ஸ்பெயின் காட்டுத்தீயில் சிக்கி உடல் கருகி பலியான பிரித்தானியர்கள்

தெற்கு ஸ்பெயினில் ஏற்பட்ட காட்டுத்தீயில் சிக்கி இதுவரை 12 பேர்கள் மரணமடைந்துள்ள நிலையில், பல பிரித்தானியர்களும் மரணமடைந்திருக்கலாம் என அஞ்சப்படுகிறது.

70 சதவீதம் பேர் பிரித்தானியர்கள்

இறந்தவர்களில் மூவர் சிறார்கள் என்று உள்ளூர் தகவல்கள் தெரிவிக்கின்றன. அல்மேரியாவின் லாஸ் கல்லார்டோஸில் எரிந்துபோன கார் ஒன்றில் சடலங்களாகக் கண்டெடுக்கப்பட்ட நால்வரும் பிரித்தானியர்கள் என்று நம்பப்படுவதாக அதிகாரிகள் தெரிவித்துள்ளனர்.

தீயிலிருந்து தப்பிக்க நடந்தே செல்ல முயன்றபோது மரணமடைந்தவர்கள் மத்தியிலும் பிரித்தானியர்கள் இருக்கலாம் என்ற அச்சமும் நிலவுகிறது.

இதனிடையே, மின்சாரக் கம்பி ஒன்று அறுந்து விழுந்ததே காட்டுத்தீக்குக் காரணம் என்று நேரில் கண்டவர்கள் கூறுகின்றனர். பெடார் (Bedar) என்ற கிராமத்தில் பரவியுள்ள தீயை அணைக்க, சுமார் 150 தீயணைப்பு வீரர்களும் ராணுவத்தினரும் பணியில் ஈடுபடுத்தப்பட்டுள்ளனர்.

அக்கிராமத்தில் சுமார் 70 சதவீதம் பேர் பிரித்தானியர்கள் என்றும், அவர்களில் பெரும்பாலோர் முதியவர்கள் மற்றும் அங்கு ஓய்வு வாழ்க்கையை மேற்கொள்பவர்கள் என்றும் தகவல் வெளியாகியுள்ளது.

எல் நினோ மிகவும் வலுவாக இருக்கக்கூடும்... வானிலை ஆய்வாளர்கள் எச்சரிக்கை

தெற்கு ஸ்பெயினில் காட்டுத்தீயிலிருந்து தப்பிக்க முயன்றதில் குறைந்தது 23 பேரைக் காணவில்லை என்று அதிகாரிகள் வெள்ளிக்கிழமை தெரிவித்துள்ளனர்.

மேலும், மரணமடைந்தவர்களில் ஒருவர் மட்டுமே ஸ்பெயின் நாட்டவர் என்றும், எஞ்சியவர்கள் வெளிநாட்டினராக இருக்கலாம் எனவும்; அவர்கள் ஓரிடத்திலேயே தங்கியிருக்குமாறு அளிக்கப்பட்ட அறிவுறுத்தல்களைப் புறக்கணித்தனர் என்றும் அதிகாரிகள் தரப்பில் தெரிவிக்கப்பட்டுள்ளது.

பாதிக்கப்பட்டவர்கள் காரில் தப்பிக்க முயன்றனர்; ஆனால், அல்மேரியா மாகாணத்தில் உள்ள லாஸ் கல்லார்டோஸ் (Los Gallardos) நகரைச் சுற்றியுள்ள வனப்பகுதியில், காற்றின் வேகத்தால் வேகமாகப் பரவிய தீப்பிழம்புகள் அவர்களைச் சூழ்ந்துகொண்டன என்றும் உள்ளூர் அதிகாரிகள் தெரிவிக்கின்றனர்.

மேலும், ஒரே வாகனத்தில் சடலமாக மீட்கப்பட்ட நால்வர் பிரித்தானியர்களாக இருக்கலாம் என்றும், அவர்களது காரின் ஸ்டீயரிங் வலது புறத்தில் இருந்ததால், அவர்கள் பிரித்தானிய நாட்டவர்கள் எனத் தோன்றுவதாகவும் அதிகாரிகள் தெரிவிக்கின்றனர்.

வெளியேற்றத் திட்டத்தில் இடம்பெறாத ஒரு பாதையில், தங்கள் கார்களைக் கைவிட்டுவிட்டு நடந்தே தப்பிக்க முயன்றதாகத் தோன்றும் நிலையில், மேலும் எட்டு பேர் சடலங்களாகக் கண்டெடுக்கப்பட்டனர்.

கருகிய நிலையில் மீட்கப்பட்டுள்ள பல சடலங்களை டிஎன்ஏ பரிசோதனை மூலம் இன்னும் அடையாளம் காண வேண்டியிருப்பதாகவும் அதிகாரிகள் தரப்பில் தெரிவிக்கப்பட்டுள்ளது.

காணாமல் போனவர்களில் சிலர், காட்டில் எதிர்பாராத சூழலில் சிக்கிக்கொண்ட மலையேற்றப் பயணிகளாக இருக்கலாம் என்று அண்டலூசியாவின் பிராந்தியத் தலைவர் யுவான் மானுவல் மொரேனோ கூறியுள்ளார்.

57,000 ஹெக்டேர் நிலப்பரப்பு

ஜூன் 2017-இல் அண்டை நாடான போர்த்துகலில் நிலவிய சூழலை இது நினைவுப்படுத்துவதாகவும்; அப்போது கடும் வெப்ப அலையின்போது ஏற்பட்ட பெரும் காட்டுத்தீயில் 60-க்கும் மேற்பட்டோர் மரணமடைந்தனர், அவர்களில் பாதிப் பேர் தங்கள் கார்களுக்குள்ளேயே தீயில் கருகி மரணமடைந்தனர் எனவும் சுற்றுச்சூழல் ஆர்வலர்கள் கூறுகின்றனர்.

கோடையின் தொடக்கத்தில் ஏற்பட்ட தொடர்ச்சியான வெப்ப அலைகள், ஸ்பெயினின் பெரும் பகுதிகளை வறண்டு போகச் செய்து, எந்தவொரு தீப்பொறிக்கும் எளிதில் இலக்காகும்படி செய்துள்ளன.

இது காட்டுத்தீப் பருவம் முன்கூட்டியே தொடங்க வழிவகுத்துள்ளது. ஐரோப்பிய வனத்தீ தகவல் அமைப்பின் (European Forest Fire Information System) தரவுகளின்படி, இந்த ஆண்டில் இதுவரை சுமார் 57,000 ஹெக்டேர் நிலப்பரப்பு எரிந்து சாம்பலாகியுள்ளது; இது கடந்த இரு தசாப்தங்களின் வருடாந்திர சராசரி அளவில் பாதியளவாகும், மேலும் ஐரோப்பிய ஒன்றியத்தில் எரிந்த மொத்த நிலப்பரப்பில் இது 40 சதவீதமாகும்.

கடந்த ஆகஸ்ட் மாதத்தில் நிலவிய சாதனை அளவிலான வெப்ப அலை, கடந்த மூன்று தசாப்தங்களிலேயே மிக மோசமான காட்டுத்தீ சீசனை உருவாக்கியது; இதனால் லண்டன் நகரைப் போல இரு மடங்கு பரப்பளவைக் கொண்ட 3,30,000 ஹெக்டேர் நிலப்பரப்பு எரிந்து சாம்பலானது குறிப்பிடத்தக்கது.