87 வயது பெண்மணிக்கு நேர்ந்தது... ஸ்பெயின் மொத்தம் ஸ்தம்பிக்க வைத்த போராட்டம்

Tens of thousands protest against housing crisis in Spain: ஸ்பெயினில் வீட்டுவசதி நெருக்கடிக்கு எதிராகப் பல்லாயிரக்கணக்கானோர் போராட்டம் நடத்தினர்.

அதிகரித்து வரும் வீட்டுவசதி நெருக்கடியைச் சமாளிக்க நடவடிக்கை எடுக்கக் கோரி, மாட்ரிட் மற்றும் பிற ஸ்பானிய நகரங்களின் வீதிகளில் பல்லாயிரக்கணக்கான மக்கள் திரண்டு போராட்டத்தில் ஈடுபட்டுள்ளனர்.

பொது வேலைநிறுத்தம்

மாட்ரிட் நகரில் 87 வயது பெண்மணி ஒருவர் சொந்த வீட்டில் இருந்து வெளியேற்றப்பட்ட விவகாரம் மற்றும் பிற வீட்டுவசதிப் பிரச்சினைகள் தொடர்பான மக்களின் கடும் அதிருப்தியைத் தணிப்பதற்காக முன்வைக்கப்பட்ட நடவடிக்கைகள்,

வெள்ளிக்கிழமையன்று நாடாளுமன்றத்தில் நிராகரிக்கப்பட்டதைத் தொடர்ந்து, சனிக்கிழமையன்று போராட்டக்காரர்கள் பொது வேலைநிறுத்தத்திற்கு அழைப்பு விடுக்கும் பதாகைகளை ஏந்தி முழக்கமிட்டனர்.

இதனிடையே, 70,000 பேர் போராட்டத்தில் ஈடுபட்டதாக அதிகாரிகள் தெரிவித்த நிலையில், போராட்ட ஏற்பாட்டாளர்கள் அந்த எண்ணிக்கையை 5 லட்சமாகக் குறிப்பிட்டுள்ளனர்.

100 மில்லியன் பீப்பாய் எண்ணெய்... ட்ரம்பின் மிரட்டலுக்குப் பணித்த ஐரோப்பிய ஒன்றியம்

வீட்டு வசதிக்கான சட்ட மசோதா நிறைவேறாததைத் தொடர்ந்து, ஸ்பெயின் பிரதமர் பெட்ரோ சான்செஸ் நவம்பர் மாதத்தில் முன்கூட்டியே தேர்தலை அறிவிக்கக்கூடும் என்று ஸ்பானிய ஊடகங்கள் வெள்ளிக்கிழமை செய்தி வெளியிட்டன.

இந்த ஆர்ப்பாட்டங்கள் தேசிய அளவில் ஆதிக்கம் செலுத்தி, சான்செஸின் நெருக்கடியில் சிக்கியுள்ள அரசாங்கத்திற்கு நிம்மதி அளித்து, சியூட்டாவில் சமீபத்தில் நடந்த நிகழ்வுகளின் நீடித்த தாக்கத்திலிருந்து கவனத்தைத் திசைதிருப்பியுள்ளதாகவே அரசியல் பார்வையாளர்களின் கருத்தாக உள்ளது.

சனிக்கிழமையன்று ஸ்பெயினின் 50 நகரங்களில் போராட்டங்கள் அமைதியான முறையில் நடைபெற்றன. தென்கிழக்கு நகரமான வாலென்சியாவில், போராட்டத்தைக் கலைக்க ரப்பர் குண்டுகள் மற்றும் கண்ணீர்ப்புகைக் குண்டுகளைப் பயன்படுத்திய காவல்துறையினருடன் போராட்டக்காரர்கள் மோதலில் ஈடுபட்டனர்.

மாட்ரிட் நகரில் போராட்டத்தில் ஈடுபட்ட 26 வயதான மார்கோஸ் சைன்ஸ் தெரிவிக்கையில், முன்பு நண்பர்களுடன் இணைந்து இரண்டு படுக்கையறைகள் கொண்ட ஒரு வீட்டை மாதம் 900 யூரோக்களுக்கு வாடகைக்கு எடுத்து வசித்து வந்ததாகவும், ஆனால் தற்போது ஒரு படுக்கையறை கொண்ட வீட்டிற்கே பெரும்பாலும் 1,000 யூரோக்கள் – அதாவது தலைநகரின் இடைநிலை மாதச் சம்பளத்தில் பாதி அளவு – செலவாகிறது என்றும் கூறியுள்ளார்.

மேலும், வாடகை உயர்வைக் கட்டுப்படுத்த யாராவது முன்வரும் வரை அதை எதிர்த்துப் போராடப்போவதாக குறிப்பிட்டுள்ள அவர்; இல்லையெனில் நாங்கள் அனைவரும் மாட்ரிட்டை விட்டு வெளியேற வேண்டிய சூழல் ஏற்படும் என்றும், தாம் மாட்ரிட்டைச் சேர்ந்தவன் என்பதால் அது வருத்தமளிக்கும் விடயம் என்றும் குறிப்பிட்டார்.

எதிராக வாக்களித்தன

வெள்ளிக்கிழமையன்று, சான்செஸின் சோசலிசக் கட்சி தலைமையிலான கூட்டணி அரசாங்கம் இரண்டு அரசாணை முன்மொழிவுகளைச் சமர்ப்பித்தது; 2030-ஆம் ஆண்டு வரை குடியிருப்பவர்களை வெளியேற்றுவதைத் தடை செய்வது முதல், தற்காலிக வாடகை மற்றும் அறை வாரியான வாடகைக்கு விடுதல் ஆகியவற்றை முறைப்படுத்துவது வரை, வீட்டு வசதி கிடைப்பதை மேம்படுத்துவதை நோக்கமாகக் கொண்ட பல்வேறு நடவடிக்கைகள் இதில் அடங்கும்.

ஆனால், நாடாளுமன்றத்திற்கு வெளியே போராட்டக்காரர்களின் கோபத்தையும் மீறி, கன்சர்வேட்டிவ் மக்கள் கட்சி, தீவிர வலதுசாரி வோக்ஸ் மற்றும் கட்டலான் சுதந்திர ஆதரவுக் கட்சியான ஜுன்ட்ஸ் ஆகியன அரசாங்கத்தின் இரண்டு ஆணைகளுக்கும் எதிராக வாக்களித்தன.

விண்ணை முட்டும் வீட்டு வாடகைக் கட்டணங்களால் நீண்ட காலமாக புகைந்துகொண்டிருந்த கோபம், கடந்த மாத இறுதியில், சக்கர நாற்காலியைப் பயன்படுத்தும் 87 வயதான மரிகார்மென் அபாஸ்கல், தான் 70 ஆண்டுகளாக வசித்து வந்த வீட்டிலிருந்து வெளியேற்றப்பட்டபோது கொதித்து வெடித்தது.

தனது குடியிருப்பை வாங்கிய முதலீட்டு நிறுவனம் கோரிய 230 சதவீத வாடகை உயர்வைச் செலுத்தத் தன்னால் இயலவில்லை என்று அந்த எண்பது வயது மூதாட்டி கூறினார்.

இதனால் அவர் குடியிருப்பில் இருந்து வெளியேற்றப்பட்ட விவகாரம், தற்போது ஸ்பெயின் முழுவதும் ஸ்தம்பிக்கும் வகையில் போராட்டமாக வெடித்துள்ளது.