ஏவுகணை கையிருப்பை அதிகரிக்கும் ரஷ்யா - உக்ரைன் உளவுத்துறை தகவல்

Missile Ukraine Russia

By Ragavan Nov 04, 2026 01:04 PM GMT

Ragavan

in சர்வதேசம்

Report

Russia Missile Stockpile Grows Amid Sanctions: ஏவுகணை கையிருப்பை ரஷ்யா அதிகரித்துவருவதாக உக்ரைன் உளவுத்துறை தெரிவித்துள்ளது.

உக்ரைனின் பாதுகாப்பு புலனாய்வு அமைப்பு (DIU/HUR) வெளியிட்டுள்ள தகவலின்படி, ரஷ்யா தனது நீண்ட தூர ஏவுகணை கையிருப்பை தொடர்ந்து அதிகரித்து வருவதுடன், புதிய ஏவுகணைகள் உற்பத்தியையும் வேகமாக மேற்கொண்டு வருகிறது.

அந்த தகவலின்படி, ரஷ்யாவிடம் தற்போது 1,400-க்கும் மேற்பட்ட நீண்ட தூர ஏவுகணைகள் இருப்பதாக மதிப்பிடப்பட்டுள்ளது.

Russia-Missile-Stockpile-Grows-Amid-Sanctions

இதில் சுமார் 500 ஒனிக்ஸ் (Oniks) ஏவுகணைகள், 400-க்கும் அதிகமான Kh-101, Kh-55 மற்றும் Kh-35 வகை குரூஸ் ஏவுகணைகள், 350 கலிபர் (Kalibr) ஏவுகணைகள், 130 இஸ்கந்தர் (Iskander) பாலிஸ்டிக் ஏவுகணைகள் மற்றும் 50 கின்ஜால் (Kinzhal) ஹைப்பர்சோனிக் ஏவுகணைகள் அடங்குகின்றன.

2023-ஆம் ஆண்டு நவம்பரில் ரஷ்யாவின் நீண்ட தூர ஏவுகணை கையிருப்பு சுமார் 870-ஆக இருந்ததாகக் கூறப்பட்ட நிலையில், தற்போது அந்த எண்ணிக்கை கணிசமாக உயர்ந்துள்ளது. இது ரஷ்யாவின் உற்பத்தித் திறன் அதிகரித்திருப்பதை காட்டுவதாக உக்ரைன் அதிகாரிகள் தெரிவித்துள்ளனர்.

புலனாய்வு அமைப்பின் தரவுகளின்படி, ரஷ்யா மாதந்தோறும் 40 முதல் 50 இஸ்கந்தர் ஏவுகணைகள், 30 முதல் 50 கலிபர் ஏவுகணைகள் மற்றும் சுமார் 50 Kh-101 ஏவுகணைகளை தயாரித்து வருகிறது. குறிப்பாக Kh-101 ஏவுகணைகளின் உற்பத்தி கடந்த ஆண்டுடன் ஒப்பிடுகையில் அதிகரித்துள்ளதாக குறிப்பிடப்பட்டுள்ளது.

மேற்கத்திய நாடுகள் விதித்துள்ள பொருளாதார தடைகள் மற்றும் தொழில்நுட்பக் கட்டுப்பாடுகள் இருந்தபோதிலும், ரஷ்யா தனது ஏவுகணை உற்பத்தியைத் தொடர்ந்து விரிவுபடுத்தி வருவதாக உக்ரைன் கூறுகிறது.

ரஷ்யாவிற்கு ஆதாரமாக அமையலாம்

இந்த அதிகரித்த கையிருப்பு மற்றும் உற்பத்தி திறன், உக்ரைன் மீது நடத்தப்படும் தாக்குதல்களுக்கு ரஷ்யாவிற்கு நீண்டகால ஆதாரமாக அமையலாம் என்றும் அதிகாரிகள் எச்சரித்துள்ளனர்.

உக்ரைனின் மதிப்பீட்டின்படி, ரஷ்யா தற்போது ஏவுகணை தாக்குதல்களை திட்டமிடுவதிலும் இலக்குகளை கண்காணிப்பதிலும் முன்பைவிட அதிக திறனுடன் செயல்பட்டு வருகிறது. இதனால் எதிர்காலத்தில் தாக்குதல் அபாயம் மேலும் அதிகரிக்கக்கூடும் என்ற கவலை சர்வதேச அளவில் எழுந்துள்ளது.