சவுதி அரேபியா எடுத்த அதிரடி முடிவு... ஹார்முஸ் தாக்குதலைக் கைவிட்ட ட்ரம்ப்

சவுதி அரேபியாவும் குவைத்தும் ஹார்முஸ் மீதான ட்ரம்பின் நடவடிக்கையில் தங்கள் தளங்களையோ வான்வெளியையோ பயன்படுத்த அனுமதிக்க மறுத்ததை அடுத்தே Project Freedom என்ற நடவடிக்கைக் கைவிடப்பட்டுள்ளது.

முடிவெடுக்க நிர்பந்தம்

ஆனால், பாகிஸ்தான் மற்றும் குறிப்பிட்ட சில நாடுகளின் கோரிக்கையை ஏற்று, ஈரான் மீதான அந்த நடவடிக்கையை நிறுத்தியதாக ட்ரம்ப் தெரிவித்துள்ளார்.

புதன்கிழமை இரவு சவுதி அரேபியாவின் பட்டத்து இளவரசர் முகமது பின் சல்மான் தொலைபேசி ஊடாக ட்ரம்பைத் தொடர்புகொண்டு, இந்த விவகாரத்தில் முடிவெடுக்க நிர்பந்தித்துள்ளார் என்றே தி வால் ஸ்ட்ரீட் ஜர்னல் மற்றும் தி ஃபைனான்சியல் டைம்ஸ் ஆகியவை தகவல் வெளியிட்டுள்ளது.

ஈரான் தனது வளைகுடா அண்டை நாடுகள் மீது கடுமையாகத் தாக்குதல் நடவடிக்கைகளை மேற்கொள்ளும் நிலையில், அமெரிக்க-இஸ்ரேல் போருக்கு நிரந்தர முற்றுப்புள்ளி வைக்கவே சவுதி அரேபியா விரும்புவதாக தகவல் வெளியாகியுள்ளது.

மேலும், ட்ரம்பின் இந்த Project Freedom என்ற நடவடிக்கை தேவையற்றது என்பதுடன், சிந்தித்து முடிவெடுக்கப்பட்டது அல்ல என்றும் சவுதி அரேபியா நம்புகிறது.

மட்டுமின்றி, வெளியான தகவலின் அடிப்படையில், போரை அமெரிக்கத் தலைமைத் தளபதி நிலையற்ற முறையில் கையாள்வதால் சவுதி அரேபியா அதிருப்தி அடைந்துள்ளது.

இலக்குகள் இல்லாத போக்கு

அவரின் தவுறுகளாலையே ஐக்கிய அரபு அமீரகம் கடுமையானத் தாக்குதலுக்கு இலக்கானது என்றும் சவுதி அரேபியா நம்புகிறது. மேலும், ஈரான் மீதான இஸ்ரேல் மற்றும் அமெரிக்காவின் தாக்குதல் நடவடிக்கைகளால் ஆதாயமடையலாம் என சவுதி அரேபியா நம்பியிருந்த நிலையில், தற்போது, ​​ட்ரம்பின் கணிக்க முடியாத தன்மை மற்றும் தெளிவான இலக்குகள் இல்லாத போக்கு குறித்து சவுதி அரேபியா கவலை கொண்டுள்ளது.

மட்டுமின்றி, பொதுமக்கள் உள்கட்டமைப்புகளைத் தாக்கப் போவதாகவும், ஈரானின் அனைத்து மின் உற்பத்தி நிலையங்களையும் அழிக்க முடிவு செய்துள்ளதாகவும் ட்ரம்ப் விடுத்த அச்சுறுத்தல் சவுதி அரேபியாவைக் கலக்கமடையச் செய்தது.

போருக்கு எதிராக ட்ரம்ப்பை எச்சரிப்பதில், சவுதி அரேபிய தற்போது மற்ற அரபு நாடுகளுடன் இணைந்துள்ளது; மேலும், இராஜதந்திரத் தீர்வு ஒன்றைப் பின்பற்றுமாறும் ட்ரம்ப் நிர்வாகத்தை சவுதி அரேபியா வலியுறுத்தியுள்ளது.

போரை முடிவுக்குக் கொண்டுவரவும், ஹார்முஸ் நீரிணையை மீண்டும் திறக்கவும் ஓர் ஒப்பந்தத்தை ஏற்படுத்தப் பாகிஸ்தான் மேற்கொண்ட முயற்சிகளுக்கும் சவுதி அரேபியா ஆதரவளித்து வருகிறது.