நிலநடுக்கத்தின் பின் அதிர்வுகளால் நடுக்கத்தில் மக்கள்... அவசரநிலையை அறிவித்த பனாமா

Panama declares state of emergency: பனாமா அவசரநிலையை அறிவித்துள்ளது.

நாட்டை உலுக்கிய இரண்டு சக்திவாய்ந்த நிலநடுக்கங்களின் பின் நில அதிர்வுகள் பல மணிநேரம் மக்களை நடுங்க வைத்துள்ளதால், பனாமா அரசாங்கம் சனிக்கிழமையன்று அவசரநிலையை அறிவித்துள்ளது.

பனாமா முழுவதும்

வெள்ளிக்கிழமையன்று ஏற்பட்ட 7.7 மற்றும் 6.6- ரிக்டர் அளவிலான நிலநடுக்கங்களில் உயிரிழப்புகள் ஏற்பட்டுள்ளதாக அதிகாரிகள் உறுதி செய்யவில்லை.

ஆனால் பனாமாவின் மொத்தமுள்ள 10 மாகாணங்களிலும் மற்றும் இரண்டு பூர்வகுடி பிரதேசங்களிலும் சேதங்கள் பதிவாகியுள்ளன. நிலநடுக்கங்கள் மையப்புள்ளிக்கு அருகில் கட்டிடங்களைத் தரைமட்டமாக்கியதுடன், பனாமா முழுவதும் மக்கள் வீடுகளை விட்டு வெளியேற வேண்டிய நிலை ஏற்பட்டது.

இதனிடையே, நில அதிர்வு ஆய்வாளர்கள் 5.8, 5.5 மற்றும் 5.2 ரிக்டர் அளவு கொண்ட அதிர்வுகள் உட்பட 100-க்கும் மேற்பட்ட பின் அதிர்வுகளைப் பதிவு செய்துள்ளனர்.

ஹவுதிகளுக்கு எதிராக... சவுதியுடன் அமெரிக்காவும் களமிறங்கலாம்: ட்ரம்ப் சூசகம்

அமெரிக்க புவியியல் ஆய்வு மையத்தின் தகவலின்படி, அண்டை நாடான கொலம்பியாவிலும் உணரப்பட்ட அந்த முந்தைய நிலநடுக்கமானது, மத்திய மாகாணமான ஹெரேராவில் உள்ள பிடலோசா அரிபா (Pitaloza Arriba) எனும் தொலைதூரப் பகுதிக்குத் தென்மேற்கே சுமார் 10 கி.மீ (6 மைல்) தொலைவில் மையம் கொண்டிருந்தது.

இது 10 கி.மீ (6 மைல்) ஆழத்தில் ஏற்பட்டது. இந்த நிலையில், தலைநகரான பனாமா நகரில் நடைபெற்ற செய்தியாளர் சந்திப்பில், ஜனாதிபதி அலுவலக அமைச்சரான ஜுவான் கார்லோஸ் ஒரில்லாக் அவசரநிலையை அறிவித்தார்.

வீடுகள், பள்ளிகள், சுகாதார நிலையங்கள், சாலைகள் மற்றும் தங்கும் விடுதிகள் ஆகியவை சேதமடைந்துள்ளதாகவும் அவர் கூறியுள்ளார். தேசிய குடிமைப் பாதுகாப்பு அமைப்பின் துணை இயக்குநர் மாலிட்ஸி ரிவேரா, லேசான மற்றும் மிதமான காயங்களுக்குள்ளான 27 பேர் பற்றிய தகவல்கள் கிடைத்துள்ளதாகத் தெரிவித்தார்.

அதிகமான சேதங்கள் வெராகுவாஸ், ஹெரேரா, கோக்லே மற்றும் லாஸ் சாண்டோஸ் ஆகிய மத்திய மாகாணங்களில் ஏற்பட்டுள்ளன. சிவில் பாதுகாப்பு முகமையின் தகவலின்படி, சுமார் 420 வீடுகளும் அதே எண்ணிக்கையிலான அரசுப் பள்ளிகளும் சேதமடைந்துள்ளன.

மேலும், நிலநடுக்கங்களால் ஏழு விடுதிகள், குறைந்தது 13 தேவாலயங்கள் மற்றும் ஒன்பது பாலங்கள் பாதிக்கப்பட்டுள்ளதாகவும் அது தெரிவித்தது. நிலநடுக்கத்தின் மையப்பகுதிக்கு வடகிழக்கே சுமார் 64 கி.மீ தொலைவில் அமைந்துள்ள, காலனித்துவ காலத்தைச் சேர்ந்த லா வில்லா டி லாஸ் சாண்டோஸ் (La Villa de Los Santos) எனும் பகுதியில் வீடுகளும் வரலாற்றுச் சிறப்புமிக்க கத்தோலிக்கத் தேவாலயம் ஒன்றும் இடிந்து விழுந்தன.

கடுமையான விதிமுறைகள்

இரவு முழுவதும் தெருக்களிலேயே தங்கியிருந்த மக்கள், அடுத்து என்ன செய்வது என்பது குறித்த அரசின் வழிகாட்டுதலுக்காகக் காத்திருந்தனர்.

மெக்சிகோவின் தேசிய தன்னாட்சிப் பல்கலைக்கழகத்தின் நில அதிர்வு ஆய்வுத் துறையின் தலைவரான கார்லோஸ் வால்டெஸ் கூறுகையில், பனாமா பரவலான உயிரிழப்புகளைத் தவிர்த்ததாகத் தோன்றுவதற்கு, அங்குள்ள கடுமையான கட்டிட விதிமுறைகள் - குறிப்பாகத் தலைநகரில் வானளாவிய கட்டிடங்களின் கட்டுமானம் தொடர்பான விதிமுறைகள் - காரணமாக இருக்கலாம் என்று தெரிவித்தார்.

இதனிடையே, அமெரிக்க வெளிவிவகார அமைச்சின் போதைப்பொருள் கட்டுப்பாட்டுப் பிரிவின் உதவியுடன் இயங்கிய இரண்டு ஹெலிகொப்டர்கள், நிலநடுக்கத்தால் பாதிக்கப்பட்ட மக்களுக்கு 2,000 பவுண்டுகள் உணவுப் பொருட்களை வழங்கியதாக அமெரிக்க ராணுவத்தின் தெற்குப் பிரிவு (Southern Command) தெரிவித்துள்ளது.