உலகத்தின் கவனம் ஈரானில் இருக்க... அபாயகரமான ஆயுதங்களைச் சோதித்த வட கொரியா

வட கொரியா மின்காந்த ஆயுத அமைப்பு மற்றும் விமான எதிர்ப்பு ஏவுகணை உள்ளிட்ட புதிய ஆயுதங்களின் தொடர் சோதனைகளை இந்த வாரம் நடத்தியுள்ளது.

மின்காந்த ஆற்றல்

அமெரிக்காவின் எதிரிகள் மீது டொனால்ட் ட்ரம்ப் தாக்குதல் நடத்தி வரும் நிலையில், வட கொரியா தனது மரபுவழி ஆயுதங்களை மேம்படுத்தும் முயற்சிகளைத் தீவிரப்படுத்தியுள்ளதாகவே தகவல் வெளியாகியுள்ளது.

அமெரிக்காவுக்கும் ஈரானுக்கும் இடையே நிலவும் நிலையற்ற போர்நிறுத்தத்திற்கு மத்தியில், மத்திய கிழக்கில் நடக்கும் நிகழ்வுகள் மீது உலகளாவிய கவனம் குவிந்துள்ளது.

இந்த நிலையில், திங்கள் முதல் புதன் வரை மூன்று நாட்கள் நடத்தப்பட்ட சோதனைகளை ஜெனரல் கிம் ஜாங் சிக் மேற்பார்வையிட்டார் என்று அரசுக்குச் சொந்தமான கொரிய செய்தி நிறுவனம் தெரிவித்துள்ளது.

மேலும் கிம் தெரிவிக்கையில், மின்காந்த ஆயுதமும் கார்பன் ஃபைபர் குண்டும், பல்வேறு தளங்களில் உள்ள பல்வேறு இராணுவச் சாதனங்களுடன் ஒருங்கிணைக்கப்பட்டுப் பயன்படுத்தப்படக்கூடிய, உத்திசார் தன்மையுடைய சிறப்புச் சொத்துக்களாகும் என்றார்.

எந்த நொடியிலும் ஈரானுடன் போருக்குத் தயார்... இஸ்ரேல் பிரதமர் மீண்டும் சூளுரை

இந்த வகை ஆயுதம், இலக்குகளை, குறிப்பாக மின்னணு உள்கட்டமைப்புகளைச் சீர்குலைக்க அல்லது சேதப்படுத்த, வெடிபொருட்களுக்குப் பதிலாக மின்காந்த ஆற்றலைப் பொதுவாகப் பயன்படுத்துகிறது.

வெளியான அறிக்கையில், நகரும் குறுகிய தூர விமான எதிர்ப்பு ஏவுகணை அமைப்பின் போர் நம்பகத்தன்மையைச் சரிபார்க்க ஒரு சோதனையும் நடத்தப்பட்டதாக குறிப்பிடப்பட்டுள்ளது.

மத்திய கிழக்கில் மோதல்கள் தீவிரமடைந்து, ஆசியாவிலிருந்து அமெரிக்க இராணுவத் தளவாடங்கள் வெளியேற்றப்படும் நிலையில், அதிகரித்த புவிசார் அரசியல் நிச்சயமற்ற தன்மை நிலவும் ஒரு காலகட்டத்தில் வட கொரியாவில் இந்த ஆயுதச் சோதனைகள் நடைபெறுகின்றன.

மட்டுமின்றி, வட கொரியா ரஷ்யாவுடனான தனது உறவுகளைத் தொடர்ந்து ஆழப்படுத்தி வருவதோடு, சீனாவுடனான ஏற்கனவே உள்ள உறவுகளையும் வலுப்படுத்தி வருகிறது.

கொத்துக் குண்டு

உக்ரைனுக்கு எதிரான போரில் ரஷ்யாவின் முக்கிய கூட்டாளியாக வட கொரியா உருவெடுத்துள்ளது. ஹ்வாசோங்-11 என்பது KN-23 அல்லது KN-24 என்றும் அழைக்கப்படும் ஒரு குறுகிய தூர ஏவுகணை வகையாகும்.

உக்ரைனுக்கு எதிரான போரில், வட கொரியா இதை ரஷ்யாவிற்கு வழங்கியதாக உக்ரைன் கூறியுள்ளது. மத்திய கிழக்கு போரின் போது இஸ்ரேல் மீது தாக்குதல் நடத்த ஈரான் கொத்து குண்டுகளைப் பயன்படுத்தியுள்ளது.

வட கொரியா வெளியிட்டுள்ள தகவலின் அடிப்படையில், கொத்துக் குண்டு பொருத்தப்பட்ட தரைக்குத் தரை ஏவப்படும் உத்திசார் பாலிஸ்டிக் ஏவுகணைகளால், 6.5-7 ஹெக்டேர் பரப்பளவைக் கொண்ட எந்தவொரு இலக்கையும் மிக அதிக அடர்த்தி கொண்ட சக்தியுடன் சாம்பலாக்க முடியும் என்பதை சமீபத்திய சோதனைகள் உறுதிப்படுத்தியுள்ளதாக தெரிவிக்கப்பட்டுள்ளது.

ஐக்கிய நாடுகள் சபையின் தொடர்ச்சியான தடைகளின் கீழ், வட கொரியா பாலிஸ்டிக் ஏவுகணைகளைச் சோதிப்பதற்குத் தடை விதிக்கப்பட்டுள்ளது குறிப்பிடத்தக்கது.