உக்ரைன் போரில் கொல்லப்பட்ட ரஷ்ய வீரர்: பிணவறையில் நிகழ்ந்த எதிர்பாராத திருப்பம்

உக்ரைன் போரில், உக்ரைன் கவச வாகன தாக்குதலில் கொல்லப்பட்ட ரஷ்ய வீரர் ஒருவர் பிணவறையில் திடீரென கண் விழித்த சம்பவம் ஒன்று நிகழ்ந்துள்ளது.

பிணவறையில் நிகழ்ந்த எதிர்பாராத திருப்பம்

உக்ரைன் போரில், கவச வாகனம் ஒன்று தாக்கியதில் தூக்கி வீசப்பட்டார் ஈகோர் ( Igor Kononenko, 37) என்னும் ரஷ்ய வீரர்.

மருத்துவமனைக்குக் கொண்டு செல்லப்பட்ட ஈகோரை பரிசோதித்த மருத்துவர்கள் அவர் ஏற்கனவே உயிரிழந்துவிட்டதாக தெரிவித்தனர்.

அவரது உடலை, சடலங்களை வைக்கும் பையில் வைத்து பிணவறையில் வைத்துள்ளார்கள்.

பிணவறையில் வைக்கப்பட்ட ஈகோர் திடீரென எழுந்திருக்க, அங்கு காவலிருந்த வீரர் ஒருவர் பயத்தில் மயங்கிச் சரிந்துள்ளார்.

அவரைத் தட்டி எழுப்பிய ஈகோர், நண்பா என்ன ஆயிற்று என கேட்டு அவரை ஆசுவாசப்படுத்தியுள்ளார்.

அப்படியே மருத்துவமனையில் அவர் நடந்து வர, அவரைக் கண்ட ஒரு செவிலியர் நீங்கள் இறந்துபோனீர்களே என ஆச்சரியத்துடன் கூறி குழப்பமடைந்துள்ளார்.

விடயம் என்னவென்றால், அந்த செவிலியர்தான் ஈகோரை பிணவறைக்குக் கொண்டு சென்றுள்ளார்.

தன்னை சடலங்களை வைக்கும் பையில் வைத்து பிணவறையில் வைத்ததால் கோபமடைந்த ஈகோர், மருத்துவரிடம் சென்று என்னை யார் பிணவறையில் வைத்தது என சண்டை போட்டுள்ளார்.

மருத்துவர், ஈகோர் இறந்ததை உறுதி செய்வதற்காக ஆவணங்களை அவருக்குக் காட்டியுள்ளார்.

இதற்கிடையில், ஈகோர் இறந்துபோனதாக தகவலறிந்த அவரது மனைவி அவரது ஊரில் அழுது புலம்பிக்கொண்டிருக்க, ஈகோர் அவரை தொலைபேசியில் அழைத்துப் பேசியுள்ளார்.

தன் கணவர் உயிருடன் இருப்பதை அறிந்து சந்தோஷப்பட்ட அந்தப் பெண், அதே நேரத்தில் அவர் இறந்துவிட்டதாக கூறிய மருத்துவர் மீது கோபமடைந்துள்ளார்.

கவச வாகனம் வீசிய குண்டு தாக்கியதில் தூக்கி வீசப்பட்ட ஈகோர், மண் சுவர் ஒன்றில் மோதியுள்ளார். அவரது இதயத் துடிப்பு நின்றுவிட்டிருக்கிறது.

ஆகவே, அவர் உயிரிழந்துவிட்டதாக முடிவு செய்த மருத்துவர்கள் அவரை பிணவறையில் வைத்துள்ளார்கள்.

ஆனால், ஈகோரின் இதயம் மீண்டும் துடிக்கத் துவங்க, தான் எப்படி பிணவறைக்கு வந்தேன் என குழப்பமும் கோபமும் அடைந்த ஈகோர் தானே எழுந்து வெளியே வர, இந்த சம்பவம் குறித்து கேள்விப்பட்டவர்கள் எல்லோரும் சுற்றுலாவுக்கு செல்வதுபோல சென்று அவரை பார்த்துவருகிறார்களாம்!