9 ஐரோப்பிய நாடுகளில் வெடித்துள்ள போராட்டம்; பின்னணி என்ன?

students protest ongoing in 9 europe countries: பிரான்ஸை தொடர்ந்து, குறைந்தது 9 ஐரோப்பிய நாடுகளில் போராட்டம் வெடித்துள்ளது.

பிரான்ஸில் போராட்டம்

பிரான்ஸில் பள்ளிகளில் நிலவும் பிரச்னைகள் மற்றும் வாழ்க்கைச் செலவின உயர்வுக்கு எதிராக கடந்த வாரம் நடைபெற்ற போராட்டங்களில் சுமார் 5 லட்சத்திற்கும் அதிகமானோர் கலந்து கொண்டனர்.

இந்த போராட்டம் வன்முறையாக மாறியதில், ஏராளமான கட்டிடங்கள் தீ வைக்கப்பட்டுள்ளதோடு, கொள்ளை சம்பவங்களும் நடைபெற்றுள்ளது. 

சுமார் 1,200 பேர் கைது செய்யப்பட்டதாகவும், 150 காவல்துறை அதிகாரிகள் காயமடைந்ததாகவும் பிரான்ஸ் பிரதமர் செபாஸ்டியன் லெகோர்னு தெரிவித்தார்.

பிரான்ஸ் மட்டுமல்லாது ஐரோப்பாவில் குறைந்தது 9 நாடுகளில் போராட்டம் வெடித்துள்ளது. 

உலகிலே முதல்முறை; இந்திய சிறுவனுக்கு கண்ணுக்கு மேல் வளர்ந்த பல்

இத்தாலி

இத்தாலியில், அதிகரித்து வரும் வாழ்க்கைச் செலவுகளுக்கும் எதிரான பேரணி அமைதியாகத் தொடங்கியது.

அக்டோபர் 16 அன்று நடைபெற்ற "மெலோனி எதிர்ப்பு நாள்" போராட்டங்களில், வகுப்பறைகளில் வெளிநாட்டு மாணவர்களின் எண்ணிக்கைக்கு வரம்பு விதிக்கும் முன்மொழிவுக்கு எதிராக மாணவர்கள் பேரணியாகச் சென்றனர். 

ஆனால் முகமூடி அணிந்த போராட்டக்காரர்கள் கலவரத் தடுப்புப் பொலீசார் மீது கற்களை வீசியதுடன், மதுக்கூட மேசைகளைக் கொண்டு அமைக்கப்பட்ட தடுப்புகளுக்கும் தீ வைத்தனர்.

வன்முறைக் குழுக்களைக் கலைக்க, காவல்துறை கண்ணீர்ப் புகைக் குண்டுகளையும் நீர்த்தாரை பீரங்கிகளையும் பயன்படுத்தியது. 23 சிறார்கள் மற்றும் 13 வெளிநாட்டினர் உட்பட 200க்கும் அதிகமானோரை இத்தாலி காவல்துறை கைது செய்துள்ளது. 

“ஆர்ப்பாட்டம் செய்வது உரிமை. நமது நகரங்களுக்குத் தீ வைப்பது உரிமையல்ல" என தெரிவித்துள்ள இத்தாலி பிரதமர் ஜியோர்ஜியா மெலோனி வன்முறையை கட்டுப்படுத்த மிலனுக்கு கூடுதலாக 500 வீரர்களை அனுப்புகிறது.

இத்தாலிய எஃகுத் தொழிலாளர்களும் லாரி ஓட்டுநர்களும் திங்கட்கிழமை அன்று போராட்டத்தில் ஈடுபட்டதால், விமான நிலையத்திலும் சாலைகளிலும் இடையூறு ஏற்பட்டது.

இந்தத் திருடர்களின் அரசாங்கம் கவிழும் வரை ஒவ்வொரு சனிக்கிழமை பிற்பகலிலும் மிலானிலும் மற்ற முக்கிய இத்தாலிய நகரங்களிலும் ஆர்ப்பாட்டம் நடத்தப்படும் என்று '17 அக்டோபர்' என்ற புதிய இயக்கம் அறிவித்துள்ளது.

அல்பேனியா

அல்பேனியாவில், ஊழல் மற்றும் வேலையின்மைக்கு பொறுப்பேற்று பிரதமர் எடி ராமா பதவி விலகக் கோரி போராட்டக்காரர்கள் போராட்டம் நடத்தியதால், டிரானாவில் தொடர்ந்து 5வது நாளாக வன்முறை மோதல்கள் தொடர்ந்தன. 

ஆத்திரமடைந்த இளைஞர்கள் காவல்துறையினர் மீது கற்களை வீசியெறிந்தனர். அதற்குப் பதிலடியாக, காவல்துறையினர் கண்ணீர்ப் புகைக் குண்டுகள், நீர்த்தாரை பீரங்கிகள் மற்றும் ரப்பர் தோட்டாக்களைப் பயன்படுத்தினர்.

இந்த வன்முறைப் போராட்டங்களைத் தூண்டியதாக ஈரான் மற்றும் ரஷ்யா மீது பிரதமர் எடி ராமா குற்றம் சாட்டியுள்ளார்.

பெல்ஜியம்

பெல்ஜியத்தில், பொதுச் செலவினக் குறைப்புக்கு மத்தியில் அதிகரித்து வரும் குடும்பச் செலவுகள், உயர்கல்வி அல்லது பல்கலைக்கழகப் பதிவுக் கட்டணங்களைச் செலுத்த விரும்பாத மாணவர்களின் போராட்டங்களையும் தூண்டியுள்ளது. 

போராட்டக்காரர்களுக்கும் காவல்துறைக்கும் இடையே மோதல்கள் வெடித்ததால், காவல்துறை அவர்கள் மீது நீர்த்தாரை பீரங்கிகளைப் பயன்படுத்தியது.

பெல்ஜிய உள்துறை அமைச்சர் பெர்னார்ட் குயின்டின் இதனை, "நமது சமூகத்தைச் சீர்குலைக்கும் நோக்கில் திட்டமிட்டு மீண்டும் மீண்டும் நிகழ்த்தப்பட்ட அப்பட்டமான வன்முறை" என குறிப்பிட்டார்.

போர்ச்சுகல்

போர்ச்சுகலில், அதிகரித்து வரும் வாழ்க்கைச் செலவு, குறைந்த ஊதியம் மற்றும் மலிவு விலையில் வீடு கிடைப்பதில் உள்ள சிரமம் ஆகியவற்றைக் கண்டித்து லிஸ்பனில் ஆயிரக்கணக்கான மக்கள் பேரணி நடத்தினர். 

லிஸ்பன் மற்றும் பல நகரங்களில், 2017 ஆம் ஆண்டிலிருந்து சொத்துக்களின் விலைகள் 2 மடங்கிற்கும் மேலாக உயர்ந்துள்ளன.

ஸ்பெயின்

ஸ்பெயினில், வீட்டு வசதி மலிவுத்தன்மை பாரிய பிரச்சினையாக உருவெடுத்துள்ளது.

வாடகை கடுமையாக உயர்த்தப்பட்டதாகக் கூறப்பட்டதைத் தொடர்ந்து, 87 வயதான மாரிகார்மென் அபாஸ்கல் வெளியேற்றப்பட்டதை அடுத்து, செப்டம்பர் மாதம் போராட்டங்கள் தீவிரமடைந்தன. 

அதனைத் தொடர்ந்து ஏற்பட்ட அவரது மரணம், வெளியேற்றங்கள் மற்றும் சொத்து ஊக வணிகம் மீதான கோபத்தை மேலும் தீவிரப்படுத்தியது.

ஜேர்மனி

ஜேர்மனி தலைநகர் பெர்லினில், கட்டாய இராணுவ சேவைக்கான தயாரிப்புகளை எதிர்த்தும், கல்வியில் அதிக முதலீடு செய்யக் கோரியும், மாணவர்கள் அக்டோபர் 16 அன்று ஆண்ட்ரியாஸ்-ஜிம்னாசியத்தின் நுழைவாயில்களை மறித்தனர்.

ஆஸ்திரியாவில், பல்கலைக்கழக நிதி ஒதுக்கீட்டுக் குறைப்புகளுக்கும், மோசமடைந்து வரும் கல்வி வசதிகள் குறித்த கவலைகளுக்கும் எதிராக மாணவர்கள் போராட்டம் வெடித்துள்ளது. 

கிரீஸில் அதிகரிக்கும் தங்குமிடச் செலவுகள், வீட்டு வசதிப் பற்றாக்குறை மற்றும் அதிகரித்த இராணுவச் செலவினங்கள் ஆகியவற்றால் மாணவர்கள் மத்தியில் கோபம் ஏற்படுத்தியுள்ளது.

பிற நாடுகளின் அளவுக்கு ஜேர்மனி, கிரீஸ், ஆஸ்திரியாவில் போராட்டம் நடைபெறவில்லை என்றாலும் அணி திரட்டல்கள் தொடங்கியுள்ளது.