உக்ரைனால் பயன்படுத்தப்படும் பிரித்தானிய ட்ரோன்கள்... மிரட்டல் விடுத்த ரஷ்யா

Russia threatens UK with consequences: பிரித்தானியாவின் ட்ரோன்களை உக்ரைன் பயன்படுத்தியதைத் தொடர்ந்து, பின்விளைவுகள் ஏற்படும் என ரஷ்யா எச்சரித்துள்ளது.

ரஷ்யாவிற்கு எதிரான தாக்குதல்களில் உக்ரைன் முதல் முறையாக பிரித்தானிய தயாரிப்பு ட்ரோன்களைப் பயன்படுத்தியதைத் தொடர்ந்து, ரஷ்யா பதிலடி கொடுக்கப் போவதாக எச்சரித்துள்ளது.

தீவிரப்படுத்தும் பிரித்தானியா

கிழக்கு ஐரோப்பாவில் நடக்கும் போரில் பிரித்தானியா மேலும் தலையிட்டால், அது மிகப் பெரிய விலையைக் கொடுக்க நேரிடும் என்று லண்டனில் உள்ள ரஷ்ய தூதரகம் எச்சரித்துள்ளது.

மேலும், அமைதிக்காகப் பாடுபடுவதாகப் பாசாங்குத்தனமாகக் கூறிக்கொண்டே, உக்ரைன் நெருக்கடியை வேண்டுமென்றே தீவிரப்படுத்துவதாக பிரித்தானியா மீது ரஷ்ய தூதரகம் குற்றம் சாட்டியுள்ளது.

பிரித்தானியா ரஷ்யாவை அடக்கி ஆளவும், பிறரின் கைகளைப் பயன்படுத்தி அதற்கு உச்சபட்ச சேதத்தை ஏற்படுத்தவும் முயலும் உக்ரேனிய நவ-நாஜிக்களின் இரத்தக்களரி குற்றங்களுக்கும் பயங்கரவாதத் தாக்குதல்களுக்கும் உடந்தையாகவும் துணைபோகும் ஒரு கருவியாகவும் செயல்படுகிறது என்றும் அறிக்கை ஒன்றில் குறிப்பிட்டுள்ளது.

பிரித்தானியாவின் செயல்களுக்குத் தவிர்க்க முடியாத பின்விளைவுகள் ஏற்படும், அதற்கு அந்த நாடு பதிலளிக்க வேண்டியிருக்கும். இந்த மோதலில் பிரித்தானியாவின் ஈடுபாடு எந்த அளவுக்கு ஆழமாகிறதோ, உக்ரைனின் பயங்கரவாதத்திற்கு அதன் ஆதரவு எந்த அளவுக்கு அதிகமாகிறதோ, அந்த அளவுக்கு அதற்கான விலையும் அதிகமாக இருக்கும் எனவும் குறிப்பிட்டுள்ளது.

பிரித்தானியாவில் திருமணம்... குடும்பம் ஒன்று விமான நிலையம் செல்லும் வழியில் கோர சம்பவம்

இரண்டு இங்கிலாந்து நிறுவனங்களால் தயாரிக்கப்பட்ட ட்ரோன்களை உக்ரைன், ரஷ்ய எண்ணெய் சுத்திகரிப்பு நிலையங்களைத் தாக்கப் பயன்படுத்தியதாக வெளியான செய்திகளைத் தொடர்ந்து இந்தத் தலையீடு வந்துள்ளது.

வெளியாகியுள்ள தரவுகளின் அடிப்படையில், ரஷ்யாவின் இன்றியமையாத வளத்திற்கு எதிரான ஜெலென்ஸ்கியின் நடவடிக்கையானது 35 பில்லியன் பவுண்டுகளுக்கும் அதிகமான பொருளாதார சேதத்தை ஏற்படுத்தியுள்ளதுடன், நாட்டில் எரிபொருள் பற்றாக்குறைக்கும் வழிவகுத்துள்ளது.

பறிமுதல் செய்வதாக

வெளியாகியுள்ள தகவலில், பாதுகாப்புத் துறையின் மாபெரும் நிறுவனமான BAE சிஸ்டம்ஸின் துணை நிறுவனமான காலன்-லென்ஸ் தயாரித்த நியான் ட்ரோன்களை உக்ரைன் பயன்படுத்தியுள்ளது. பாதுகாப்பு காரணங்களால் இன்னொரு ட்ரோன் தொடர்பில் தகவல் வெளியாகவில்லை.

நியான் ட்ரோனின் பறக்கும் தூரம் 150 மைல்கள் என்பதால், அதனால் உக்ரைனுக்கு அருகிலுள்ள ரஷ்யாவின் சில பகுதிகளை மட்டுமே தாக்க முடியும்.

மாஸ்கோவிற்கு அருகிலுள்ள வோல்கோகிராட் மற்றும் யாரோஸ்லாவ்ல் ஆகிய இடங்களில் உள்ள எண்ணெய் சுத்திகரிப்பு நிலையங்கள் மீது ட்ரோன் தாக்குதல்கள் நடத்தப்பட்டதாகத் தகவல்கள் தெரிவிக்கின்றன.

இதனிடையே, ரஷ்ய எண்ணெய் மீதான தடைகளைத் தவிர்க்க முயன்றுவரும் ரஷ்ய எண்ணெய்க் கப்பல்கள் மீது மேற்கத்திய நாடுகள் மேற்கொண்ட ஒடுக்குமுறையைத் தொடர்ந்து, புடின் கடந்த வாரம் பிரித்தானியாவின் கப்பல்களைப் பறிமுதல் செய்வதாக ஏற்கனவே அச்சுறுத்தியிருந்தார்.

பிரித்தானியா, அமெரிக்கா மற்றும் பிரான்ஸ் ஆகிய நாடுகள் ரஷ்யா மீதான தாக்குதல்களுக்குத் தங்கள் ஆயுதங்களைப் பயன்படுத்த அவ்வப்போது அனுமதி அளித்துள்ளன; இருப்பினும், ஆயுத இருப்பு குறைந்து வருவது மற்றும் இது மோதலைத் தீவிரப்படுத்தும் என்று டொனால்ட் ட்ரம்ப் கொண்டுள்ள அச்சம் ஆகியவற்றின் காரணமாக இத்தகைய அனுமதிகள் மறுக்கப்பட்டு வருகிறது.