ஈரானின் பிக்காக்ஸ் மலை ரகசியம்: புதிய தரவுகளுடன் ட்ரம்பைச் சந்திக்கும் நெதன்யாகு

ஈரானின் பிக்காக்ஸ் மலை அணுசக்தி தளம் குறித்த இஸ்ரேலின் புதிய இரகசிய உளவுத் தகவல்களை பிரதமர் நெதன்யாகு ஜனாதிபதி ட்ரம்புடன் பகிர இருப்பதாகத் தகவல்கள் தெரிவிக்கின்றன.

மீண்டும் மூட்டிவிடக்கூடும்

போர் மற்றும் ஈரானின் அணுசக்தித் திட்டம் குறித்து விவாதிக்க, அமெரிக்க ஜனாதிபதி டொனால்ட் ட்ரம்ப் இன்று இஸ்ரேலியப் பிரதமர் பெஞ்சமின் நெதன்யாகுவைச் சந்திக்கவுள்ளார்.

இந்தச் சந்திப்பின்போது, ​​ஈரானின் அண்மைக்கால அணுசக்தி நடவடிக்கைகள் குறித்த ஆதாரங்களை நெதன்யாகுவின் குழுவினர் ஒப்படைப்பார்கள் என்று ஜெருசலேமில் உள்ள ஒரு வட்டாரம் நியூயார்க் போஸ்ட் நாளிதழிடம் தெரிவித்துள்ளது.

சுமார் 14 நாட்கள் தொடர்ச்சியாகத் தாக்குதல்கள் நடைபெற்ற நிலையில், ஈரானுடனான பேச்சுவார்த்தைகள் மீண்டும் தொடங்கவுள்ளதாக திங்களன்று ட்ரம்ப் அறிவித்தார்; ஆனால், இஸ்ரேலின் அதிர்ச்சியூட்டும் வகையிலான அந்தத் தரவுகள் முழு அளவிலான போரை மீண்டும் மூட்டிவிடக்கூடும் என்றே அஞ்சப்படுகிறது.

பேச்சுவார்த்தைகளை மீண்டும் தொடங்கவுள்ளதாக ட்ரம்ப் அறிவித்தாலும், ஈரான் தரப்பில் அதை நிராகரித்துள்ளனர். மட்டுமின்றி, அமெரிக்காவுடன் தற்போதைய சூழலில் நேரடி பேச்சுவார்த்தை எதுவும் நடைபெறவில்லை என்றும் தெரிவித்துள்ளனர்.

நான்காவது வெப்ப அலையை எதிர்கொள்ளவிருக்கும் பிரித்தானியா... மக்களுக்கு வேண்டுகோள்

ஆனால், ஆயுதங்களின் பற்றாக்குறை காரணமாகவே ட்ரம்ப் ஈரான் மீதான தாக்குதலுக்கு இடைவெளி விடுகிறார் என்ற கருத்தும் ஊடகங்களில் கசிந்துள்ளது.

இஸ்ரேலில் கடும் அரசியல் நெருக்கடியை எதிர்கொள்ளும் பெஞ்சமின் நெதன்யாகு, ஈரானுடனான அமெரிக்கப் போரை நீட்டிக்க வேண்டும் என்றே வலியுறுத்தி வருகிறார்.

இந்த நிலையில், பிக்காக்ஸ் மலைக்குள் ஆழமாக அமைந்துள்ள சுரங்கங்களுக்குள், ஈரான் ஆயிரக்கணக்கான யுரேனியம் செறிவூட்டும் மையவிலக்கு இயந்திரங்களை நகர்த்தியுள்ளதாக இஸ்ரேல் நம்புவதாக அங்குள்ள அதிகாரிகள் வால் ஸ்ட்ரீட் ஜர்னலிடம் தெரிவித்துள்ளனர்.

ஜூன் 2025-இல் நடைபெற்ற 12 நாள் போரின்போது, ​​ஈரானின் மூன்று முக்கிய அணுசக்தி நிலையங்கள் மீது அமெரிக்கா மற்றும் இஸ்ரேல் நடத்திய தாக்குதல்களுக்குப் பிறகு, ஈரான் நிர்வாகம் இந்த இடமாற்றத்தைச் செய்ததாகக் கூறப்படுகிறது.

அதிக பாதுகாப்புடையதாக

மிட்நைட் ஹேமர் என்றழைக்கப்பட்ட அந்த நடவடிக்கையின் ஒரு பகுதியாக, ஃபோர்டோ, நடன்ஸ் மற்றும் இஸ்ஃபஹான் ஆகிய நகரங்கள் மீது பாரிய வெடிகுண்டு ஊடுருவல் தாக்குதல்கள் நடத்தப்பட்டன.

நடன்ஸ் அணுசக்தி நிலையத்திற்கு அருகில், கோலாங் மலைக்கு 300 அடிக்கும் அதிகமான ஆழத்தில் பிக்காக்ஸ் மலை மறைவிடம் அமைந்துள்ளது. அந்த இடம் பலத்த பாதுகாப்புடன் அமைக்கப்பட்டுள்ளது; அங்கு இரண்டு சுரங்கப் பாதைக் கட்டமைப்புகள் இருப்பதாகக் கருதப்படுகிறது.

மேலும், மலைக்குள் சென்று, ஆழத்தில் புதைந்துள்ள ஒரு செயல்பாட்டு மையத்திற்கு இட்டுச் செல்லும் சுரங்கப்பாதைகள் இருப்பதை செயற்கைக்கோள் படங்கள் முன்னரே வெளிப்படுத்தின.

அமெரிக்கா மற்றும் இஸ்ரேலால் தாக்கப்பட்ட எந்தவொரு தளத்தை விடவும் இது அதிக பாதுகாப்புடையதாக இருக்கலாம் என்று நிபுணர்கள் கூறுகின்றனர்.

ஈரானின் பிற முக்கிய அணுசக்தி பதுங்கு குழிகள் மீது குண்டுவீசிய போதிலும், ட்ரம்ப் முன்பு அந்த இடத்தை மட்டும் தாக்காமல் விட்டுவிட்டார். ஆனால், அந்தப் பகுதியின் மீது அமெரிக்கா மிக விரைவில் மிகக் கடுமையான தாக்குதலை நடத்தும் என்று அவர் கடந்த வாரம் எச்சரித்தார்.

ட்ரம்புடனான சந்திப்பின்போது, ​​ஈரான் தனது ஏவுகணை மற்றும் ட்ரோன் திட்டங்களை மீண்டும் கட்டமைத்து வருவதற்கான ஆதாரங்களையும் இஸ்ரேல் வெளிப்படுத்தும் என்றும் எதிர்பார்க்கப்படுகிறது.