மத்திய கிழக்கில் 3-வது விமானம் தாங்கி போர்க்கப்பலை களமிறக்கிய அமெரிக்கா
US Deploys Third Aircraft Carrier Near Iran: அமெரிக்கா தனது 3-வது விமானம் தாங்கி போர்க்கப்பலை மத்திய கிழக்கு பகுதியில் களமிறக்கியுள்ளது.
மூன்றாவது விமானம் தாங்கி போர்க்கப்பலை களமிறக்கிய அமெரிக்கா
மத்திய கிழக்கு பிராந்தியத்தில் ஈரானுடன் நிலவி வரும் பதற்றம் மேலும் தீவிரமடைந்துள்ள நிலையில், அமெரிக்கா தனது மூன்றாவது விமானம் தாங்கி போர்க்கப்பலையும் அந்த பகுதியில் நிலைநிறுத்தியுள்ளது.
இதன் மூலம் அமெரிக்காவின் ராணுவ இருப்பு மற்றும் தாக்குதல் திறன் குறிப்பிடத்தக்க அளவில் உயர்ந்துள்ளது.

USS Theodore Roosevelt போர்க்கப்பல்
அமெரிக்காவின் USS Theodore Roosevelt என்ற விமானம் தாங்கி போர்க்கப்பல், நவம்பர் 15 அன்று அமெரிக்க மத்திய கட்டளைப் பிரிவு (CENTCOM) பொறுப்பிலுள்ள பகுதிக்குள் நுழைந்ததாக தகவல்கள் தெரிவிக்கின்றன.
ஏற்கனவே USS George H.W. Bush மற்றும் USS George Washington ஆகிய இரண்டு விமானம் தாங்கி போர்க்கப்பல்கள் அந்த பகுதியில் செயல்பட்டு வருகின்றன.
ஒரே நேரத்தில் 3 அமெரிக்க கேரியர் ஸ்டிரைக் குழுக்கள்
இதனால் தற்போது மத்திய கிழக்கில் ஒரே நேரத்தில் 3 அமெரிக்க கேரியர் ஸ்டிரைக் குழுக்கள் இயங்குகின்றன. இந்த போர்க்கப்பல்களுடன் ஏவுகணை பாதுகாப்பு திறன் கொண்ட கப்பல்களும் இணைக்கப்பட்டுள்ளன.
குறிப்பாக USS Theodore Roosevelt குழுவில் USS Chosin, USS Paul Hamilton மற்றும் USS Decatur போன்ற கப்பல்கள் இடம்பெற்றுள்ளன. இவை வான் தாக்குதல் பாதுகாப்பு, ஏவுகணை எதிர்ப்பு நடவடிக்கைகள் மற்றும் கடல்சார் பாதுகாப்புப் பணிகளில் முக்கிய பங்கு வகிக்கின்றன.
ஒவ்வொரு விமானம் தாங்கி போர்க்கப்பலிலும் 60 முதல் 75 வரை போர் விமானங்களை இயக்க முடியும். மேலும் ஆயிரக்கணக்கான ராணுவ வீரர்கள் மற்றும் பணியாளர்களும் இதில் பணியமர்த்தப்பட்டுள்ளனர். அணுசக்தி மூலம் இயங்கும் இக்கப்பல்கள் நீண்ட காலம் எரிபொருள் நிரப்பாமல் செயல்படக்கூடியவை என்பதும் குறிப்பிடத்தக்கது.
இதற்கிடையில், ஈரான் மற்றும் அமெரிக்கா இடையேயான மோதல் அண்மைக் காலமாக அதிகரித்து வருகிறது. ஈரானின் இஸ்லாமிய புரட்சிகர காவல்படை (IRGC), பஹ்ரைனில் உள்ள அமெரிக்க தொடர்புடைய ராணுவ இலக்குகளை நோக்கி ட்ரோன் தாக்குதலை நடத்தியதாக அறிவித்துள்ளது. அத்தாக்குதல்களை பஹ்ரைன் வான் பாதுகாப்பு அமைப்புகள் தடுத்ததாக கூறப்பட்டுள்ளது. இதற்கு பதிலடியாக தெற்கு ஈரானில் உள்ள ஏவுகணை ஏவுதளங்களை அமெரிக்கா விமானத் தாக்குதல்களின் மூலம் குறிவைத்ததாக தகவல்கள் வெளியாகியுள்ளன.
மேலும் ஹார்முஸ் நீரிணையில் எண்ணெய் கப்பல்களுக்கு எதிரான அச்சுறுத்தல்களும் அதிகரித்துள்ளதால், உலக நாடுகள் இந்த சூழ்நிலையை கவனமாக கண்காணித்து வருகின்றன.
| உள்நாட்டு மற்றும் வெளிநாட்டு செய்திகளை உடனுக்குடன் அறிந்துக்கொள்ள லங்காசிறி WHATSAPP CHANNEL இல் இணையுங்கள். |