கனடாவின் ஏற்க முடியாத நடத்தை... 50 சதவீதம் வரி விதித்த ட்ரம்ப்

அமெரிக்கக் கார்கள், பால் பொருட்கள் மற்றும் மதுபானங்கள் மீதான கனடாவின் சமமற்ற நடத்தையை சுட்டிக்காட்டி, அதிரடியாக 50 சதவீதம் வரி விதித்துள்ளார் டொனால்ட் ட்ரம்ப்.

முக்கிய ஏற்றுமதிகளுக்கு

ட்ரம்பின் இந்த அதிரடி நகர்வால் ஒயின் போன்ற அன்றாட நுகர்வுப் பொருட்கள் மற்றும் ஹாக்கி மட்டைகள், சிமெண்ட் போன்ற தொழில்சார் பொருட்கள் ஆகியவை குறிவைக்கப்பட்டுள்ளன.

இருப்பினும், எரிசக்தி, பொட்டாஷ், முக்கிய கனிமங்கள் மற்றும் மீன் போன்ற பல முக்கிய ஏற்றுமதிகளுக்கு விலக்கு அளிக்கப்பட்டுள்ளது. இந்த நிலையில், வரும் வாரங்களில் அமெரிக்காவுடனான வர்த்தகப் பேச்சுவார்த்தைகளைத் தீவிரப்படுத்த கனடா தயாராக இருப்பதாகப் பிரதமர் மார்க் கார்னி பதிலளித்துள்ளார்.

இந்த வரிகள் 30 நாட்களில் அமுலுக்கு வரும் என்று வெள்ளை மாளிகை தெரிவித்துள்ளது. மேலும், வட அமெரிக்க அண்டை நாடுகளுக்கு இடையிலான வர்த்தகப் பதற்றங்கள் கணிசமாக அதிகரிப்பதைக் இது குறிக்கிறது.

கனடா, அமெரிக்கா மற்றும் மெக்ஸிகோ ஆகிய நாடுகளுக்கு இடையிலான தற்போதைய சுதந்திர வர்த்தக ஒப்பந்தமான USMCA-வின் கீழ் அந்தப் பொருட்கள் இடம்பெற்றிருந்தாலும் இல்லாவிட்டாலும், சம்பந்தப்பட்ட அனைத்துப் பொருட்கள் மீதும் புதிய வரிகள் பொருந்தும்.

இரண்டு மாதங்களில் திருமணம்... உக்ரைன் அருகே ரஷ்ய தாக்குதலில் கொல்லப்பட்ட கேரள மாலுமி

இதனிடையே, ட்ரம்பின் இந்த நகர்வு கனடிய இறையாண்மைக்கு விடுக்கப்படும் அச்சுறுத்தல் என்றும் பிரதமர் கார்னி குறிப்பிட்டுள்ளார். இரு நாடுகளுக்கும் இடையே ஏற்கனவே நடைமுறையில் உள்ள வர்த்தகத் தடைகளை, திங்கட்கிழமை விதிக்கப்பட்ட இறக்குமதி வரிகள் மேலும் வலுப்படுத்துகின்றன.

கனடிய எஃகு, அலுமினியம் மற்றும் தாமிரம் ஆகியவற்றின் மீது அமெரிக்கா 15 முதல் 50 சதவீதம் வரையிலான சுங்கவரிகளைத் தொடர்ந்து விதித்து வருகிறது.

மேலும், கனடிய மென்மரக் கட்டைகள் (softwood lumber) மீது 35 சதவீதம் சுங்கவரியையும், கார்களில் பயன்படுத்தப்படும் அமெரிக்கத் தயாரிப்பு அல்லாத உதிரிபாகங்கள் மீது 25 சதவீதம் வரியையும் அமெரிக்கா விதிக்கிறது.

இது நியாயமற்றது

அமெரிக்காவிலிருந்து இறக்குமதி செய்யப்படும் குறிப்பிட்ட சில எஃகு, அலுமினியம் மற்றும் வாகனங்கள் மீது கனடா தனது சொந்த 25 சதவீத சுங்கவரிகளையும் கொண்டுள்ளது.

கனடாவில் ஏற்படும் காட்டுத்தீயின் புகை அமெரிக்க நகரங்களுக்குள் பரவுவது தொடர்பாக, கனடா மீது வரிகளை விதிப்பதாக ட்ரம்ப் விடுத்த அச்சுறுத்தலைத் தொடர்ந்து திங்கள்கிழமை இந்த அறிவிப்பு வெளியாகியுள்ளது. ஆனால், திங்கள்கிழமை ட்ரம்ப் கையெழுத்திட்ட நிர்வாக உத்தரவுகளில் காட்டுத்தீ பற்றிய குறிப்பு எதுவும் இல்லை.

அதற்குப் பதிலாக, கார்கள், பால் பொருட்கள் மற்றும் மதுபானங்கள் தொடர்பாக கனடாவுக்கு ஏற்கனவே தெரிந்திருந்த அமெரிக்க வர்த்தகச் சிக்கல்களை அந்த மூன்று அறிவிப்புகளும் பட்டியலிடுகின்றன; இது இரு நாடுகளுக்கும் இடையிலான வர்த்தகப் பேச்சுவார்த்தைகள் முறிவடைந்ததைக் குறிப்பதாக கூறுகின்றனர்.

கார்களைப் பொறுத்தவரை, USMCA ஒப்பந்தத்தின் கீழ் வராத அமெரிக்க வாகனங்கள் மற்றும் உதிரிபாகங்கள் மீது கனடா வரி விதிப்பதாக ட்ரம்ப் குற்றம் சாட்டுகிறார். இது நியாயமற்றது என்றும், மற்ற நாடுகளுக்கு இத்தகைய வரியை விதிக்காததன் மூலம் கனடா அமெரிக்காவை பாகுபாட்டுடன் நடத்தியுள்ளது என்றும் அவர் வாதிடுகிறார்.

வட அமெரிக்காவில் வாகன உற்பத்தித் துறையானது கனடா, அமெரிக்கா மற்றும் மெக்ஸிகோ ஆகிய நாடுகளுக்கு இடையே மிகவும் ஒருங்கிணைக்கப்பட்டுள்ளது என்பது குறிப்பிடத்தக்கது.