அச்சுறுத்தும் சூறாவளி பாவி... கிட்டத்தட்ட 2 மில்லியன் மக்களை வெளியேற்றிய சீனா

கிழக்கு சீனாவை பாவி சூறாவளி தாக்கவுள்ள நிலையில், சீன அதிகாரிகள் சனிக்கிழமையன்று கிட்டத்தட்ட 2 மில்லியன் மக்களை வெளியேற்றியதுடன், உயர் எச்சரிக்கையையும் விடுத்துள்ளனர்.

மணிக்கு 144 கி.மீ வேகத்தில்

பாவி சூறாவளியானது தைவான் மற்றும் ஜப்பானின் தெற்குத் தீவுகளில் பலத்த காற்றையும் மழையையும் கொண்டு வந்துள்ளது. முன்னதாக, தெற்கு பிலிப்பைன்ஸில் குறைந்தது 17 பேர் மரணமடைந்ததாக தகவல் வெளியானது.

தைவானை நோக்கி நகர்ந்து செல்வதற்கு முன்பு பாவி சூறாவளி தீவிரப்படுத்திய பருவமழையால் ஏற்பட்ட நிலச்சரிவுகளே இந்த இறப்புகளுக்கு முக்கியக் காரணம் என்று பிலிப்பைன்ஸ் அதிகாரிகள் தெரிவித்துள்ளனர்.

இந்த நிலையில், தைவானின் மத்திய வானிலை நிர்வாகத்தின் தகவலின் அடிப்படையில், மையப்பகுதியில் மணிக்கு அதிகபட்சமாக 144 கி.மீ வேகத்தில் வீசும் காற்றைக் கொண்டுள்ள 'பாவி' சூறாவளி, சனிக்கிழமையன்று தைவானுக்கு வடக்கே கடந்து செல்வதாக தெரிய வருகிறது.

இது கிழக்கு சீனாவில் உள்ள ஜெஜியாங் (Zhejiang) பகுதியை நோக்கி நகரும் என்றும், சீனாவின் தேசிய வானிலை ஆய்வு மையத்தின் தகவலின்படி, நள்ளிரவுக்கு முன்னதாகவோ அல்லது ஞாயிற்றுக்கிழமை அதிகாலையிலோ கரையை கடந்து பின்னர் நிலப்பகுதியை நோக்கி நகரும் என்றும் எதிர்பார்க்கப்படுகிறது.

சட்டவிரோத புலம்பெயர் மக்களை வேட்டையாடும் கறுப்பின தென்னாப்பிரிக்கர்கள்

ஜெஜியாங் மாகாணத்தில் சனிக்கிழமை காலை நிலவரப்படி 17 லட்சத்திற்கும் அதிகமான மக்கள் வெளியேற்றப்பட்டுள்ளதாக அதிகாரப்பூர்வ சின்ஹுவா செய்தி முகமை தெரிவித்துள்ளது.

இதனிடையே, சீனாவின் கிழக்குக் கடற்கரைப் பகுதியில் அமைந்துள்ள ஷாங்காய் நகரமும், அதிக ஆபத்துள்ள பகுதிகளில் வசித்த சுமார் 34,000 மக்களை சனிக்கிழமை நண்பகலுக்குள் பாதுகாப்பான இடங்களுக்கு மாற்றியது.

தென்கிழக்கு சீனாவில், கடற்கரைக்கு அருகிலுள்ள நகரங்கள் பாவி சூறாவளியின் தாக்கங்களை எதிர்கொள்ளத் தயாராகி வருகின்றன. சீனாவின் தேசிய வானிலை ஆய்வு மையம் ஆரஞ்சு நிற சூறாவளி எச்சரிக்கையை விடுத்துள்ளது; இது நான்கு நிலைகளைக் கொண்ட எச்சரிக்கை அமைப்பில் இரண்டாவது மிக உயர்ந்த நிலையாகும்.

குறைந்தது 113 பேர்

இதனால் பல பள்ளிகள் மற்றும் படகுச் சேவைகள் நிறுத்தப்பட்டுள்ளன. நூற்றுக்கணக்கான விமானங்கள் ரத்து செய்யப்பட்டுள்ளன; சில அதிவேக ரயில் சேவைகளும் நிறுத்தப்பட்டுள்ளன.

ஜெஜியாங் மற்றும் ஃபுஜியான் மாகாணங்களில் சூறாவளி தடுப்பு மற்றும் அவசரக்கால மீட்புப் பணிகளை முடுக்கி விடுவதற்காக, மத்திய இயற்கை பேரிடர் நிவாரண நிதியிலிருந்து 40 மில்லியன் யுவான் (5.9 மில்லியன் டொலர்) நிதியை ஒதுக்கியுள்ளதாக சீன அதிகாரிகள் சனிக்கிழமை தெரிவித்தனர்.

சனிக்கிழமை இரவு 7 மணி நிலவரப்படி, பாவி சூறாவளியால் குறைந்தது 113 பேர் காயமடைந்ததாக தைவான் அதிகாரிகள் பதிவு செய்துள்ளனர்; இவர்களில் சிலர், வழுக்கும் சாலைகளில் மழை மற்றும் பலத்த காற்றுக்கு மத்தியில் மோட்டார் சைக்கிள்களில் பயணித்தபோது காயமடைந்தனர்.

கிழக்கு மாவட்டமான ஹுவாலியன் மற்றும் மத்திய நகரமான தைச்சுங் உள்ளிட்ட தீவின் பல்வேறு பகுதிகளிலிருந்து 14,200-க்கும் மேற்பட்டோர் வெளியேற்றப்பட்டனர்.

சனிக்கிழமையன்று தைவானின் பெரும்பாலான பகுதிகளில் பள்ளிகள் மற்றும் அலுவலகங்கள் செயல்படவில்லை. இதனிடையே, ஜப்பானின் தெற்குத் தீவுகளில் உள்ள ஒகினாவா மாகாணத்தில், உயரமான அலைகள், பலத்த காற்று மற்றும் புயல் தீவிரமடையக்கூடும் என உள்ளூர் அதிகாரிகள் எச்சரித்துள்ள நிலையில், அப்பகுதி முழுவதும் 200-க்கும் மேற்பட்ட விமானங்கள் ரத்து செய்யப்பட்டுள்ளன. இஷிகாகி உள்ளிட்ட தீவுகளை பலத்த காற்றும் மழையும் தாக்கியுள்ளன.