Deltacron குறித்து அச்சப்பட தேவையில்லை... நிபுணர்கள் வெளியிட்டுள்ள நம்பிக்கையூட்டும் செய்தி
Omicron வைரஸ், IHU வைரஸ், என நாளுக்கொரு வகை கொரோனா வைரஸ் புதிது புதிதாக உருமாறி மக்களை அச்சுறுத்திக்கொண்டிருக்கும் நிலையில், Deltacron வைரஸ் என்று புதிதாக ஒரு கொரோனா வைரஸ் உருவாகியுள்ளதாக செய்திகள் வெளியாகி வருகின்றன.
ஆனால், Deltacron குறித்து அச்சப்பட தேவையில்லை, சொல்லப்போனால் Deltacron என்று ஒன்று இல்லை என்று கூட கூறலாம் என்று கூறியுள்ளார்கள் அறிவியலாளர்கள்.
கடந்த வார இறுதியில், சைப்ரஸ் நாட்டு அறிவியலாளர்கள், தங்கள் நாட்டில் புதிய மரபணு மாற்ற கொரோனா வைரஸ் ஒன்றினால் 25 பேர் பாதிக்கப்பட்டுள்ளதாக தெரிவித்திருந்தார்கள்.
அந்த வைரஸ் Omicron வைரஸின் மரபணுத் தோற்றத்தையும், டெல்டா வைரஸின் குணாதிசயங்கள் சிலவற்றையும் கொண்டிருந்ததாக அந்நாட்டு அறிவியலாளர் ஒருவர் தெரிவித்திருந்தார்.
ஆகவே, அந்த வைரஸுக்கு Deltacron என்று பெயரிடப்பட்டு, அந்த வைரஸை விட, அதைக் குறித்த செய்திகள் சமூக ஊடகங்களில் வேகமாக பரவின.
ஆனால், முன்னணி வைராலஜி துறை நிபுணர்கள், அது ஆய்வகத்தில் நிகழ்ந்த குளறுபடியாக இருக்கலாம் என்று கூறி, Deltacron என்று ஒரு புதிய வைரஸ் உருவாகவில்லை, ஆகவே, அது குறித்து அச்சப்படத்தேவையில்லை என்று கூறியுள்ளார்கள்.
ஆய்வகத்தில் இதற்கு முன் பரிசோதித்த மாதிரிகளில் இருந்த டெல்டா வைரஸின் சில துணுக்குகள் தவறுதலாக விடப்பட்டிருக்கலாம் என்றும், பின்னர் Omicron வைரஸ் கொண்ட ஒரு மாதிரியை பரிசோதிக்கும்போது, இரண்டு வைரஸ்களின் மரபணுக்களும் இருப்பது தெரியவந்துள்ளதையடுத்து, புதிதாக ஒரு வைரஸ் உருவாகியிருப்பதாக தவறுதலாக புரிந்துகொண்டிருக்கலாம் என்றும் அவர்கள் தெரிவித்துள்ளார்கள்.
Wellcome Sanger Institute என்ற நிறுவனத்தின் கொரோனா தொடர்பான ஆய்வக இயக்குநரான Dr Jeffrey Barrett என்பவர், இரண்டு வைரஸ்கள் இணைந்து புதிதாக ஒரு வைரஸ் உருவாகியிருக்கலாம் என்ற கருத்தையே நிராகரித்துள்ளார்.
உலக சுகாதார அமைப்புடன் பணி புரியும் தொற்றுநோயியல் மருத்துவரான Dr Krutika Kuppalli, இது ஒரு ஆய்வகத் தவறாகத்தான் இருக்க வாய்ப்புள்ளது என்கிறார்.
'Deltacron என்பது உண்மையில்லை, இரண்டு வைரஸ்களின் துணுக்குகளை சேர்த்து பரிசோதித்ததால் கிடைத்த தவறான ஆய்வக முடிவே அது (lab contamination of Omicron sequence fragments in a Delta specimen) என்று அவர் கூறியுள்ளார்.
இரண்டு பிரபலங்களின் பெயர்களை வேண்டுமானால் இணைக்கலாம், ஆனால் இப்படி இரண்டு நோய்களின் பெயர்களை இணைக்கும் வேலையை விட்டு விடுவோம் என்று வேடிக்கையாக கூறியுள்ளார் அவர்.
ஆனாலும், சைப்ரஸ் நாட்டு அறிவியலாளர்களோ, தாங்கள் புதிய மரபணு மாற்ற கொரோனா வைரஸ் ஒன்றைக் கண்டுபிடித்துள்ளதாகவே தொடர்ந்து வாதிட்டு வருகிறார்கள்.