வரலாறு காணாத வெப்பம்... பொதுமக்களுக்கு கிழக்கு ஆசிய நாடொன்று விடுத்த எச்சரிக்கை

ஒரு நூற்றாண்டுக்கும் மேலாக வெப்பநிலைப் பதிவுகள் தொடங்கப்பட்டதிலிருந்து, கிழக்கு ஆசிய நாடான தென் கொரியாவில் மிக உயர்ந்த வெப்பநிலைப் பதிவாகியுள்ளது.

மிக அதிகபட்ச வெப்பநிலை

கடும் வெப்பத்தால் பாதிக்கப்பட்ட பகுதிகளில் அனைத்து வெளிப்புற நடவடிக்கைகளையும் உடனடியாக நிறுத்துமாறு அதிகாரிகள் மக்களை எச்சரித்துள்ளனர்.

தென்கிழக்கு நகரமான யாங்சானில் ஞாயிற்றுக்கிழமை மதியம் வெப்பநிலை 42.5 டிகிரி செல்சியஸை எட்டியதாக கொரிய வானிலை ஆய்வு மையம் (KMA) தெரிவித்துள்ளது; 1904-ஆம் ஆண்டில் நவீன வானிலை கண்காணிப்பு முறை தொடங்கியதிலிருந்து பதிவான மிக அதிகபட்ச வெப்பநிலை இதுவாகும்.

வெளியாகியுள்ள தரவுகளின் அடிப்படையில், யாங்சான் (Yangsan) பகுதி தொடர்ந்து நிலவும் வெப்ப அலையின் மையமாகத் திகழ்கிறது; அங்கு ஞாயிற்றுக்கிழமையன்று தொடர்ந்து ஐந்தாவது நாளாக வெப்பநிலை 40 டிகிரி செல்சியஸைத் தாண்டியது.

அதேவேளை, டேகு (Daegu) மற்றும் புசான் (Busan) உள்ளிட்ட பல நகரங்களிலும் வெப்பநிலை 30 டிகிரி செல்சியஸின் உயர் நிலைகளை எட்டி வருகிறது.

ஃபிஃபா தலைவர் பதவியை இழக்கும் கியானி இன்ஃபான்டினோ (Gianni Infantino)

இதனிடையே, கடுமையான வெப்பத்திலிருந்து தப்பிக்க மக்கள் குளிரூட்டப்பட்ட வணிக வளாகங்கள் அல்லது சிற்றுண்டிச்சாலைகளை நோக்கிப் படையெடுத்து வருவதாகத் தகவல் வெளியாகியுள்ளது.

ஞாயிற்றுக்கிழமையன்று 20-க்கும் மேற்பட்ட பகுதிகள் அவசர வெப்ப அலை எச்சரிக்கையின் கீழ் இருந்தன; அதிகரித்து வரும் வெப்பநிலையைச் சிறப்பாகக் கையாள்வதற்காக இந்த ஆண்டு அறிமுகப்படுத்தப்பட்ட புதிய எச்சரிக்கை வகை இதுவாகும்.

வெப்ப அலை வீசும் பகுதிகளில், அன்றைய தினத்தில் உணரப்படும் வெப்பநிலை 38 டிகிரி செல்சியஸையோ அல்லது உண்மையான வெப்பநிலை 39 டிகிரி செல்சியஸையோ எட்டும் என்று கணிக்கப்படும்போது அவசரக்கால எச்சரிக்கை விடுக்கப்படுகிறது.

பருவநிலை மாற்றம்

KMA வெளியிட்டுள்ளத் தரவுகள் அடிப்படையில், நாட்டில் வெப்ப அலை வீசும் நாட்களின் சராசரி ஆண்டு எண்ணிக்கை கடந்த ஐந்து ஆண்டுகளில் இருமடங்கிற்கும் அதிகமாக அதிகரித்து 19-ஆக உயர்ந்துள்ளது.

குறைந்தபட்சம் 33 டிகிரி செல்சியஸ் அதிகபட்ச வெப்பநிலையைக் கொண்ட ஒரு நாள், வெப்ப அலை நாளாக வரையறுக்கப்படுகிறது. சாங்வோன் (Changwon) நகரில் வெப்பநிலை 39.5 டிகிரி செல்சியஸாக உயர்ந்ததைத் தொடர்ந்து அங்கு நடைபெறவிருந்த தென் கொரியாவின் தொழில்முறை பேஸ்பால் லீக் தொடரின் ஒரு ஆட்டத்தை ரத்து செய்ய வேண்டிய கட்டாயம் ஏற்பட்டது; அந்நகரில் தொடர்ந்து இரண்டாவது முறையாக ஒரு ஆட்டம் ரத்து செய்யப்படுவது இதுவேயாகும்.

இந்த நிலையில், மனிதனால் தூண்டப்பட்ட பருவநிலை மாற்றத்தின் விளைவாக, வெப்ப அலைகள் போன்ற தீவிர வானிலை நிகழ்வுகள் அடிக்கடி நிகழக்கூடியதாகவும், அதிகத் தீவிரத்தன்மை கொண்டவையாகவும் மாறி வருகின்றன என்று விஞ்ஞானிகள் எச்சரிக்கின்றனர்.

அத்துடன், உலக நாடுகளில் தீவிர வானிலை நிலையை மேலும் தீவிரமாக்கும் வகையில், இந்த ஆண்டு 'எல் நினோ' (El Niño) மீண்டும் திரும்பியுள்ளது; இது பசிபிக் பெருங்கடலின் மேற்பரப்பு வெப்பநிலையை உயர்த்தக்கூடிய, பொதுவாக இரண்டு முதல் ஏழு ஆண்டுகளுக்கு ஒருமுறை நிகழக்கூடிய ஒரு இயற்கையான காலநிலை நிகழ்வாகும்.