ரஷ்யாவுக்கான எண்ணெய் ஏற்றுமதி... தென் கொரியா எடுத்த அதிரடி முடிவு

South Korea threatens legal action: தென் கொரியா சட்ட நடவடிக்கை எடுக்க அச்சுறுத்தல்.

தங்களது துறைமுகங்களிலிருந்து ரஷ்யாவிற்கு எரிபொருள் ஏற்றுமதி செய்யப்பட்டது உள்நாட்டுச் சட்டத்தை மீறியதாகக் கண்டறியப்பட்டால், சட்ட நடவடிக்கை எடுக்கப்படும் என்று தென் கொரிய அரசு தெரிவித்துள்ளது.

சட்டப்படி நடவடிக்கை

தென் கொரியாவின் வெளிவிவகார மற்றும் வர்த்தக அமைச்சகங்கள் மற்றும் சுங்கத்துறை வெளியிட்ட ஓர் அறிக்கையில், 'தி கார்டியன்' பத்திரிகையால் தெரிவிக்கப்பட்ட சரக்கு ஏற்றும் வழக்குகள் தொடர்பான கூடுதல் தகவல்களை அரசாங்கம் சரிபார்த்து வருவதாகவும்,

அந்தச் சரிபார்ப்பில் நமது சட்டங்களும் விதிமுறைகளும் மீறப்பட்டிருப்பது உறுதிசெய்யப்பட்டால், சட்டப்படி நடவடிக்கை எடுக்கத் திட்டமிட்டுள்ளதாகவும் தெரிவித்துள்ளது.

துறைமுகப் பதிவுகள் மற்றும் கப்பல் கண்காணிப்புத் தரவுகளை கார்டியன் ஆய்வு செய்ததில், ஜூலை மற்றும் ஆகஸ்ட் மாதங்களில், தென் கொரியாவின் பல துறைமுகங்களிலிருந்து 176,000 டன்களுக்கும் அதிகமான எரிபொருள், பெரும்பாலும் டீசல், ரஷ்யாவின் தூரக் கிழக்குப் பகுதிக்கு 14 பயணங்களை மேற்கொண்ட ஏழு டேங்கர் கப்பல்களில் ஏற்றப்பட்டது தெரியவந்தது.

அமெரிக்க எண்ணெய் உற்பத்திக்கு கடும் அச்சுறுத்தல்... உக்கிரமடையும் இசாயாஸ் புயல்

அந்த டேங்கர் கப்பல்களில் மூன்று, பிரித்தானியா மற்றும் ஐரோப்பிய ஒன்றியத்தின் தடைகளுக்கு உட்பட்டிருந்தன. அவற்றில் ஒன்று, தெற்குத் துறைமுகமான யோசு (Yeosu) பகுதிக்கு அப்பால் உள்ள நங்கூரமிடும் இடத்தில், கப்பலுக்குக் கப்பல் பரிமாற்றம் மூலம் சுமார் 26,000 டன்கள் சரக்கை ஏற்றிக்கொண்டது.

ஆனால் இந்த வர்த்தகம், பொருளாதாரத் தடைகள் நடைமுறையையும் உக்ரைனுக்குத் தென் கொரியா அளிக்கும் ஆதரவையும் பலவீனப்படுத்துகிறது என்றே அரசியல் ஆய்வாளர்களின் கருத்தாக உள்ளது.

உக்ரேனிய ட்ரோன் தாக்குதல்களால் ரஷ்யாவின் எண்ணெய் சுத்திகரிப்புத் திறன் கடுமையாகப் பாதிக்கப்பட்டுள்ளது. அதன் சுத்திகரிப்பு நிலையத்தின் உற்பத்தித் திறன் ஜூன் மாதத்தில் 20 ஆண்டுகளுக்கும் மேலான காலத்தில் இல்லாத அளவுக்குக் குறைந்த மட்டத்தை எட்டியதுடன், டீசல் உற்பத்தியும் கடந்த ஆண்டை விட கிட்டத்தட்ட 30 சதவீதம் குறைந்துள்ளது.

இந்த நிலையில், வியாழக்கிழமை தென் கொரியா வெளியிட்டுள்ள அறிக்கையில், சம்பந்தப்பட்ட சுத்திகரிக்கப்பட்ட பெட்ரோலியப் பொருட்கள், முக்கியமாக தொழில்துறை இயந்திரங்கள், மின்னணுவியல் மற்றும் வாகனங்களுக்குப் பொருந்தும் ரஷ்யா மீதான தென் கொரியாவின் ஏற்றுமதி கட்டுப்பாடுகளின் கீழ் வராது என்று கூறப்பட்டுள்ளது.

முற்றிலும் முரணாக

மேலும், டீசல் போன்ற தென் கொரியாவைச் சேர்ந்த எரிபொருள் ஏற்றுமதி செய்யப்பட்டதா என்பது உறுதிப்படுத்தப்படவில்லை என்று கூறியுள்ள அரசாங்கம், சுங்க அனுமதி நடைமுறைகள் மூலம் தென் கொரியாவிலிருந்து ரஷ்யாவிற்கு டீசல், விமான எரிபொருள் அல்லது மோட்டார் பெட்ரோல் எதுவும் ஏற்றுமதி செய்யப்படவில்லை என்றும் தெரிவித்துள்ளது.

இந்த நிலையில், தென் கொரியாவின் பொருளாதாரத் தடைக் கொள்கைகளுக்கு இந்த விநியோகங்கள் முற்றிலும் முரணாக அமைந்திருந்ததாக, உக்ரைனிய ஜனாதிபதி வோலோடிமிர் ஜெலென்ஸ்கியின் ஆலோசகர் ஒருவர் இந்த வாரம் தெரிவித்திருந்தார்.

இதனிடையே, தென் கொரியாவின் சர்வதேச நம்பகத்தன்மைக்குக் களங்கம் விளைவிக்கக்கூடிய வகையிலான பொதுக் கருத்துகளை வெளியிடுவதைத் தவிர்க்குமாறு உக்ரைனை வலியுறுத்திய தென் கொரிய ஜனாதிபதி அலுவலகம், புதன்கிழமையன்று அந்த கருத்துகள் உண்மைக்குப் புறம்பானவை மற்றும் பொருத்தமற்றவை என்று தெரிவித்தது.