ஈரான் நிலை பரிதாபம்... மொத்தமாக சரணடைந்து விட்டது: விமர்சகர்களுக்கு பதிலளித்த ட்ரம்ப்

ஈரானுடனான அமெரிக்க-இஸ்ரேலியப் போரை முடிவுக்குக் கொண்டுவருவதற்காக அமெரிக்காவிற்கும் ஈரானுக்கும் இடையே கையெழுத்தான புரிந்துணர்வு ஒப்பந்தத்தை விமர்சிப்பவர்களை ட்ரம்ப் கடுமையாகச் சாடியுள்ளார்.

தடம் புரளச் செய்யும்

பிப்ரவரி 28 அன்று அமெரிக்கா மற்றும் இஸ்ரேலால் தொடங்கப்பட்ட போரை முடிவுக்குக் கொண்டுவருவதற்கான ஒப்பந்தத்தை ஜனாதிபதி டொனால்ட் ட்ரம்ப் தொடர்ந்து நியாயப்படுத்தி வருவதன் ஒரு பகுதியாகவே வெள்ளிக்கிழமை அன்று இந்த அறிக்கை வெளியாகியுள்ளது.

மட்டுமின்றி, புரிந்துணர்வு ஒப்பந்தத்தில் குறிப்பிடப்பட்டுள்ள பல்வேறு நீண்டகாலப் பிரச்சினைகள் குறித்துப் பேச்சுவார்த்தைகளைத் தொடங்குவதற்காக சுவிட்சர்லாந்திற்கு மேற்கொள்ளவிருந்த பயணத்தை அமெரிக்கத் துணை ஜனாதிபதி ஜேடி வேன்ஸ் ரத்து செய்த மறுநாள் ஜனாதிபதி ட்ரம்பிடம் இருந்து இந்த விளக்கம் வெளியாகியுள்ளது.

இரு தரப்பினரும் கையெழுத்திட்ட ஒரு நாளுக்குள் ஏற்பட்ட இந்தத் தாமதம், ஒப்பந்தத்தின் நீடித்த தன்மை குறித்துக் கேள்வியை எழுப்பியுள்ளதுடன், லெபனானில் இஸ்ரேல் தொடர்ந்து நடத்தி வரும் தீவிர இராணுவ நடவடிக்கையானது ஈரான் தொடர்பிலான இந்த அதிரடி முன்னேற்றத்தைத் தடம் புரளச் செய்யும் அச்சுறுத்தலையும் ஏற்படுத்தியுள்ளது.

இஸ்ரேலால் மீண்டும் உயரும் எண்ணெய் விலை... ஹார்முஸ் போக்குவரத்து மந்தம்

தனது ட்ரூத் சமூக ஊடகத்தில் தொடர்ச்சியாக பதிவிட்டுள்ள ட்ரம்ப், இந்த புரிந்துணர்வு ஒப்பந்தமானது இஸ்ரேலின் அழுத்தம் காரணமாக முன்னெடுக்கப்பட்ட போரினால் உருவான பிரச்சினைகளுக்கு மட்டுமே தீர்வு காண்பதாகக் கூறி ஜனநாயகக் கட்சியினரும் ஒரு சில குடியரசுக் கட்சியினரும் முன்வைத்த விமர்சனங்களை நிராகரித்துள்ளார்.

மேலும் மத்திய கிழக்கில் அமெரிக்காவின் நிலையைத் தான் வலுப்படுத்தியதாகவும் ட்ரம்ப் வலியுறுத்தினார். ஹார்முஸ் நீரிணையை மீண்டும் திறப்பது, ஈரானின் துறைமுகங்கள் மீதான அமெரிக்கக் கடற்படை முற்றுகையை முடிவுக்குக் கொண்டுவருவது மற்றும் லெபனான் உட்பட அனைத்து முனைகளிலும் சண்டையை நிறுத்துவது ஆகியவை இதில் அடங்கும்.

இந்தப் போரால் ஈரான் ஒன்றுமில்லாத நிலைக்கு தள்ளப்பட்டுள்ளதாக தெரிவித்துள்ள ட்ரம்ப், அதன் கடற்படை, விமானப்படை மற்றும் பாரம்பரியமான இராணுவத் திறன்கள் என அனைத்தும் அழிந்துள்ளதாகவும் குறிப்பிட்டுள்ளார்.

மேலும், அமெரிக்கா அல்ல, ஈரான்தான் கடும் விரக்தியின் காரணமாக பேச்சுவார்த்தையில் இறங்கியது என்று அறிவித்த ட்ரம்ப், அவர்களின் கதை முடிந்துவிட்டது என்றும் கூறினார்.

நிபந்தனையற்ற சரணடைதலாக

மேலும், புரிந்துணர்வு ஒப்பந்தத்தில் குறிப்பிடப்பட்டுள்ள அந்த 60 நாட்களும் அமெரிக்கா தனது உண்மையான முகத்தை ஈராக்குக்கு காட்டும் என்றும் ட்ரம்ப் குறிப்பிட்டுள்ளார்.

அந்த 60 நாட்களில், ஈரானின் அணுசக்தித் திட்டம், ஹார்முஸ் நீரிணையின் எதிர்கால நிர்வாகம், முடக்கிவைக்கப்பட்ட ஈரானிய நிதியை விடுவித்தல், ஈரான் மீதான அனைத்துத் தடைகளையும் நீக்குதல் மற்றும் ஈரானுக்கான 300 பில்லியன் டொலர் மதிப்பிலான மறுசீரமைப்புத் திட்டத்தை உருவாக்குதல் ஆகியவை குறித்து விவாதிக்கத் திட்டமிடப்பட்டுள்ளது.

இதனிடையே, வியாழக்கிழமையன்று ஆக்சியோஸ் (Axios) செய்தி நிறுவனத்திற்கு அளித்த பேட்டியில், புரிந்துணர்வு ஒப்பந்தத்தில் ஈரான் கையெழுத்திட்டுள்ளது என்பதே நிபந்தனையற்ற சரணடைதலாக இருக்கலாம் என தாம் கருதுவதாக ட்ரம்ப் குறிப்பிட்டுள்ளார்.

இதனிடையே, வெள்ளிக்கிழமை அன்று, லெபனானில் நடந்த தாக்குதல்களுக்கு அமெரிக்காவே பொறுப்பேற்க வேண்டும் என்று ஈரான் வெளிவிவகார அமைச்சக செய்தித் தொடர்பாளர் இஸ்மாயில் பாகாயி மீண்டும் கூறினார்.

நள்ளிரவு முதல் 150-க்கும் மேற்பட்ட இலக்குகளைத் தாக்கியதாக இஸ்ரேல் கூறியுள்ளது. இந்த நிலையில், லெபனானில் புதிய போர்நிறுத்தம் ஒன்றுக்கு இஸ்ரேலும் ஹிஸ்புல்லா தரப்பும் ஒப்புக்கொள்ளப்பட்டதாக தகவல் வெளியானது.

ஆக்சியோஸ் செய்தி நிறுவனத்திற்கு அளித்த பேட்டியில், இஸ்ரேலியப் பிரதமர் பெஞ்சமின் நெதன்யாகுவுடனான தனது உறவு சிறப்பாக இருப்பதாக குறிப்பிட்ட ட்ரம்ப், ஆனால் நாம் அவரை ஓரளவு மனநிலை பிறழாமல் வைத்திருக்க வேண்டும் என்றும் கூறியுள்ளார்.