மூன்று நாடுகளை மொத்தமாக மூழ்கடித்த பெருவெள்ளம்... 100 கடந்த இறப்பு எண்ணிக்கை

தென்னாப்பிரிக்கா, மொசாம்பிக் மற்றும் ஜிம்பாப்வே நாடுகளில் முழுவதும் பெய்த கனமழையால் ஏற்பட்ட வெள்ளத்தில் 100-க்கும் மேற்பட்டோர் மரணமடைந்துள்ளனர்.

வெளியேற்றப்படும் அபாயம்

தெற்கு ஆப்பிரிக்காவில் உள்ள பல நாடுகளில் மேலும் கடுமையான வானிலை எதிர்பார்க்கப்படுவதாக அதிகாரிகள் எச்சரிக்கை விடுத்துள்ளனர்.

மொசாம்பிக்கின் மத்திய மற்றும் தெற்குப் பகுதிகளில், 200,000-க்கும் மேற்பட்ட மக்கள் பாதிக்கப்பட்டுள்ளனர், ஆயிரக்கணக்கான வீடுகள் சேதமடைந்துள்ளன, மேலும் பல்லாயிரக்கணக்கான மக்கள் வெளியேற்றப்படும் அபாயத்தை எதிர்கொண்டுள்ளனர்.

அரிசி மற்றும் மக்காச்சோளம் போன்ற முக்கியப் பயிர்கள் உட்பட சுமார் 173,000 ஏக்கர் பரப்பளவிலான பயிர்கள் வெள்ள நீரில் மூழ்கியுள்ளன.

கடந்த ஆண்டு பிற்பகுதியில் இருந்து ஏற்பட்ட அசாதாரணமான கடுமையான மழைக்காலத்தைத் தொடர்ந்து, அங்கு குறைந்தது 103 பேர் உயிரிழந்துள்ளனர் என்று அந்த நாட்டின் பேரிடர் மேலாண்மை மற்றும் இடர் குறைப்பு முகமை வெள்ளிக்கிழமை தெரிவித்துள்ளது.

அவர் கிரீன்லாந்தைக் கைப்பற்றினால்... உலக முடிவுக்கு காரணமாகும்: ட்ரம்பிற்கு ரஷ்யா எச்சரிக்கை

அதிகரித்த வெள்ள நீரில் மூழ்கியோ அல்லது இடிந்து விழும் கட்டிடங்களில் சிக்கியோ மக்கள் மரணமடைந்துள்ளனர்; மற்றவர்கள் காலரா நோய் தாக்கியதாலோ அல்லது மின்னல் தாக்கியதில் மின்சாரம் பாய்ந்தோ இறந்துள்ளதாக தகவல் வெளியாகியுள்ளது.

ஜிம்பாப்வேயில் இந்த ஆண்டு பெய்த கனமழையால் குறைந்தது 70 பேர் மரணமடைந்துள்ளனர் என்றும், 1,000-க்கும் மேற்பட்ட வீடுகள் சேதமடைந்துள்ளதாகவும், பள்ளிகள், சாலைகள் மற்றும் பாலங்கள் உள்ளிட்ட உள்கட்டமைப்புகள் இடிந்து விழுந்துள்ளதாகவும் ஜிம்பாப்வே அதிகாரிகள் தெரிவித்துள்ளனர்.

தென்னாப்பிரிக்காவின் லிம்போபோ மற்றும் மபுமலாங்கா ஆகிய இரண்டு வடக்கு மாகாணங்களில், கடந்த மாதம் தொடங்கிய கனமழை மற்றும் அதனால் ஏற்பட்ட கடுமையான வெள்ளப்பெருக்கு காரணமாக குறைந்தது 19 பேர் மரணமடைந்ததாகத் தகவல்கள் வெளியாகியுள்ளன.

இதனிடையே, வியாழக்கிழமை லிம்போபோவிற்கு வருகை தந்த, ​​தென்னாப்பிரிக்க ஜனாதிபதி சிரில் ரமபோசா, ஒரு வாரத்திற்கும் குறைவான காலத்தில் 15 அங்குலத்திற்கும் அதிகமான மழை பெய்துள்ளதாகத் தெரிவித்தார்.

ஏழு நாடுகளில் வெள்ளம்

இதனிடையே, புகழ்பெற்ற க்ரூகர் தேசிய பூங்காவில் உள்ள முகாம்களில் இருந்து உயரமான பகுதிகளுக்கு சுமார் 600 சுற்றுலாப் பயணிகள் மற்றும் ஊழியர்கள் ஹெலிகொப்டர் மூலம் வெளியேற்றப்பட்டுள்ளனர்.

சாலைகள் மற்றும் பாலங்கள் வெள்ளத்தில் அடித்துச் செல்லப்பட்டதால், பூங்காவின் சில பகுதிகளை அணுக முடியாத நிலையில், பார்வையாளர்களுக்காக அந்தப் பூங்கா மூடப்பட்டுள்ளது என்று தென்னாப்பிரிக்காவின் தேசிய பூங்காக்கள் நிறுவனம் தெரிவித்துள்ளது.

தென்னாப்பிரிக்க வானிலை சேவை, வெள்ளிக்கிழமை அன்று நாட்டின் சில பகுதிகளுக்கு சிவப்பு நிலை 10 எச்சரிக்கையை விடுத்துள்ளது. இது மேலும் கனமழை மற்றும் வெள்ளப்பெருக்கு ஏற்படும் என்றும், அது உயிருக்கு அச்சுறுத்தலாக இருப்பதோடு, பரவலான உள்கட்டமைப்பு சேதத்தையும் ஏற்படுத்தக்கூடும் என்றும் எச்சரித்துள்ளது.

நாட்டின் வடக்கு பகுதிகளில், தங்கள் வீடுகளின் கூரைகளிலும் மரங்களிலும் சிக்கியிருந்தவர்களை மீட்க தென் ஆப்பிரிக்க இராணுவம் ஹெலிகொப்டர்களை அனுப்பியது. இதில் தென் ஆப்பிரிக்கா-ஜிம்பாப்வே எல்லையில் வெள்ளத்தில் மூழ்கிய ஒரு சோதனைச் சாவடியில் சிக்கியிருந்த எல்லைக் காவல்படை மற்றும் காவல்துறை அதிகாரிகளும் அடங்குவர்.

ஆப்பிரிக்கக் கடற்கரைக்கு அப்பால் உள்ள தீவு நாடான மடகாஸ்கர், அத்துடன் மாலவி மற்றும் சாம்பியா ஆகிய நாடுகளையும் வெள்ளம் பாதித்துள்ளது. நவம்பர் மாத இறுதியில் இருந்து வெள்ளப்பெருக்கில் 11 பேர் உயிரிழந்துள்ளதாக மடகாஸ்கர் அதிகாரிகள் தெரிவித்துள்ளனர்.

தெற்கு ஆப்பிரிக்காவின் குறைந்தது ஏழு நாடுகளில் வெள்ளம் ஏற்பட்டதாகவோ அல்லது ஏற்படக்கூடும் என்றோ தகவல்கள் வந்துள்ளதாக அமெரிக்கப் பஞ்ச முன்னெச்சரிக்கை அமைப்பு தெரிவித்துள்ளது.