் உள்ளிட்ட காணொளிகளை, நில எல்லைப் பகுதியின் தங்கள் தரப்பிலிருந்து வழங்க சீனா முன்வரவில்லை என்று அந்நாட்டின் வெளிவிவகார அமைச்சகத்துடன் தொடர்பில் உள்ள தூதர்கள் தெரிவித்துள்ளனர்.