ஈழத்தமிழருக்கு பிரித்தானிய மன்னர் வழங்கிய கௌரவம்

ஈழத்தமிழரான நிஷான் கனகராஜாவிற்கு பிரித்தானிய மன்னர் நைட் பட்டம் வழங்கி கௌரவித்துள்ளார்.

ஈழத்தமிழருக்கு நைட் பட்டம்

இலங்கை யாழ்பாணத்தில் பிறந்த நிஷான் கனகராஜா(Nishan Canagarajah), தற்போது பிரித்தானியாவில் உள்ள லெய்செஸ்டர் பல்கலைக்கழகத்தின் தலைவர் மற்றும் துணைவேந்தராக உள்ளார். 

உயர்கல்வி முன்னேற்றத்திற்கு அவரின் சேவையை கௌரவிக்கும் வகையில், பிரித்தானிய மன்னர் சார்லஸ் நைட்(knight) பட்டம் வழங்கி கௌரவித்துள்ளார். 

ஜூலை 7 ஆம் திகதி வின்ட்சர் கோட்டையில் நடைபெற்ற பட்டமளிப்பு விழாவில், மரபுப்படி மண்டியிட்டிருந்த பேராசிரியர் கனகராஜாவின் தோள்களை மன்னர் சார்லஸ் தனது வாளால் தொட்டு, முறைப்படி 'நைட்' பட்டம் வழங்கினார்.

இதன் மூலம், தனது பெயருக்கு முன்னால் சர் பட்டத்தை சேர்க்கும் பெருமையை நிஷான் கனகராஜா பெறுகிறார். 

உலகளாவிய சக்தி வாய்ந்த வான்படை - சீனாவை முந்திய இந்தியா

இந்த பட்டமளிப்பு விழாவில் அவரின் மனைவி தாபிதா மற்றும் 2மகன்கள் மற்றும் ஒரு மகள் கலந்து கொண்டனர். 

இது குறித்து பேசிய சர் நிஷான் கனகராஜா, "மன்னர் சார்லஸிடமிருந்து இந்த விருதைப் பெறுவதில் நான் மிகுந்த பெருமையும் நன்றியும் அடைகிறேன். ஒரு காலத்தில் போரினால் பாதிக்கப்பட்ட இலங்கையைச் சேர்ந்த ஒரு சிறுவனாக, அரச குடும்பத்தினரால் அங்கீகரிக்கப்படுவது என்பது மிகவும் குறிப்பிடத்தக்க ஒரு பயணமாகும். 

கல்வியின் மாற்றும் சக்தியாலும், அது வழங்கும் வாய்ப்புகளாலும்தான் இது சாத்தியமாகியுள்ளது. அதனால்தான், மற்றவர்களும் தங்கள் உண்மையான ஆற்றலை முழுமையாக வெளிப்படுத்த உதவும் தடைகளை அகற்றுவதில் நான் உறுதியாக இருக்கிறேன்" என தெரிவித்துள்ளார்.

நிஷான் கனகராஜா

1966 ஆம் ஆண்டு இலங்கையின் யாழ்பாணத்தில் பிறந்த இவர் யாழ்ப்பாணத்தில் உள்ள புனித ஜான் கல்லூரியில் ஆரம்ப கல்வியை முடித்து விட்டு, கேம்பிரிட்ஜ் பல்கலைக்கழகத்தில் 1989 ஆம் ஆண்டில் இளங்கலை பட்டமும், 1993 ஆம் ஆண்டில் முனைவர் பட்டமும் பெற்றார். 

லெய்செஸ்டர் பல்கலைக்கழகத்தின் முதல் சிறுபான்மை இனத் துணைவேந்தராக பொறுப்பேற்ற இவர், பெரும்பாலும் புறக்கணிக்கப்படும் மற்றும் போதிய பிரதிநிதித்துவம் இல்லாதவர்களுக்குக் குரல் கொடுத்துள்ளார். அகதிகள் மற்றும் உக்ரேனிய, பாலஸ்தீனிய கல்வியாளர்களுக்கு ஆதரவளித்துள்ளார்.

இவரின் தலைமையின் கீழ் இந்த பல்கலைக்கழகம் 3 முறை 'ஆண்டின் சிறந்த பல்கலைக்கழகம்' என்ற விருதைப் பெற்றதோடு, கற்பித்தல் சிறப்புக் கட்டமைப்பில் தங்கப் பதக்கத்தையும், ஆராய்ச்சி சிறப்புக் கட்டமைப்பில் முதல் 30 இடங்களையும் அடைந்துள்ளது. 

முதலீடு செய்ய பாதுகாப்பான நாடுகளின் பட்டியல் - இந்தியா, இலங்கையின் இடம் என்ன?

மேலும், 'ஃப்ரீடம் ஆஃப் தி பரோ' விருதும், ஆயுதப் படைகளின் சமூகங்களுக்கு அளித்த ஆதரவிற்காக ஆயுதப் படைகளின் உடன்படிக்கையில் தங்க விருதும் வழங்கப்பட்டது. 

உள்ளூர் சமூகத் திட்டங்களுக்காக 3 மில்லியன் பவுண்டுகளுக்கு மேல் நிதி திரட்டி, ஒரு குடிமைப் பல்கலைக்கழகக் கூட்டமைப்பை நிறுவினார்.

2025 ஆம் ஆண்டில் UCEA-வின் தலைவர், 'தி கான்வர்சேஷன்' அமைப்பின் முன்னாள் தலைவர் 'யுனிவர்சிட்டிஸ் யுகே' வாரியத்தின் முன்னாள் உறுப்பினர் என பல்வேறு பொறுப்புகளை வகித்துள்ளார்.