மின்னல் வேகத்தில் முன்னேறும் ஹவுதிகள்... எண்ணெய் குழாய் வழித்தடத்தை மூடிய சவுதி

Saudis shut down oil pipeline: ஹவுதிகளால் எண்ணெய் குழாய் வழித்தடத்தை மூடிய சவுதி அரேபியா.

மத்திய கிழக்கில் விரிவடைந்து வரும் போரின் ஒரு பகுதியாக, மிக முக்கியமான எண்ணெய் வழித்தடமான 'கிழக்கு-மேற்கு' குழாய் வழித்தடம் வான்வழித் தாக்குதலுக்கு உள்ளானதைத் தொடர்ந்து, சவுதி அரேபியா அதனை மூடியுள்ளது.

முன்னெச்சரிக்கை நடவடிக்கை

ஈரான் ஆதரவு ஆயுதக் குழுக்கள் செயல்படும் ஈராக்கில் இருந்து இந்த ட்ரோன் தாக்குதல் நடத்தப்பட்டதாக ஈராக்கும் சவுதி அரேபியாவும் தெரிவித்ததை அடுத்து, உலகின் மிகப்பெரிய கச்சா எண்ணெய் ஏற்றுமதியாளரான சவுதி அரேபியா, குழாய்வழியை தற்காலிகமாக மூடியது.

அரேபிய தீபகற்பம் முழுவதும் செல்லும் 745 மைல் நீளமுள்ள இந்தக் குழாய்த்தொடர், ஹார்முஸ் நீரிணையில் நிலவும் கப்பல் போக்குவரத்து நெரிசலைத் தவிர்த்துச் செல்ல சவுதி அரேபியாவுக்கு உதவியது; அமெரிக்காவுக்கும் ஈரானுக்கும் இடையிலான போரின் காரணமாக அந்த நீரிணையில் கப்பல் போக்குவரத்து மிகக் குறைவாகவே நடைபெற்று வருகிறது.

இதனிடையே, முன்னெச்சரிக்கை நடவடிக்கையாக அந்த எரிபொருள் குழாய் வழித்தடத்தை மூடியுள்ளதாக சவுதி எரிசக்தி அமைச்சகம் தெரிவித்துள்ளது.

கப்பல் போக்குவரத்து கண்காணிப்பு நிறுவனங்கள் மற்றும் ஆய்வாளர்களின் தகவல்படி, கடந்த சில மாதங்களாக இக்குழாய் வழித்தடம் வழியாக நாளொன்றுக்கு 40 முதல் 50 லட்சம் பீப்பாய் எரிபொருள் கொண்டு செல்லப்பட்டு வந்தது; இது உலகளாவிய விநியோகத்தில் 4 சதவீதம் முதல் 5 சதவீதம் வரை என்றே கூறப்படுகிறது.

செங்கடல் துறைமுகத்தைக் கைப்பற்றிய ஹவுதிகள்... உயரும் கச்சா எண்ணெய் விலை

ஏமனில் ஈரானின் ஆதரவு பெற்ற ஹவுதிகள் செங்கடலில் தங்கள் பிடியை இறுக்கியுள்ள சூழலில் இந்தத் தாக்குதல் நடந்துள்ளது; ஹார்முஸ் நீரிணையில் ஏற்பட்டுள்ள இடையூறுகளுடன் இந்தச் சூழலும் இணைந்து, அரேபியத் தீபகற்பத்தின் இரு பகுதிகளிலும் எரிசக்தி விநியோகத்தில் நெருக்கடியை ஏற்படுத்தியுள்ளதுடன், உலகளாவிய கச்சா எண்ணெய் விலையை மீண்டும் ஒரு பீப்பாய்க்கு 100 டொலருக்கும் அதிகமாக உயர்த்தியுள்ளது.

இந்த நிலையில், மின்னல் வேகத்தில் முன்னேறும் ஹவுதிகள் செங்கடலின் நுழைவாயிலில், பாப் அல்-மண்டேப் நீரிணையில் அமைந்துள்ள அதி முக்கியத்துவம் வாய்ந்த பெரிம் தீவை வெள்ளிக்கிழமையன்று கைப்பற்றினர்.

பரந்த அளவிலான நடவடிக்கை

ஈரான் போரை முடிவுக்குக் கொண்டுவருவதற்கான இராஜதந்திர முயற்சிகள் முடங்கியுள்ள நிலையில், சவுதி குழாய்வழித்தடம் மற்றும் பெரிம் தீவு மீது வெள்ளிக்கிழமை அன்று நடந்ததாகப் பதிவான இரட்டைத் தாக்குதல்கள், ஒரு அபாயகரமான பதற்ற அதிகரிப்பை ஏற்படுத்தியுள்ளது.

நவம்பர் மாதம் நடைபெறவுள்ள நாடாளுமன்றத் தேர்தலுக்கு முன்னதாக, போரின் காரணமாக உயர்ந்த எரிபொருள் விலைகள் அமெரிக்க ஜனாதிபதி டொனால்ட் ட்ரம்ப் மற்றும் அவரது குடியரசுக் கட்சிக்கு அரசியல் ரீதியாகப் பாதிப்பை ஏற்படுத்தியுள்ள சூழலில், ஹவுதி கிளர்ச்சியாளர்களுக்கு எதிராக இராணுவ உதவி கோரி சவுதி அரேபியா ட்ரம்ப் நிர்வாகத்தை அணுகியுள்ளதாகத் தகவல்கள் தெரிவிக்கின்றன.

ஆனால், வெளியாகியுள்ள தகவலின் அடிப்படையில், சவுதி பட்டத்து இளவரசர் பின் சல்மானின் கோரிக்கையை ஜனாதிபதி ட்ரம்ப் நிராகரித்துள்ளார் என்றே தெரிய வருகிறது.

சவுதி அரேபியாவின் ரியாத் மற்றும் மதீனா பகுதிகளில் உள்ள கிழக்கு-மேற்கு குழாய் வழித்தடம் வியாழக்கிழமை காலை தாக்கப்பட்டதாக சவுதி எரிசக்தி அமைச்சகம் தெரிவித்துள்ளது.

இதனிடையே, குழாய் வழித்தடத் தாக்குதலுக்குப் பொறுப்பானவர்களைக் கண்டறியும் வகையில் பரந்த அளவிலான நடவடிக்கை மேற்கொள்ளப்பட்டு வருவதாகவே தகவல் கசிந்துள்ளது.

ஹவுதிகள் பாப்-எல்-மண்டேப் நீரிணையின் கட்டுப்பாட்டைக் கைப்பற்றினால், அவர்களுக்கு ஆதரவளிக்கும் ஈரானானது அமெரிக்காவுடனான போரில் ஒரு முக்கிய சாதகமான நிலையைப் பெறக்கூடும்.

ஏமன் உள்நாட்டுப் போரின்போது சவுதி அரேபியாவின் கடுமையான வான்வழித் தாக்குதல்களைத் தாக்குப் பிடித்து நின்ற மலைப்பகுதிப் போராளிகளான ஹவுதிகளின் கட்டுப்பாட்டில் உள்ள பகுதிகளை, செங்கடல் கடற்கரையோரத்தில் இந்த வாரம் மேற்கொள்ளப்படும் மின்னல் வேகத் தாக்குதலின் மூலம் மீண்டும் கைப்பற்ற முயற்சிப்பதாக ஏமன் அரசுப் படைகள் தெரிவித்துள்ளன.

இதனிடையே, ஏமனின் செங்கடல் கடற்கரைப் பகுதியில் ஹவுதிகள் மேற்கொண்ட அதிரடி முன்னேற்றமானது, ஈரானின் புரட்சிகரப் படைகளின் நேரடி வழிகாட்டுதலின் கீழ் நடைபெற்றது என்றே தெரிய வருகிறது.

ஹவுதிகளுக்கு எதிரான போராட்டத்தில் அமெரிக்காவின் ராணுவ உதவியைக் கோருவதற்காக, சவுதி இளவரசர் முகமது பின் சல்மான் வியாழக்கிழமையன்று குறைந்தது இருமுறை ட்ரம்ப்பைத் தொடர்புகொண்டு பேசியுள்ளார்.

ஏற்கனவே ஈரான் போரில் சிக்கிக்கொண்டு வெளியேற முடியாமல் தவிக்கும் ட்ரம்ப் நிர்வாகம், தற்போதைக்கு நேரடி ராணுவ நடவடிக்கையை மேற்கொள்ளத் தயாராக இல்லை என்றும், ஆனால் உளவுத் தகவல் பகிர்வு மற்றும் இலக்குகளைக் கண்டறிதல் ஆகியவற்றில் உதவுவதாக மட்டும் சவுதியிடம் தெரிவித்துள்ளது.