ரஷ்யாவின் பிளேக் ஆய்வகத்தில் கசிந்த பாக்டீரியா; ஒருவர் உயிரிழப்பு, கண்காணிப்பில் 200 பேர்

plague outbreak fear in russia after lab researcher death: ரஷ்யாவின் பிளேக் ஆய்வகத்தில் உயிருள்ள பாக்டீரியாக்கள் கசிந்ததில் ஒருவர் உயிரிழந்துள நிலையில், அவருடன் தொடர்பிலிருந்த 200க்கும் மேற்பட்டோரை தனிமைப்படுத்தி, அரசு கண்காணித்து வருகிறது.

ஆய்வகத்தில் உடைந்த சோதனைக் குழாய்

ரஷ்யாவின் சைபீரியாவில் இர்குட்ஸ்க் பிளேக் எதிர்ப்பு ஆராய்ச்சி நிறுவனம் செயல்பட்டு வருகிறது.

இந்த ஆய்வகத்தில் பணியாற்றிய 28 வயதான தாரியா ஷிபிலோவா என்ற ஆய்வகத் தொழில்நுட்ப வல்லுநர், மாதிரிகளைச் சேகரிக்கும்போது உயிருள்ள பாக்டீரியாக்கள் அடங்கிய சோதனைக் குழாயை தவறுதலாக உடைத்ததாகக் கூறப்படுகிறது. 

இதனையடுத்து உடல்நிலை பாதிக்கப்பட்ட அவர், கடந்த செப்டம்பர் 28 ஆம் திகதி ஷெலெகோவ் மருத்துவமனையில் சிகிச்சைக்காக அனுமதிக்கப்பட்டார்.

செயற்கை சுவாச கருவிகளின் உதவியுடன் சிகிச்சை பெற்று வந்த அவர், சிகிச்சை பலனின்றி அக்டோபர் 1 ஆம் திகதி உயிரிழந்தார். 

அவருக்கு நிம்மோனியா பிளேக் அறிகுறிகள் இருந்தாலும், அவர் என்ன காரணத்தால் உயிரிழந்தார் என அதிகாரப்பூர்வமாக அறிவிக்கப்படவில்லை. 

நாட்டில் பிளேக் நோய் பரவல் இல்லை என ரஷ்யா சுகாதாரத் துறை தெரிவித்துள்ளது.

கண்காணிப்பில் 200 பேர்

இருப்பினும் ஆய்வகத்தில் அவருடன் பணியாற்றியவர்கள், அவர் சிகிச்சை பெற்ற ஷெலெகோவ் மருத்துவமனையில் இருந்தவர்கள் உட்பட 200க்கும் மேற்பட்டோரை அரசு தனிமைப்படுத்தி கண்காணித்து வருகிறது. 

Flydubai விமான தாக்குதல்தாரியின் இலக்கு என்ன? பரபரப்பு தகவல்

ஆனால் அவர்களில் யாருக்கும் நோய் அறிகுறிகள் இல்லை எனவும், மருத்துவ பரிசோதனை முடிவில் யாருக்கும் பாசிட்டிவ் இல்லை என தெரிவிக்கப்பட்டுள்ளது.

முன்னெச்சரிக்கை நடவடிக்கையாக, ஆய்வகத்திற்கு அருகில் உள்ள அலுமினிய ஆலை தங்களது ஊழியர்களை மாஸ்க் அணியுமாறு அறிவுறுத்தியுள்ளது.

நிலைமையைக் கண்காணிக்க ரஷ்யாவின் தலைமைச் சுகாதார மருத்துவர் அன்னா பொபோவா மாஸ்கோவிலிருந்து சைபீரியாவிற்கு வருகை தந்துள்ளார். 

நிம்மோனியா பிளேக் என்பது இருமல் மற்றும் தும்மல் மூலம் வெளிப்படும் நீர்த்துளிகள் வழியாக, காற்றின் மூலம் மனிதருக்கு மனிதர் எளிதில் பரவக்கூடியது.

காய்ச்சல், தலைவலி, மூச்சுத்திணறல், நெஞ்சு வலி மற்றும் இருமலின் போது ரத்தம் கலந்த சளி வெளிப்படுதல் ஆகியவை இதன் முக்கிய அறிகுறிகளாகும்.